EU-mut tunisaqartarneq - Akitsuusersuineq
Indhold
Suliffeqarfinnut EU-mut tunisaqartartunut
Avammut tunisaqartartunik nalunaarsuinissamut EU-mi aqutsissut nutaaq
Kalaallit Nunaat Avammut tunisaqartartunik nalunaarsuinissamut EU-mi aqutsissummut nutaamut (REX) 1. januar 2020-imi ikaarsaassaaq. Tamanna pissutigalugu nunasiaataasimasuni aaqqissuussaq (OLT) naapertorlugu Kalaallit Nunaanni EU-mut akileraarutitaqanngitsumik avammut tunisaqartartut EU-mi nunanut akileraarutitaqanngitsumik tunisisarnertik attatiinnassappassuk “avammut tunisisartut allattorsimaffiannut” akuerineqassapput.
Nioqqutissat uppernarsaataat EUR.1 atortarussiuk imaluunniit akiligassat allagartaat EU-mut nioqqutissamik nassiussinermi “avammut tunisisartut allattorsimaffiannut” akuerineqarsimaneq tunngavigalugu naammassisarussigit, aqutsissut REX-imut nalunaarsorneqarnissamut qinnuteqassaasi.
Aqutsissut-REX 1. januar 2017-imi EU-mi atuutilerpoq, taannalu nioqqutissat suminngaanneernerinik uppernarsaanissamut qarasaasiatigut aqutsissutaavoq. Aqutsissut-REX-ip atulersinneqarneratigut ilissi avammut tunisaqartartusi nioqqutissap suminngaanneerfia pillugu pisisartut toqqaannartumik ilisimatittassavasi. Taamaaliornikkut Kalaallit Nunaanni EU-milu nunani oqartussat suminngaanneerneranik uppernarsaammik piumasoqartoqartillugu akuliutissaassapput. Allannguisoqarneratigut Akileraarnermut ingerlatsiviup OLT-mut aaqqissuussamut atatillugu EUR.1 pillugu uppernarsaatinik tunniussisarneq taamaatissavaa. Avammut tunisisartunut akiligassat allagartaanik tunniussisartunut “avammut tunisisartut allattorsimaffiannut” akuerineqarsimaneq tunngavigalugu naammassinnittartunut , akuersissut OLT-mut aaqqissuussamut atatillugu “avammut tunisisartut allattorsimaffiannut” akuersissummik taarserneqassaaq.
Januar 2020-mit allannguutit
Kalaallit Nunaat nioqqutit suminngaanneerneranik uppernarsaanissamut EU-p qarasaasiatigut aqutsissutaanut (Avammut tunisisartut nalunaarsorsimasut aqutsissutaat – REX) ilannguppoq.
OLT-mut aaqqissuussamut atatillugu EU-mut tunisisarussi avammut tunisisartutut EU-mut akitsuutitaqanngitsumik nioqqutip suminngaanneerfia pillugu oqaaseqarsinnaanissaq siunertaralugu nalunaarsorneqarnissamut qinnuteqassaasi.
Avammut tunisisartutut nalunaarsorsimalissagussi imaaliussaasi
januar 2020-ip kingorna EU-mut tunisisinnaaniarussi, akileraarnermut ingerlatsivimmut qinnuteqassaasi. Maanna piffissaq sioqqullugu qinnuteqarsinnaalereerpusi linki una toorlugu: https://customs.ec.europa.eu/rexpa-ui/
Qinnuteqaat immersussavarsi, atsiussavarsi kingornalu e-mailimut uunga nassiullugu: tax@nanoq.gl. Qinnuteqaatersi suliarineqassaaq aqutsissut-REX 1. januar 2020 atuutilernerata kingorna.
Avammut tunisisartutut nalunaarsorsimalereerussi
Qinnuteqaatersi suliarineqareerpat, akileraarnermut ingerlatsiviup avammut tunisisartutut normu ilissinnut tunniutissavaa taannalu paasissutissat nalunaarsorsimaffiannut ilanngutissavaa kiisalu Aqutsissut-REX-imut ulloq atuuffia nalunaarsorlugu.
Avammut tunisisartutut nalunaarsorsimanerup ullua atorunnaarfeqanngilaq Kisianni paasissutissat nalunaarsorsimasut allanngorpata akileraarnermut ingerlatsivimmut nalunaartussaatitaavusi.
Nalunaarsorsimaleriarussi, nioqqutissanut nassiussanut suminngaanneerfiup killiffianut nioqqutip suminngaanneerfia pillugu oqaaseqaatissasi tuluttut, franskisulluunniit naammassissavarsi, (ilanngussaq takuuk). Suminngaanneerfik pillugu oqaaseqaat naammassinniffiup kingorna qaammatini aqqaneq marlunni atuutissaaq.
Suminngaanneerfik pillugu oqaaseqaat avammut tunisaqartartutut nalunaarsorsimasut nalunaarsornerata atuunnerata nalaani naammassineqarsimappat atuutissaaq.
Nioqqutissat nassiunneqartut anninneqarnerminni nalingisa tamarmiusut 10 000 EUR-t sinninngippagit avammut tunisisoq REX-imi nalunaarsorsimasariaqanngilaq. Avammut tunisisup nioqqutissat nassiussai anninneqarnerminni nalingisa tamarmiusut 10 000 EUR-t sinninngippagit REXimi nalunaarsorsimasariaqanngilaq.
Nioqqutit suminngaanneerfik pillugu killiffillit suli pisiarineqarsinnaalertinnagit EUmi nunami ilanngaaserivimmi misissorneqarsimatillugit nioqqummik ingerlatitseqqiisup suminngaanneerfik pillugu oqaaseqaatigineqartoq ataatsimik arlalinnilluunniit allanngortillugu taarsersinnaavaa, tunisassiat ilaat tamarmilluunniit EU-p ilanngaasiviini allamut imaluunniit Norgemut Schweizimulluunniit ingerlateqqinneqassappata. Suminngaanneerfik pillugu taarsiutitut oqaaseqaatip siulliup naammassineqarneranit qaammatini aqqaneq marlunni atuutissaaq.
Avammut tunisisartutut nalunaarsorsimasunik akuersineq
EU-mi avammut pisisartut avammut tunisaqartartunut nalunaarsorsimasunut suminngaanneerfik pillugu oqaaseqaammik tigusaqarfigisaminnut tamatigut uppernarsaammik piumasaqartassapput Tamanna REX pillugu isumalioqatigiissitap nittartagaani nittartagaq tamanut ammasoq nittarfigineratigut linkimi uani naammassineqarsinnaavoq: https://ec.europa.eu/taxation_customs/dds2/eos/rex_home.jsp?Lang=en