Nunat tamalaat akornanni suleqatigiinneq

Akileraartarnermut Aqutsisoqarfik nunani allani oqartussaasunut arlalinnut isumaqatigiissuteqartarsimavoq. Isumaqatigiissutit uani atuarsinnaavatit. Isumaqatigiissut kalaallisut allassimanngippat, kalaallisut nutserneqareerpat nutserneqarneratalu pitsaassusaa qulakkeerneqareerpat nittartakkami matumani saqqummiunneqassaaq.

Isumaqatigiissutit Kalaallit Nunaata nunallu allat akornanni imaluunniit nunat arlallit akornanni isumaqatigiissutigineqartarput – assersuutigalugu Nunat Avannarliit akornanni imaluunniit Europami suleqatigiinnermi. Kalaallit Nunaat nunat 100-it sinnerlugit amerlassusillit peqatigalugit nunat arlallit akornanni atuuttunik isumaqatigiissuteqartarsimavoq.

Kalaallit Nunaat arlalinnik isumaqatigiissuteqarsimavoq. Taakkunannga affaasa missai siammasissumik annertuumik atuuffeqarput affaasalu sinnerisa atuuffii killeqarput, assersuutigalugu timmisartuussinernut, umiarsuartigut angallassinernut aatsitassarsiornermullu tunngasuupput.

Marloriaammik akileraarnissaq pinngitsoorniarlugu isumaqatigiissutit
Marloriaammik akileraarnissaq pinngitsoorniarlugu isumaqatigiissutit (MAI) isertitat pigisallu nalillit nunat tamalaat akornanni Marloriaammik akileraarnissaq pinngitsoorniarlugu nunat marluk amerlanerilluunniit akornanni isumaqatigiissutaavoq. Marloriaammik akileraarnissaq pinngitsoorniarlugu isumaqatigiissutip siunertaasa pingaarnersaaraat akileraarutaasartut avinneqartarnissaat aammalu nunamut sorlermut akileraartarnissat nunat isumaqatigiissummi ilaasut akornanni aalajangersaaffigineqartarnissaat kiisalu naapertuutinngitsunik pisoqartarnerisa pinaveersaarneqartarnissaat, akileraartartut piginnaatitaaffiisa qulakkiikkamik malinneqartarnissaat kiisalu akileraanngitsoortarnerit pinngitsoortinnissaat.

Akileraartarnermi paasissutissanik paarlaasseqatigiittarnissamik isumaqatigiissut
Kalaallit Nunaat paasissutissanik inatsisitigut pisussaaffinnut piginnaatitaaffinnullu tunngasunik nassitsisarlunilu tigusaqartarpoq, tamakkulu pillugit akileraartarnermi paasissutissanik paarlaasseqatigiittarnissamik isumaqatigiissuteqarluni. Inuit ataasiakkaat suliffeqarfiilluunniit nunani assigiinngitsuni attuumassuteqarlutillu suliaqartut pillugit akileraartarnikkut paasissutissanik nunat akunnerminni paarlaasseqatigiittarsinnaanissat isumaqatigiissuteqarnikkut qulakkeerneqartarpoq.

Isumaqatigiissutit
Ikioqatigiinnissamik isumaqatigiissutit nunat akornanni oqartussaasut suliaminnik ingerlatsinermut atatillugu imminnut ikioqatigiinnissaminnik isumaqatigiissuteqarnerannut tunngasuupput.