Atorfiit inuttassarsiukkat

Akileraartarnermut Aqutsisoqarfik Nakkutilliinermullu Suliaqarnermullu immikkoortortaqarfimmut suliassanut pikkorissumik pisortassarsiorpoq

Akileraartarnermut Aqutsisoqarfik Nakkutilliinermullu Suliaqarnermullu immikkoortortaqarfimmut suliassanut pikkorissumik pisortassarsiorpoq. 

Immikkoortortaqarfik pillugu

Nakkutilliinerup Suliaqarnerullu pingaarnertut suliassat isumagisai makkuupput akileraarutit, akitsuutit aamma akitsuusiussat iluanni suliassaqarfik; Akileraaruteqarnermut suliassaqarfimmi ingerlatseqatigiiffinnik, inuussutissarsiortunik namminersortunik sulisitsisunillu aqutsineq nakkutiginninnerlu aamma akitsuusiussanik akitsuutinullu suliassaqarfimmi aqutsineq nakkutiginninnerlu.

Immikkoortortaqarfik aaqqissuussaanikkut allaffinnut sisamanut immikkoortitigaavoq sulisut Nuummi, Qaqortumi, Ilulissani Danmarkimilu inissinneqarsimallutik. Suliffeqarfinnik ingerlatseqatigiiffinnillu Ilitsersuineq, akileraarusiineq aamma kukkunersiuineq suliarineqartarput. Nalinginnaasumik pappiaranik ilanngussanik nakkutiginninnermit nuussinermi akinik nakkutiginninnermut aamma aningaasanik peqquserluuteqarnermi malunnarunnaarsaaneq, suliaq akileraartitsisunut nalunaarutiginngitsumut, nalunaarutigineqanngitsumik sulinermut tunngatillugit immikkut ittumik nakkutiginninneq, nunani allamiut ingerlatseqatigiiffiinut akileraartussaatitaanerup aalajangersarnera il.il., nakkutiginninnerup tamaasa suliarai. 

Nunanut tamalaanut isumaqatigiissutinut kiisalu nunanit tamalaannit oqartussanut oqartussaniilu paasissutissanik paarlaateqatigiinnermut tunngatillugu suliaq oqartussaasutut piginnaasaqarluartutut immikkoortortaqarfiup isumagisarpaa.

Angalasunik tikittunik aallartunillu kiisalu nioqqutissanik eqqussinermi annissinermilu nakkutilliineq akitsuuserinermut suliassanut ilaapput. Eqqussinermut akitsuutinut aamma eqqussinermi annissinermilu nalunaarutigineqartunut tunngassuteqartut suliassat aamma allaffiup isumagisarai naatsorsuutigineqarporlu ukiap ingerlanerani akitsuutinut suliassaqarfinnik allanik nakkutiginninnermut suliassat amerlisinneqarumaartut. 

Oqartussanik allanik suleqateqarneq

Oqartussaasunik allanik immikkullu politiinik, nunat avannarliit akitsuusersuinermut oqartussaasuinik danskillu akileraartarnermut oqartussaasuinik pitsaasumik qanimullu suleqateqarpugut. Akileraartarnermut akitsuusersuinermullu allaffitsinni ukiuni makkunani politikkikkut assut tapersersorneqarluta aningaasanik peqquserluuteqarnermi malunnarunnaarsaaneq aamma suliaq akileraartitsisunut nalunaarutiginngitsut immikkut ittumik sammillugit. 

Atorfik
Immikkoortortaqarfimmi pisortatut immikkoortortaqarfimmut sulianut tunngasutigut sulisoqarnermullu tunngasunut akisussaasuussaatit. 

Qaffasissumik naammassisaqarsinnaassuseq suliassallu isumaginerani pitsaassutip qulakkeerneqarnissaat immikkoortortaqarfimmi pisortatut saniatigut akisussaaffigaat. Inatsisilerituujusariaqanngilatit, kisianni sammiviliisinnaasariaqarputit, akileraartarnermi akitsuutinullu suliassaqarfimmit aalajangiinerit inatsisitigut attanneqarsinnaasut, qarasaasianut (it) ingerlatsinermut tapiissutit naleqquttut aamma isumalluutit agguataarnerat naleqquttoq naapertorlugit, suliassat inatsisitigut aalajangikkat isumagineqarnissaannik qulakkeerinnillutit sallinngortitsisinnaasariaqassaatit. Tamanna pissaaq suleqatit, suliamut immikkut ilisimasallit aamma suleqatigisat attuumassuteqartut qanimut peqatigalugit oqaloqatigalugillu.

