Suila-tapit - Sulinermut ilanngaat
Suila-tapit - Sulinermut ilanngaat
Suila-tapit - Sulinermut ilanngaat
Akileraartarnermik iluarsaaqqinnissaq Inatsisartut 2024-mi akuersissutigaat.
Innuttaasut suliffillit aningaasaqarnikkut pitsaanerusunik atugassaqarnissaannik qulakkeerinissaq iluarsaaqqinnerup siunertaraa.
Iluarsaaqqinneq naligiinnginnermik millisitsissaaq amerlanerusullu sulinissamut kajumilersissallugit.
Iluarsaaqqinneq ilaatigut inummut ilanngaatip aamma sulinermut ilanngaatip qaffanneqarnerannik kinguneqassaaq.
Sulinermut ilanngaammik qaammatit tamaasa tunineqartarnissat nutaartaraa. Suila-tapinik taaguuserpavut.
Tunniunneqartussat qassiuneri illit sulinikkut aningaasarsiannit aalajangerneqassapput.
Sulinermut ilanngaammik 2025-mi marts aallarnerfigalugu tunineqarsinnaassaguit pisariaqarpoq:
- NemKontoqalereersimanissat
- Akissasiortutut suliffeqarnissat, tunitsivinnut tunisaqarnikkut isertitaqarnissat imaluunniit namminersorluni inuussutissarsiummik ingerlataqarnikkut isertitaqarnissat.
Sulinermut ilanngaammik tunniussisarnissami tunineqartartussat tassaapput innuttaasut sulinermikkut ukiumut 70.000 kr.-it aamma 500.000 kr.-it akornannik aningaasarsiallit.
Qanorluunniit aningaasarsiaqartut tamarmik inummut ilanngaatip qaffanneqarneratigut akileraarutitigut oqilisaassiffigineqassapput.
Qanoq amerlatigisunik qaammammusiallit (tassa ilanngaatissat ilanngaatigineqartinnagit akissarsiat), sulinermut ilanngaammik qanoq angitigisumik tunineqartarnerat ataani takusinnaavat.
Innuttaasut qaammammut 5.833 kr.-it inorlugit aningaasarsiallit sulinermut ilanngaammik pisinnaanngillat. Taakkunannga amerlanerusunik akissarsiaqaraanni sulinermut ilanngaat, qaammammusiat 12.500 kr.-it tikillugit amerlassusillit 17,5%-iannik angissuseqarpoq.
Assersuut
Qaammammut 10.000 kr.-inik isertitaqaruit aningaasat ima naatsorsorneqassapput:
10.000 kr. – 5.833 kr. = 4.167 kr. * 17,5 % = 728 kr.-it tunniunneqassapput.
Aningaasarsiat ukiumut 160.000 kr.-iniit 250.000 kr.-inik amerlassuseqarpata sulinermut ilanngaat anginerpaaq tunniunneqartarpoq.
Innuttaasut taamatut aningaasarsiallit qaammammut 1.312,50 kr.-inik tunineqartarnissartik naatsorsuutigisinnaavaat.
Innuttaasut ukiumut 250.000 kr.-init amerlanerusunik aningaasarsiallit ikinnerusunik tunineqartarput.
Qaammammut 43.000 kr.-it sinnerlugit aningaasarsiaqaruit, taava sulinermut ilanngaammik tunineqarsinnaanngilatit. Taamaakkaluartoq inummut ilanngaatip qaffanneqarneratigut akileraarutitigut oqilisaassiffigineqassaatit. assa imaappoq aningaasarsiavit ilaat amerlanerusut ilinnut tunniunneqartassapput.
Suliffeqarfiit nalunaarnerat
Akileraartarnermut Aqutsisoqarfiup aningaasarsiatit paasippagit aatsaat sulinermut ilanngaammik tunineqarsinnaavutit.
Inatsimmi tamanna taagorneqarpoq Akileraartarnermut Aqutsisoqarfiup suliffeqarfinnit nalunaarfigineqarnera. Akileraartarnermut Aqutsisoqarfik suliffeqarfinnit nalunaarutinik tigusaqarlunilu suliaqareeruni aatsaat tunniussissaaq.
Suliffeqarfiit nalunaarnerat tassaavoq
- Sulisitsisut akissarsiat pillugit nalunaaruteqarnerat
- Tunitsiviit tunisanit isertitat pillugit nalunaaruteqarnerat,
- Namminersorlutik inuussutissarsiutinik ingerlataqartut akileraarutinik B-nik akiliinerat.
- Iluanaarutisianik tunniussisoqarnera.
