Nipilersortartut pinngorartitsisartullu allat
Indhold
Nipilersortartuugaanni allatulluunniit pinngorartitsinermik suliaqartuugaanni, taava pinngorartitsinermik ingerlataqartunut tunngatillugu akileraartarnermi maleruagassat ilisimasaqarfigilissallugit pitsaasuussaaq.
Namminersorlutik Oqartussat nalunaarutaanni allaqqavoq tusarnaartitsinerit isiginnaartitsinerillu aningaasarsiatut A-tut akileraaruserneqassasut. Tamannalu isumaqarpoq nipilersortartup akissarsiassaanik tunniussisussaq tassaammat, aningaasat tunniunneqalerneranni akileraarutinik unerartitsinissamut pisussaasoq.
§ 7, imm. 8. Kisimiilluni erinarsortartutut nipilersortartutullu, timersornikkut aliikkusersuisartutut, nipilersortartutut, atuakkiortutut, allatut tamatigut eqqumiitsuliortutut, timersortartutut, aviisitigut allaaserinnittarnikkut, eqqartuussisutut, eqqartuusseqataasutut illersuisutullu akissarsiat.
Tassa imaappoq nipilersorfiup/aaqqissuussisup aningaasarsiatit sulisitsisut nalunaarsorsimaffiannut nalunaarutigissavai akileraarutillu A-t unerartissallugit.
Akissarsialli taakku illit nammineq nammineerluni nalunaarsuiffimmi aningaasarsiatut B-tut nalunaarutigissavatit. Tamanna eqqumiiginarsinnaavoq, taamaaliornerulli qulakkiissavaa:
Tusarnaartitsereerlutit aningaasarsinerpit kingunerujussuatigut akileraarutinik akiligassinneqannginnissat. Akileraarutimmi akilerneqareerput.
Pinngorartitsisutut inuussutissarsiuteqarninnut atatillugu aningaasartuutinnik ilanngaateqarsinnaanerit. Nipilersortartutut/pinngorartitsisartutut aningaasartuutitit kisiisa ilanngaatigisinnaavatit, akissaajaatitit allat pinnagit.
Aningaasartuutivit uppernarsaataannik pisarnissat eqqaamassavat. Akissarsiavittaaq allakkatigut uppernarsaataat eqqaamassavatit. Aningaasat tiguinnaraluarukkit ilinnut tunniussisut aningaasanik ilinnut tunniussinerminni akileraarutinik unerartitsisimanertik uppernarsarsinnaanngilaat. Illillu aningaasat unioqqutitsinikkut akissarsiaasimannginnerat uppernarsarsinnaanngilat.
Pinngorartitsisutut suliaqarnikkut aningaasarsiat suut aningaasarsiatut A-tut aningaasarsiatullu B-tut akileraaruserneqartarnersut ataani takusinnaavat.
|
|
Timersornikkut aliikkusersuisartutut akissarsiat | A |
Atuakkanik atorniartarfimmiittuuteqarnermi akissarsiat | A |
Kiffartuussinermi akissarsiat | B |
Atorfeqartitaanermut atatillugu kiffartuussinersiutit | A |
Nipilersoqatigiittut akissarsiat | A |
Oqalugiartut, atorfeqartitaanermut atatillugu akissarsiaat | A |
Oqalugiartut, atorfeqartitaanermut atanngitsumik akissarsiaat | B |
Atuakkiortutut akissarsiat | A |
Tunissutit (tunineqartumut) | B |
Sanalukkat | B |
Kalaallit Nunaata Radioani peqataanermi akissarsiat | A |
KODA/GRAMEX-imit akiliutit | B |
Akeqanngitsumik nerisaqarnerup ineqarnerullu nalingat | A |
Eqqumiitsuliortututut akissarsiat | A |
Piginneqqaartuunersiutit | A |
Orkesterinut akiliutit | A |
Privatimik ilinniartitsisutut akissarsiat | B |
Kisermaassilluni atuinermut akiliutit (Royalty) | B |
Erinarsortartut kisimiillutillu tusarnaartitsisartut akissarsiaat | A |
Tunisaqarneq, soorlu CD-nik | B |