Danmarkimi ilinniagaqartut
Indhold
Kalaallit Nunaat aamma Danmark marloriaammik akileraarnissaq pinngitsoorniarlugu isumaqatigiissummik, kalaallit Danmarkimi ilinniagaqartut akileraartarnerat pillugu aalajangersaaffiusumik atsioqatigiinnikuupput. Isumaqatigiissutip kinguneraa Kalaallit Nunaannut tamakkiisumik akileraartussaanerup, Danmarkimi najugaqarneq ilinniarnermik/ilinniagaqarnermik pissuteqarpat kipinani ingerlaannarnissaa, naak taassuma ilutigisaanik Danmarkimut tamakkiisumik akileraartussaaneq aamma atuukkaluartoq.
Ilinniagaqarnersiutinik Kalaallit Nunaanniit pisaruit, taakku tassaapput aningaasarsiat B-t akileraaruteqaataasussat.
Danmarkimi SU-nik (Statens Uddannelsesstøtte) pisaruit, taakku Danmarkimi akileraaruteqaataasussaapput.
Kalaallit Danmarkimi ilinniagaqartutut isigineqartut tassaapput:
inuit ilinniagaqarnersiutinik Kalaallit Nunaanni maleruagassat malillugit pisartut imaluunniit danskit SU-inik pisartut, aammali tassaallutik inuit soorlu nammineq aningaasarsiaqarnertik (ilinniartutut akissarsiaqarnertik) pissutigalugu ilinniagaqarnersiutinik taakkuninnga pisinnaanngitsut, kisiannili ilinniagaqartuunermi piumasaqaatinik naammassinninnermikkut ilinniagaqarnersiutinik tunineqarnissamut piumasaqaatinik naammassinnittut.
inuit ilinniarnerminni, ilinniagaqarnerminni, pikkorissarnerminni assigisaalluunniit pissutigalugu Kalaallit Nunaanniit akissarsianik assigisaannilluunniit pisartut, soorlu lærlingit, årskursusertut (ilinniartitsisut il.il.) aammalu allat ilinniagaqarnerminni/pikkorissarnerminni Kalaallit Nunaanni sulisitsisumit, matumani aamma Naalagaaffiup Kalaallit Nunaanni suliffeqarfiutaanit akissarsiaqartinneqartut.
inuit, inatsit isumaqatigiissulluunniit immikkut ittoq napertorlugu ilinniagaqarnermi tapiissutinik (Kalaallit Nunaanniit) pisartunik angajoqqaallit.
Ilinniagarisap/ilinniakkap/pikkorissarnerup assigisaataluunniit pitsaassusissaanut qanorluunniit annertutiginissaanut immikkut piumasaqaateqartoqanngilaq. Maleruagassani pineqartunut ilaapput tunngaviusumik ilinniagaq, taassuma kingorna ilinniagaq aamma ingerlaqqiffiusumik ilinniagaq kiisalu kingusinnerusukkut ilinniagaajunnartoq alla. Aammattaaq piumasaqaataanngilaq ilinniagaqartup ilinniarnissani/ilinniagaqarnissani/pikkorissarnissani sioqqullugu Kalaallit Nunaanni najugaqartuunissaa, imaluunniit Danmarkimi najugaqarnerata ilinniarnerinnarmik ilinniagaqarnerinnarmilluunniit siunertaqarnissaa.
Ilinniagaqarnersiutinik Kalaallit Nunaannut qinnuteqarlutillu akuerisaasimaguit, taava ilanngaatissatit ukuupput:
Inummut ilanngaat nalinginnaasoq: Kr. 60.000 (2026-mi)
Ilinniagaqartutut ilanngaat: Kr. 49.700 (2024-mi) MALUGIUK: QINNUTIGINEQASSAAQ.
Naalagaaffeqatigiinnermi ilanngaat: Kr. 36.000MALUGIUK: QINNUTIGINEQASSAAQ.
Kalaallit Illuutaat Danmarkimiittut qinnuteqaammik suliaqarnermi amerlasuutigut ikiuussinnaasarput.
Danmarkimi ilinniagaqartutut immikkut eqqumaffigisassatit tassaapput:
Ilanngaatigisinnaasavit qinnutiginissaat.
Danmarkimi eqqortumik akileraartinneqarnissat qulakkeerniarlugu Danmarkimi siumoortumik nalunaarsuinissaq.
Kalaallit Nunaanni eqqortumik akileraartinneqarnissat qulakkeerniarlugu Kalaallit Nunaanni siumoortumik nalunaarsuinissaq. Tamanna immikkut pingaaruteqarpoq Kalaallit Nunaanni aningaasarsiaqaruit, soorlu feriarnermi suliffeqarnikkut.
Kalaallit Danmarkimi ilinniagaqartut akileraartinneqarnerat pillugu ilitsersuut una Akileraartarnermut Aqutsisoqarfiup 2019-imi atulersippaa.