Suliamut aamma aqutsisinnaassusermut piumasaqaatit naatsorsuutigaarput, aqutsisuusutit misilittagalik uppernarsarneqartumik aqutsinermik piginnaasalik kiisalu pisortat ingerlatsinerannik, suliffimmik politikikkut aqunneqartumik peqqissaartumik paasinnissuseqartutit misilittagaqarlutillu aamma immikkoortortaqarfiup akisussaaffiinik tamakkiisumik ilaannakuusumilluunniit sulianik ilisimasaqartutit.

• Suliamut pineqartumut ingerlaqqittumik ilinniagaqarsimasoq

• Misissueqqissaarnermut pilersaarusiornermullu piginnaaneqarluartutit

• Anguniakkat aalajangersimasumik iliuuseqarfigineqarnissaannut aqunnissaannullu timitaliinissamut piginnaaneqartutit

Inuttut piginnaasat

Naatsorsuutigineqarpoq qinnuteqartoq nunap iluani aamma nunani tamalaani pissutsinik paasisimasaqarluartoq. Sulisussaq eqqortoq attaveqaqatigiinnermut suleqateqarsinnaanermillu sakkortuumik piginnaasaqassaaq kiisalu inuttut sunniuteqarluarsinnaaneq. Atorfimmi piumasaqaataapput erseqqissumik aqutsisinnaaneq, immikkoortortaqarfimmi eqaatsumik ingerlatsinerup qulakkeerneqarnissaanut ineriartortinnissaanut attassiinnarnerlu, aaqqissuussaanerup pisariaqartitaanik ingerlaavartumik ineriartortitsineq naleqqussaanerlu.
Tamatuma saniatigut qinnuteqartoq naatsorsuutigineqarpoq tatiginartuussutsi takutissinnaagaa, suliaminut aaqqissuussaasumik periaaseqartoq inuttullu attaviginninnermik erseqqissuunermillu pingaartitsisoq, sulinermi avatangiisinut pitsaasumik tunngaviliisut – pisortatut qaffasissulimmi ilaatigut Akileraartarnermut Aqutsisoqarfimmi sulisunut.

Neqeroorutigaavut

• Kalaallit Nunaanni Namminersorlutik Oqartussani pisortatut atorfik pissanganartoq pingaarutilillu

• Kalaallit Nunaanni nakkutilliinermi suliassap ineriartornerani sunniuteqarnissamut periarfissaq

• Sulinermi avatangiiseqarneq suleqatinik tunniusimasunik piginnaanilinnillu 

• Aningaasarsiatigut atorfinitsitaanermilu atugassarititaasut Kalaallit Nunaanni Namminersorlutik Oqartussani pisortanut isumaqatigiissut atuuttoq naapertorlugu pissapput

Ulloq atorfiniffissaq

Atorfik piaarnerpaamik imaluunniit isumaqatigiissuteqarnikkut inuttalerniarneqarpoq.

Paasissutissat sukumiinerusut
Annertunerusumik atorfik pillugu paasissutissat pineqarsinnaapput Aqutsisoqarfimmi pisortaagallartumut  Lisbeth Møller Jensen, oqarasuaat  34 52 58 maili: lsmj@nanoq.gl

Qinnuteqaateqarnissamut piffissaliussaq: 12. Oktober 2026
 

Atorfinitsitaanermi atugassarititaasut
Atorfik akissaateqarfimmi LR 38-mut naapertuuttumi maanna inissisimavoq.  Akissarsiat aalajangersimasumik agguartorneqarsimapput ukiunut aalajangersimasunut isumaqatigiissuteqarnermut tapit ilanngullugit LR 38 aallaavigalugu 1. april 2026-miit qaammammut Kr. 64.048 Kr.-upput ukiumullu 768.576.

Aallaaviatigut isumaqatigiissutini atugassarititaasut naapertorlugit atorfinitsitsisoqassaaq, qinnuteqartoq tjenestemanditut atorfeqareersimaguni nunatsinni pisortani tjenestemandit pillugit inatsisit malillugit tjenestemandinut atugassarititaasut naapertorlugit atorfinitsinneqarsinnaavoq.