Tunniussineq siulleq
Sulinermut ilanngaatip naafferartumik tunniunneqartussap siulliup tigunissaa aatsaat naatsorsuutigisinnaavat Akileraartarnermut Aqutsisoqarfiup suliffeqarfiit nalunaarutaannik tigusaqarneraniit qaammatit marluk qaangiunneranni.
Tamanna amerlanerpaanut ima paasisariaqarpoq, tunniussinissaq siulleq 2025-imi martsip qaammataata naanerani pissasoq.
2025-mi april aallarnerfigalugu qaammatit tamaasa marlunngornerit pingajuanni tunineqartarnissat naatsorsuutigisinnaavat.
Sulinermut ilanngaat tunniunneqassaaq ukiup ingerlanerani isertitariumaagassatit aallaavigalugit. Tamanna isumaqarpoq tunniunneqartussat naatsorsuutigisannit allaaneroratarsinnaasut.
Tamanna pissuteqarsinnaavoq:
- Isertitatit ass. tunitsivinniit qaammammiit qaammammut allanngorartorujussuusimappata
- Akileraarutigisartakkatit allanngorarsimappata
- Akileraartarnermut Aqutsisoqarfimmiit takuneqarsinnaappat ukiup siuliani iluanaarutisianik tunineqarsimasutit
- Akileraartarnermut Aqutsisoqarfimmit naatsorsorneqarsimappat ukiup siulianut sanilliullugu ukioq manna aningaasarsiatit allanngorsimasut
Sulinermut ilanngaammik tunineqarsimanngikkuit ataani allaqqasut pissutaasinnaapput:
Aningaasarsiavit amerlavallaarnerat pissutaalluni sulinermut ilanngaammik tunineqartartussanut ilanngilatit.
- Aningaasarsiavit ikippallaarnerat pissutaalluni tunineqartartussanut ilaanngilatit. Sulinermut ilanngaammik tunineqartartussat tassaapput innuttaasut sulinikkut qaammammut minnerpaamik 5.834 kr.-inik aningaasarsiallit.
- Aningaasat pisassatit 100 kr.-inik ikinneruppata. Pisassatit katillugit 100 kr.-init amerlanerulerpata tunniunneqarumaarput.
- Akileraartarnermut Aqutsisoqarfiup paasissutissaatai malillugit ukiuni kingullerni aningaasarsiarisarsimasatit qaammammiit qaammammut allanngorartorujussuusimapput.
Tamanna uagutsinnut assigiinngitsunut tikkuussivoq.
Tunniussinissaq erseqqinnerusunik nalunaarfigineqarnissatsinnut utaqqisinneqassaaq.
- Akissarsiortutut aningaasarsiatit sulisitsisuit Akileraartarnermut Aqutsisoqarfimmi sulisitsisut nalunaarsorsimaffiannut Sulinal-imut nalunaarutigisimanngilai. Sulisitsisut attavigissavat.
- Akissarsiortutut aningaasarsiatit sulisitsisuit nalunaarutigai, tamannali kingusinaartumik pisimavoq imaluunniit kukkuneqarsimavoq. Sulisitsisut attavigissavat.
- Tunitsivigisavit tunisatit nalunaarutigisimanngilai. Nalunaaruteqarnerli aamma kingusinaartumik pisimasinnaavoq imaluunniit kukkuneqarsimasinnaalluni.
Tunitsivigisat attavigissavat.
- Suliffeqanngikkuit.
- Aningaasarsiatit ilinniagaqarnersiutaappata, utoqqalinersiaappata imaluunniit isumaginninnikkut ikiorsiissutaappata.
- Imaluunniit Kalaallit Nunaannut tamakkiisumik akileraartussaanngikkuit.
- Namminersorlutit inuussutissarsiummik ingerlataqartuuvutit, akileraarutillu B-t ingerlaavartumik akilertagassatit akilersimanagit.
- Imaluunniit ima amerlatigisunik akiliisimavutit, Akileraartarnermut Aqutsisoqarfiup naatsorsuinera malillugu qaammammut 43.000 kr.-it sinnerlugit akissarsiaqartassangatinneqarlutit.
- Takusinnaavarput ukiut siuliini iluanaarutisianik tunineqartartutit. Naatsorsuutigaarput qaammammut aningaasarsiatit agguaqatigiissillugit 43.000 kr.-init amerlanerussasut.
- NemKontoqanngilatit. Aningaasanik tunineqassaguit NemKontoqartariaqarputit. NemKontoqalerniarlutit aningaaseriviit attavigissavat. NemKontoqalernissannut MitID amigaatigigukku kommunerisanni innuttaasunik sullissivik attavigeqqaassavat.