Kalaallit Nunaat akileraarutinik akiliinngitsoorniartarnerit aammalu akileraarutikinnerusunut nuuttarnerit pitsaaliornissaannik nunat tamalaat suleqatigiinneranni ilaavoq. Malittarisassanik nunani tamalaani najoqqutarineqartussanik suliaqartarneq aammalu nunani ataasiakkaani atuutilersitsisarnerup eqqortumik ingerlanissaanik nakkutilliisarneq Aningaasaqarnikkut Suleqatigiinnermi Ineriartortitsinermilu Suleqatigiiffimmit (OECD) annertuutigut ingerlanneqartarput. Kalaallit Nunaat malittarisassanik nunani tamalaani najoqqutarineqartussanik naammassinninnissamut pisussaaffeqarpoq, tassungalu atatillugu OECD-p ataani suleqatigiinnermut aaqqissuussaaffinnut marluusunut ilaasortanngorsimalluni, tassa Global Forum on Transparency and Exchange of Information aamma Inclusive Framework on Base Erosion and Profit Shifting (BEPS).
Taassuma saniatigut Kalaallit Nunaat, nunani avannarlerni suleqatini qanimut suleqatigalugit akileraartarneq pillugu paasissutissanik paarlaasseqatigiittarnermut, nunat tamalaat akileraanngitsoorniartarnermik akiuiniarneranni kiisalu akitsuusersuinerup iluani suleqatigiinnermi peqataavoq. Suleqatigiinneq nunat marluk illugiillutik aammalu nunat amerlanerusut akunnerminni suleqatigiinnerattut, isumaqatigiissutit naapertorlugit pisarpoq. Nunat avannarliit ataatsimoorussamik suleqatigiinneranni tunngavissat pingaartumik Nunani Avannarlerni Ministerit Siunnersuisoqatigiivini aammalu Nunat Avannarliit Siunniussaanni atulersinneqartarput.