Atorfimmut tunngatillugu piffissap suliffiup annertunerpaaffianik aalajangersaasoqarsimanngilaq aamma qaangiuttoornernut taarsiiffigineqarnissaq pillugu aalajangersakkat, aamma ullunut suliffiusussaanngitsunut taartisiassat pillugit aalajangersakkat atuutissanngillat, aallaavittut sapaatip akunneranut suliffigisassat akunnerit 40 tiimiupput.

Akissarsianut atorfeqartitaanermullu piumasaqaatit, taakkununnga ilanngullugit atorfinikkiartorluni soraarlunilu angalanermut aamma pequtit nassiunneqarnerinut akiliunneqarsinnaatitaaneq, Namminersorlutik Oqartussat aamma pineqartup kattuffiata isumaqatigiinniarsinnaatitaasup akornanni isumaqatigiissutit piffissami atorfiniffiusumi atuuttut naapertorlugit pissapput.

Inissaqartitsineq Atorfimmut atatillugu malittarisassat sukkulluunniit atuutsinneqartut naapertorlugit sulisunut inissiamik pequsersoringaanngitsumik innersuussisoqarsinnaavoq. Qinnuteqartut atorfitsik aqqutigalugu ineqartinneqareersut imaluunniit kommunimiit Namminersorlutik Oqartussanilluunniit pigineqartunik ineqartut inissaannik innersuussisoqarsinnaanngilaq. Ineqarnermut akiliut aamma ineqarnermut qularnaveeqqusiissutit inigisamut innersuunneqartumut malittarisassat atuuttut naapertorlugit akilerneqartassapput. Sulisutut inigisaq atorfeqarnermut atasuuvoq, atorfeqarunnaarnermilu qimanneqartussaassalluni.

Ineqarnermut akiliut aamma inissiap pitsaassusia inissiap qanga sananeqarsimanera, piginnittua il.il. apeqqutaallutik nikerarsinnaapput. Sulisutut ataavartumik initaarnissaq utaqqinarsinnaavoq, taamaattumik utaqqiisaasumik inissiisoqarsinnaasarpoq, matumani najugaqatigiiffiit minnerusut imaluunniit akunnittarfinni inissiat aamma  ilanngullugit najugaqarfigineqarsinnaallutik, taakkulu akileraarusersorneqartussaapput. Sulisunut inissiami imaluunniit utaqqiisaasumik inigisami uumasuutit anginerusut, soorlu qimmit qitsuilluunniit, uumasuutigineqaqqusaanngillat.

Qinnuteqaat, CV, ilinniarsimanermut aamma pikkorissarsimanermut uppernarsaatit aamma pappiaqqat allat pingaaruteqartut "Qinnuteqaat nassiuguk" toorlugu nassiutikkit.
Mailikkut qinnuteqaatinik tigusineq ajorpugut.

Saaffigisassaq:

Lisbeth Møller Jensen lsmj@nanoq.gl +299 34 52 58

Piffissaliussaq: 2026-10-12

Atorfinitsitsinerup suussusaa: Piffissaq tamakkerlugu suliffik

Atorfinitsitseriaaseq: Isumaqatigiissutit tunngavigalugit piumasaqaatit

Suliassaqarfik: Aqutsineq

Nunap immikkoortua: Kommuneqarfik Sermersooq, Nuuk

Sulisitsisut allattorsimaffianut immikkoortortaqarfimmi aqutsisoq

Akileraartarnermut Aqutsisoqarfimmi immikkoortortaqarfimmi aqutsisoq atorfik inuttassarsiuunneqarpoq 1. november 2026 immikkulluunniit isumaqatigiissuteqarnikkut sulilersussamik.

Sulinermi aaqqissuussaanermik inissisimaneq:

Atorfik Nuummi Akileraartarnermut Aqutsisoqarfiup Aningaasaqarnermut immikkoortortami, sulisitsisut allattorsimaffiat inissisimavoq.

Suleqatigiinni sulisitsisut allattorsimaffiani 3-suugallarput ilinniartorlu ataaseq. 

Sulisitsisut allattorsimaffiat akisussaasuuvoq sulisitsut sulisumi akissarsiat nalunaarutigineqarnissaat, ulluinnarni oqarasuaatikkut imaluunniit mail-ikkut sulisitsisunik attaveqartarneq.

