Akit nammineq aalajangersarlugit nuussinerit

Suliffeqarfiit soqutigisamikkut imminnut attuumassuteqartut akornanni nioqqutissanik, sullissinernik imaluunniit pigisanik tigussaasuunngitsunik nuussinermi akinik aalajangersaasarneq akit nammineq aalajangersarlugit nuussisarnerup ilisarnaatigaa.

Akit nammineq aalajangersarlugit nuussisarneq nakkutigisassaalluinnarpoq, tassami suliffeqarfiit akileraartussaanerannut sunniuteqarlunilu nunat killeqarfii apeqqutaatinnagit aningaasarsiorluarsinnaanermik periarfissiimmat. Akinik aalajangersaaneq eqqunngitsumik pippat tamanna akileraartarnerup tungaatigut ajornartorsiutinik kinguneqarsinnaavoq, soorlu akileraartarnikkut suliassanngornermik, pillaammik akiliisinneqarnermik ernianillu akiliisinneqarnermik.

Illua´tungeriit imminnut attuumassuteqanngitsut niueqatigiinneranni tunisaqartup akimik sapinngisamik qaffasinnerpaamik angusaqarnissani soqutigisarisarpaa, illua´tungaanilu pisisup sapinngisamik akikinnerpaamik akiliinissani soqutigisarisarlugu. Tamaaliornerup kingunerisarpaa niuernerup, niuernermi atugassarititaasut malillugit pisarnera. Illua´tungeriit soqutigisamikkut imminnut attuumassuteqartut niueqatigiinneranni soqutigisat suunerisa imminnullu assortuunnerisa paasinissaat qulakkeerneqarsinnaanngilaq, taamalu niuernerup aaqqissuussaanera nalinginnaasoq atuutinngitsoorsinnaalluni.

Akit nammineq aalajangersarlugit nuussisarneq pillugu maleruagassat Kalaallit Nunaanni akileraartarnermut inatsimmi § 36 a-miit d-mut allaqqapput.

Inatsit suliffeqarfinnut tamanut atuuppoq. Taamaattorli suliffeqarfiit mikinerusut uppernarsaateqartussaanermi pineqartunut ilaanngillat. Suliffeqarfiit 250-init ikinnerusunik sulisoqartut aammalu naatsorsuutit inerneri malillugit ukiumut katillugit 125 mio.kr.-inik pigisaqartut imaluunniit ukiumut 250 mio.kr.-inik kaaviiaartitaqartut killilimmik uppernarsaateqartussaallutilluunniit uppernarsaateqartussaanngillat.

Suliffeqarfiit mikinerusut nunanik Kalaallit Nunaata marloriaammik akileraarnissaq pinngitsoorniarlugu isumaqatigiissuteqarfigisaanik niueqateqartut allakkatigut uppernarsaateqartussaanngillat. Suliffeqarfiilli mikinerusut illua´tungerisaminnik soqutigisatigut attuumassuteqarfigisaminnik makkuninnga niueqateqartut killilimmik uppernarsaateqartussaapput:

• Inuk suliffeqarfilluunniit nunami Kalaallit Nunaata marloriaammik akileraarnissaq pinngitsoorniarlugu isumaqatigiissuteqarfiginngisaani angerlarsimaffeqartoq.
• Aalajangersimasumik ingerlatsivik nunami Kalaallit Nunaata marloriaammik akileraarnissaq pinngitsoorniarlugu isumaqatigiissuteqarfiginngisaani inissisimasoq.
• Suliffeqarfik nunami Kalaallit Nunaata marloriaammik akileraarnissaq pinngitsoorniarlugu isumaqatigiissuteqarfiginngisaani angerlarsimaffeqartoq, peqatigisaanillu Kalaallit Nunaanni aalajangersimasumik ingerlatsiveqartoq.

Uppernarsaateqarnissamik piumasaqaat

Suliffeqarfiit tamakkiisumik uppernarsaateqartussaasut uppernarsaatissaat nalunaarutinik marlunnik imaqarpoq. Nalunaarut ataaseq (Master file) suliffeqarfissuarmut tunngavoq, tassa suliffeqarfik Kalaallit Nunaanni akileraartussaasoq kisiat pinnagu, suliffeqarfissuarli selskabinik il.il. Kalaallit Nunaata avataaniittunik amerlasuunik ingerlataqartuusinnaasoq tamaat pillugu. Nalunaarutip aappaa (Local file) ilanngussanik ilaqartinneqartoq suliffeqarfimmut Kalaallit Nunaanniittumut kiisalu nuussinernut aalajangersimasunut, suliffeqarfiup immersugassami S 40-mi allattorsimasaanut tunngavoq. Allatut oqaatigalugu, nalunaarut suliffeqarfiup akit nammineq aalajangersarlugit nuussinerit pillugit maleruagassanik eqquutsitsiniarluni iliuuserisimasaanik, imaappoq nuussinerit suulluunniit allanit akuliuffigineqanngitsumik pisimanerannik imaqarpoq. Suliffeqarfiuttaaq suliarissavaa sanilliussilluni nalunaarusiaq, suliffeqarfiit assingusumik ingerlataqartut sanilliunneqarsinnaasut pillugit paasissutissanik imalik. Nakkutiginiarneqarpoq iluanaarutinik sanilliussinissaq. Isumaavoq suliffeqarfiit imminnut sanilliunneqarsinnaasut assigiimmik ingerlatsillutik, pigisaminnik atugassiissuteqarlutik aammalu niuernermi allatulli annaasaqaratarsinnaallutik inissisimasut assigiikannersunik iluanaaruteqartariaqarnerat. Taanna FAR (Ingerlatsineq, Pigisat, Annaasaqaratarsinnaaneq) pillugu misissueqqissaarnermik taaneqartarpoq.

Suliffeqarfiit tamakkiisumik uppernarsaateqartussaanermi pineqartut, akit nammineq aalajangersarlugit nuussinerit pillugit uppernarsaatinik ukioq aningaasarsiorfiusoq 2023 aallarnerfigalugu Akileraaruseriffimmut pinngitsooratik nassiussisussaatitaapput. Tamanna nammineerluni nalunaarsuiffimmik nassiussinissamut piffissaliussap kingorna kingusinnerpaamik ullut 60-it qaangiunneranni pissaaq.

Akit nammineq aalajangersarlugit nuussinerit pillugit nammineerluni nalunaarsuiffimmut ilanngussaq, tak. akileraartarnermut inatsimmi §§-it 36 a-miit d-mut

Ilanngussaq uani aajuk 

Ilanngussaq uani aajuk