Ukiup akileraarfiup ilisaritinnera
Indhold Grønlandsk
Akileraartarneq pillugu paasissutissat illit innuttaasutut pisariaqartitatit uani ataatsimoortippavut.
Ukiup akileraarfiup qanoq paasisariaqarnerata naatsumik ilisaritinnera uani takusinnaavat. Ilisarititsinermi sammineqarpoq ukioq akileraarfik, imaraalu immikkoortut tallimat:
Siumoortumik nalunaarsuineq
Skattekorti
Ilanngaatit
Nammineerluni nalunaarsuineq
Inaarummik naatsorsuineq
Ukioq Akileraarfiusoq Ukioq Aningaasarsiorfiusoq qaammatinik aqqaneq marlunnik imaqartoq ukioq ilivitsoq malillugu ingerlasarpoq. Tassani aningaasarsiortarputit, ilanngaatitit atortarpatit akileraartarlutillu.
Ukioq Aningaasarsiorfik aallartitsinnagu Ukioq Akileraarfiusoq ingerlalereertarpoq. Tassa Siumoortumik Nalunaarsuineq aamma skattekorti isumagineqartarmata.
Ukiup Aningaasarsiorfiup kingorna Ukiumi Akileraarfiusumi Nammineerluni Nalunaarsuineq aamma Inaarummik Naatsorsuinerit ingerlanneqartarput.
Ukioq Akileraarfiusoq katillugu qaammatinik 21-nik sivisussuseqarpoq. Ukioq Aningaasarsiorfiusoq sioqqullugu oktoberimiit Ukiullu Aningaasarsiorfiusup kingorna aggustip tungaanut ingerlasarpoq.
Ukiup Akileraarfiusup ukiup siuliata aammalu ukiup tulliata qaleriittarnerat paatsuunganartoqarsinnaasarpoq.
Neriuutigaarput saqqummiussaq una paasisaqarnerulersitsiumaartoq.
Ilanngaatit
Ilanngaatit tassaapput aningaasarsiavit akileraaruserneqannginneranni ilanngaatigineqartussat. Taakku akissarsiavit ilaattut akileraarusigaanngitsutut isigissavatit.
Akissarsiortuuguit, ilanngaatit qaammammut imalt. ullut 14-ikkaarlugit akissarsiannut nalinginnaasumik agguataagaasarput.
Akissarsiatit 60.000 kr.-it siulliit akileraarusigaanngillat. 60.000 kr.-it taakku qaammatinut 12-nut agguataagaapput
Ilanngaammik aalajangersimasumik ukiumut 10.000 kr.-iusunik aamma ilanngaateqarputit.
Aammattaaq aningaasarsiat B-t ilanngaataannik 5.000 kr.-iusunik ilanngaateqarputit.
Ernianut aningaasartuutitit aamma ilanngaatigisinnaavatit.
Namminersorluni inuussutissarsiummik ingerlataqartuuguit aningaasarsiorninnut atatillugu aningaasartuutitit taamasa ilanngaatigisinnaavatit.
Namminersorluni inuussutissarsiortuuguit inuussutissarsiutinnut tunngatillugu aningaasartuutinnut isertitannullu uppernarsaatissatit ukioq akileraarfiusoq tamakkerlugu toqqortussavatit. Taamaalillutit ukioq qaangiuppat naatsorsuusiornissat ajornannginaarnerussavat.
Ukioq aningaasarsiorfiusoq decemberip 31-ani naassaaq.
Ukiortaarsioraangatta ukiup aningaasarsiorfiusussap nutaap aallartinnera nalliuttorsiutigisarparput. Ilanngaatinillu nutaanik pissagatta.
Ukioq aningaasarsiorfiusoq ingerlassaaq…
Maanna ukioq ilivitsoq aningaasarsiorfigalugulu akileraarfigisassat ingerlassaaq.
A-nik aningaasarsiaqarsinnaavutit, akissarsigaangavit akileraaruserneqartartunik.
Aningaasarsiat A-t tassaagajupput sulinermi akissarsiat.
Imaassinnaavorluunniit B-nik aningaasarsiaqartutit. Aningaasarsiat B-t ilinnut tunniunneqaraangamik akileraaruserneqarsimasanngillat. Taakkuli aamma akileraarutaasussaapput. Aningaasarsiat B-t tassaagajupput ernianit isertitat, aktianit agguagarsiat, ilinniagaqarnersiutit aamma namminersorluni inuussutissarsiummik ingerlataqarnikkut isertitat.