Taamaammat pingaaruteqarpoq, illit qinnuteqartoq saaffiginnittut qitiutillugit ullormut ulapaarfiusinnaasumi oqaloqatiginninnissamut allattariarsornikkullu pikkoriffeqarnissat aammalu allanik suleqateqarsinnaaneq aaqqiissutissarsiorsinnaassusseqarlutillu piumassuseqarlutillu piginnaasaqarnissat.
Akileraartarnermut Aqutsisoqarfik nunatsinni akileraartarnermut qullersaqarfiuvoq ulluinnarni suliassaralugit akileraaruserineq, akitsuuserineq aamma akiliisitsiniarneq.
Sulisitsisut allattorsimaffiat Akileraartarnermi Aqutsisoqarfiup aaqqissuunneqarfiani Aningaasaqarnermut immikkoortortaqarfiani inissisimavoq.

Pisortatut makku pingaarnertut suliassarivatit:

• Immikkoortortaqarfimmi pisortatut akisussaaffik siulersorlugu allaffissornikkut suliassat sulisitsisuniit qaammammut aammalu ukiumut nalunaarsukkat.

• Isumagisussaallugu sullissinermi pitsaassutsimigut, sullerissusikkut aamma isumannaatsumik sivikinnerpaamillu immikkoortortaqarfiup suliariarisartagai suliarineqarnissai.

• Sammisaqarfimmi sulisitsisut sullinneqarnissai qulakkeerniassallugit eqqortumik nalunaaruteqarnissaat aammalu qarasaasiatigut system-it atorneqarnissaannik eqaallisaaqataassallutit.

• Sammisaqarfiup sulisitsisuniit nalunaarsukkat naligiissaassallugit, sulisitsisut ingerlalernerani aammalu sulisitsisutut taamaatittut nalunaarneri, saaffiginnittunut sullissinerit, oqarasuaatikkut aammalu qarasaasiakkut allakkat isaasut, nukingisaarutinik ingerlatsineq.

• Nalunaarutini kukkunilinnik misissuineq (cpr.nr.)

• Elektronisk-imik akileraarutit allagartaanik pilersitsiniarnermi peqataasarneq.

• Aningaasanik pisassaqalernermi misissuineq (Kreditsaldo)

• Qallunaat nunaannut akileraarutinik nalunaaruteqarneq aammalu akiligassartaanik isumaginninneq.

• Sulisitsisunut ilitsersuineq

• Akileraartarnermi Aqutsisoqarfiup qarasaasiakkut suleqatigisartagaannut attaveqartarneq

• Suliassat nalinginnaasut saniatigut allanut suliassanut peqataasarnissaq, immikkoortortaqarfiillu allat akimortumik suleqatigisarnissai.

Allaffimmi aqutsisoq qaninnertut aqutsisorissat.

Piginnaasat:

• AU imaluunniit allaffimmiutut ilinniarsimasuussaatit, aammalu misilittagartuunissat.

• Qarasaasiatigut sullissinissamik pikkoriffeqassaatit

• Sullisserusussuseqarnissaq, namminersorlutit sulisinnaanissat, peqataalluartuunissat aalajaallutillu akisussaafeqarnissat aammalu suleqatikkuminartuunissat.

• Qiimasuunissaq avammullu attaveqarluartuuneq

• Allattariarsornikkut oqaluttariarsornikkullu pikkoriffeqarnissat, kalaallisut oqalussinnaaneq, qallunaatut tuluttullu iluaqutaassaaq.

• Ulapaarfinni sulianik tulleriiaarilluarsinnaasoq

• Suliassaqarfimmut, inatsisinut aammalu naatsorsuuseriaasermut nalunngisaqarnissaq

• Excel regneark, word il.il. nalunngisaqarnissaq

Atorfik pillugu saaffiginniffissaq:

Allaffimmi Aqutsisoq Charlotte R. Lyberth saaffigineqarsinnaavoq, oqarasuaat toqqaannartoq 34 65 14, e-mail: cly@nanoq.gl

Qinnuteqaat:

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

Piffissaq qinnuteqarfissarititaasoq kingulleq: 

Qinnuteqaat Akileraartarnermut Aqutsisoqarfimmut kingusinnerpaamik tigoreersimassavarput 14. Oktober 2026.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Qinnuteqartoq uppernarsaatitalinnik piginnaasalik immikkut siunnersortitut, siunnersortit pisortaatut siunnersortaanertulluunniit isumaqatigiissutit naapertorlugit atorfinitsinneqarsinnaasarpoq.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

Atorfiup suussusaa: Sulisitsisut allattorsimaffianut immikkoortortaqarfimmi pisortassarsiorneq

Suliffeqarfik: Akileraartarnermut Aqutsisoqarfit

Qinnuteqarfissamut killigititaq: 14. oktobari

Attavissaq: Charlotte R. Lyberth

cly@nanoq.gl

+299 34 65 14

Akileraarusersuisarneq innuttaasunut suliffeqarfinnullu nuannaarutaasussanngorlugu paasiuminarnerutilerusuppiuk?

