Nr. 1, 05.03.1980-imeersoq, (...) aalajangersakkanik unioqqutitsinermi pisortatigoortumik akiliisitsinissamik aalajangiisoqartarnera pillugu

Aningaasarsianit akileraarutit pillugit Inatsisartut inatsisaanni kapitali 10-mi aalajangersakkanik unioqqutitsinermi pisortatigoortumik akiliisitsinissamik aalajangiisoqartarnera pillugu Akileraartarnermi Pisortaqarfiup kaajallaasitaa⁽¹⁾ nr. 1, 5. marts 1980-imeersoq.

Naalakkersuisut aningaasarsianit akileraarutit pillugit Inatsisartut inatsisaanni § 108 naapertorlugu Skatterådip inassuteqarneratigut inatsimmi kapitali 10-mi aalajangersakkanik unioqqutitsinermi pisortatigoortumik akiliisitsinissamik aalajangiisarnermi malittarisassiat imaattut aalajangersarsimavai:

1. Piaaraluneerluni unioqqutitsinermi akiliutissat aalajangerneqartassapput nalinginnaasumik tassaatillugit akileraarutissaagaluit ilaasa akilinngitsuukkat pingasoriaataat.

Annertuumik mianersuaalliornermi akiliutissat aalajangerneqartassapput nalinginnaasumik tassaatillugit akileraarutissaagaluit ilaasa akilinngitsuukkat 1½-eriaataat.

Pineqartup "imminik nassuertutut" isigineqarsinnaaffiini, tak. pinerluttulerinermi Kalaallit Nunaannut inatsimmi § 88, nr. 8, akiliutissat -iminnut ikilisinneqartassapput.

Unioqqutitsineq tassaagaangat aningaasarsiat ilaasa ukiumit aningaasarsiorfimmit allamut pisinneqarnerat akiliutissat nalinginnaasumik aalajangerneqartassapput piaaraluneersoqartillugu tassaatillugit akileraarutissaagaluit ilaasa akilinngitsuukkat 1½-eriaataat annertuumillu mianersuaalliortoqaraangat tassaatillugit ¾-ii.

2. Aningaasarsiat nikingassutaat 9.999 koruunit tikillugit annertussuseqaraangata akiliutissat aalajangerneqartassapput piaaraluneersoqartillugu tassaatillugit akileraarutissaagaluit ilaasa akilinngitsuukkat 1½-eriaataat annertuumillu mianersuaalliortoqaraangat tassaatillugit ¾-ii.

Akiliutissat hundrede koruuninut qaninnerpaanut ammut akunnaallineqartassapput.

Nikingassutit assigiinngitsut arlaliugaangata akileraarutit akiliisitsissutaasussat naatsorsorneqarneranni imaaliortoqartassaaq:

a) siullermik ilanngunneqassapput nikingassutit akisussaasussanngortitsinngitsut,

b) taava ilanngunneqassapput nikingassutit annertuumik mianersuaalliornermik pissuteqartut taavalu

c) ilanngunneqassapput nikingassutit piaaraluneernernik pissuteqartut.

3. Akiliutissat 1.000 koruuninit ikinneruppata suliassaq inerneqarsinnaavoq pineqartup ima nalunaarfigineqarneratigut: unioqqutitsisoqarnera paasineqarsimasoq pisimasullu tunngavigalugit qanoq iliuuseqaqqittoqassanngitsoq, kisiannili unioqqutitsisoqaqqinnerani akisussaatitsiniartoqarumaartoq.

Akiliutissat maleruagassiat qulaaniittut malillugit naatsorsorneqartut 50.000 koruuniuppata taakkunanngaluunniit amerlaneruppata suliassaq eqqartuussisunut suliassiissutigineqassaaq.

Pineqartoq pinerluttulerinermi Kalaallit Nunaannut inatsimmi § 88, nr. 8 naapertorlugu "imminik nassuertutut" isigineqarpat suliassaq, nikingassutit annertussusii soqutiginagit, pisortatigoortumik aalajangiivigineqassaaq.

4. Akileraartarnermi Pisortaqarfik piginnaatinneqarpoq malittarisassiat siuliiniittut malillugit eqqartuussisutigoortitsinertaqanngitsumik akiliisussanngortitsiniarsinnaanissamut.

5. Kaajallaasitaq ukioq aningaasarsiorfik 1980 aallarnerfigalugu atulerpoq.

1. Saqqummersinneqarnermini "nalunaarummik" taaguuteqartinneqarsimasoq.