Akileraartarnermut Aqutsisoqarfik innuttaasunut suliffeqarfinnullu ikiuerusulluinnartumik attaveqaqatigiittarnermut tunngatillugu suleqatissarsiorpoq. Attaveqaqateqartarnerput amerlasuutigut teknikkiullunilu oqaasertatigut paasiuminaangaatsiarsinnaasarpoq. Attaveqaqateqarnermi sulisumik innuttaasut suliffeqarfiillu aamma uagut suliatigut attaveqartarnitta akornanni aqqutissiuussisinnaasumik pisariaqartitsivugut

Akileraartarnermut tunngatillugu ilisimasalissuusariaqanngilatit, tassa alapernaassuseqarlutillu suliassamut tunngatillugu ilikkagaqarusussuseqarnerit naammappoq. Suliatigut piginnaasatit aamma nutaaliornikkut pisinnaasatit inissaqartissavavut, aamma attaveqaqatigiittarnermut tunngatillugu nutaaliornissaq eqqarsaatigalugulu misilerarsinnaavarput. Assersuutigalugu filmiliornermik aamma titartakkanut tunngassutilinnik suliaqarsimavugut, illillu isumassarsiannut tusarnaarnissamut piareersimalluta.

Ullormi assigiinngitsunik suliaqartarnissat naatsorsuutigisinnaavat. Akileraartarnermut Aqutsisoqarfiup aaqqissugaanerani nutaarsiassaniit tusagassiorfitsigut nalunaarutissatut missingiummut, allakkanik innuttaasut e-Boksikkut tigusartagaannik kukkunersiuineq, suliffeqarfinnut ilitsersuutit, Innuttaasunik kiffartuussivimmi akitsuutinik nalunaaruteqarnissamut imaluunniit suliniutinik ineriartortitsinissamut atugassiissutinik ineriartortitsineq. 

Suliffimmi nutaaliortarnerup saniatigut suliassat ilarpassui ingerlatsinerup qulakkeerneqarnissaanut tunngassuteqassapput.  Ilaatigut Akileraartarnermut Aqutsisoqarfiup nittartagaata nutarterneqartarnissaa aamma Facebookitta innuttaasunut suliffeqarfinnullu maanna attuumassutigisaannut naapertuuttuunissaata qulakkeerneqarnissaat akisussaaffigissavatit.

Attaveqaqateqarsinnaanivit saniatigut suliniutinik aamma aqutsisinnaaguit piginnaasavit taakku atornissaat aamma periarfissarissavat.

Akileraartarnermut Aqutsisoqarfimmi aqutsisoqatigiinnut ilaassaatit. Aqutsisoqatigiit assersuutigalugu IT pillugu suliniutinik aqutsinissap inatsisilerinerullu iluini assigiinngitsunik piginnaasaqartuupput. Sulisut aqutsisut peqatigalugit Akileraartarnermut Aqutsisoqarfimmut siunnerfilersuillutillu suliniutit naammassineqarnissaat isumagisarpaat. Suleqatigiit akunnitsinni aamma Akileraartarnermut Aqutsisoqarfimmi sulisut allat peqatigalugit suleqatigiilluartarpugut. 

Suliassat pingaarnerit

• Akileraartarnermut Aqutsisoqarfiup avammut attaveqartarneranut ikiuuttarneq: nittartagaq, SoMe, allakkat, allagartarsui, digitalimik atuisarneq, innuttaasunut suliffeqarfinnullu ilitsersuutit, immersugassat il. il..

• Akileraartarnermut Aqutsisoqarfiup iluani attaveqaqatigiissitsineq; Akileraartarnermut Aqutsisoqarfik nuna tamakkerlugu Aalborgimilu 100-t sinnerlugit sulisoqarpoq. 

• Akileraartarnermut Aqutsisoqarfimmit saqqummiussassanik allaganngortitsineq aamma aqutsisut suleqatillu suleqatigalugit tusagassiorfinnik allanik oqaloqateqartarneq. 

• Innuttaasut suliffeqarfiillu ataatsimeeqatigiittarnerannik nukittorsaanerup saniatigut Akileraartarnermut Aqutsisoqarfimmi suleqativit ataatsimeeqatigineqartarnerannik nukittorsaaneq.

Illit pillutit 

Naapertuuttumik ingerlaqqiffiusumik ilinniagaqarputit imaluunniit suliffeqarfiit sinnerlugit attaveqartarnermik suliaqarnermi piffissami sivisuumi misilittagaqarputit.

Kalaallit Nunaanni pissutsinik ilisimasaqarluaruit iluaqutaassaqaaq. Innuttaasunik suliffeqarfinnillu paasinnissinnaassaatit aamma taakku pisariaqartitaat aallaavigalugit oqaloqatiginnissinnaassaatit. 

Pingaartipparput illit:

• Attaveqaqatigiittarnerup iluani qaffasissumik piginnaasaqarnissat. Sullinniakkat sorliit oqaloqatigisarnerivut, oqariartuutiginiakkat sumut tunnganersut, paasissutissat erseqqissuunissaat eqqortuunissaallu aamma attaveqaqatigiittarnermi tunngaviusumik piginnaasaqarfiit allat paasisimasaqarfigivatit.

• Suliassanik naammassineqartussanik arlalinnik misilittagaqarputit; nittartagaq, tusagassiorfiit, oqaasertaliussat il. il..

• Suleqatigiit ilaattut sulilluarsinnaavutit. Aammali namminersorsinnaallutit.

• Erseqqissumik oqaaseqarsinnaavutit – allatullu isumalinnut tusarnaarsinnaallutit.

Kalaallisut, danskisut tuluttullu piginnaasaqarfigigukkit iluaqutaassaaq.

Inuttut piginnaasat

• Suleqatikkuminartoq aamma suliffeqarfimmi assigiinngitsutigut suliaqarsinnaasoq. Tamanna aqutsisoqatigiinni Akileraartarnermullu Aqutsisoqarfiup sinnerani atuuppoq.

• Akisussaassuseqartoq aaqqiissuteqarsinnaasorlu.

• Ulloq suliffiusussaq aaqqissuussaasumik nammineertumillu ingerlassinnaavat pilersaarusiorsinnaallugulu, kingusinnerusukkut malitseqartillugulu uppernarsarneqarsinnaasumik.

• Suliannut tunniussimasuuvutit suliatigullu ineriartorusullutit. 

Akissarsiat atorfeqarnermilu atugassarititaasut                                                                                                         
Akissarsiat atorfeqarnermilu atugassarititaasut, taakkununnga ilaallutik atorfininnermi soraarnermilu angalanissamut kiisalu pisattat nassiunneqarnerini aalajangersakkat aallaavigalugit Namminersorlutik Oqartussat sulilertussallu kattuffiata isumaqatiginninniarsinnaatitaasup akornanni isumaqatigiissutit atorfininnerup nalaani atuuttut naapertorlugit pissapput.
Qinnuteqartunut piginnaasanik eqqortunik uppernarsarneqarsinnaasunillu pigisalinnik isumaqatigiissutit atuuttut malillugit immikkut siunnersortitut, siunnersortit pisortaattut imaluunniit siunnersortaanertut atorfinitsitsisoqarsinnaavoq.

Ineqarneq
Atorfimmut atatillugu sulisut inissaannik innersuussisoqanngilaq. Qinnuteqartoq Namminersorlutik Oqartussani atorfeqarnini aqqutigalugu sulisutut ineqareeruni sulisutut inissiamik innersuussivigineqarnissamut pisinnaatitaaffik attatiinnarneqassaaq Sulisutut inigisaq atorfeqarnermut atasuuvoq, atorfeqarunnaarnermilu qimanneqartussaassalluni.

Qinnuteqaat, CV, ilinniakkanut pikkorissarnernullu uppernarsaatit, kiisalu allagaatit attuumassutillit “Qinnuteqaat nassiuguk” toorlugu nassiunneqassapput. 
Mailikkut qinnuteqaatinik tigusineq ajorpugut.

Attaveqarfissaq:

Lisbeth Møller Jensen lsmj@nanoq.gl  +299 34 65 10

Kingusinnerpaamik tunniussiffissaq: 14. oktober 2026

Atorfinitsitsinerup suussusaa: Piffissaq tamakkerlugu suliffik

Atorfinitsiteriaaseq: Isumaqatigiissutit tunngavigalugit piumasaqaatit

Suliarisartakkat: Attaveqaqatigiinneq

Nunap immikkoortua: Kommuneqarfik Sermersooq