AKA Pillugu | Akileraartarnermut Aqutsisoqarfik
Akileraartarnermut Aqutsisoqarfik (AKA) aaqqissuussaanermigut Aningaasaqarnermut Naalakkersuisoqarfiup ataani inissisimavoq.
Akileraartarnermut Aqutsisoqarfiup akileraarnermut, akitsuutinut akiliisitsiniarnermullu tunngasunik ingerlatsinermi sulianik isumaginnippoq.
Aaqqissugaaneq suliassat aaqqissuussaanerannik ilassuteqarpoq, inerisaanermi suliassat, suliassat
arlalinnit ingerlanneqartut aamma suliassat annertunerusut.
Tamanna aqutsisoqarfiup iluani avataanilu
suliassanut atuuppoq.
Kiisalu aaqqissugaanermut ilisarnaataalluni isumalluutinik arlalinneersunik pisariaqartitsisarneq
atuisarnerlu, pingaartumik immikkut piginnaasaqarfiusuni suliassanilu annertunerusuni/ulapiffiusuni.
Akileraartarnermut Aqutsisoqarfik pingaarnertigut sisamanik immikkoortortaqarluni aaqqissugaavoq:
• Aningaasaqarnermut immikkoortortaq
• Akileraarutit nakkutilliinerlu
• Akiliisitsiniartarneq
• Suliat ataatsimoorussat
Kiisalu aqutsisoqarfimmi sulineq, ilanngaaserineq aamma pisuussutinit iluanaarutit.
Aqutsisoqarfimmi pisortap Akileraartarnermut Aqutsisoqarfimmi aqutsinermik isumaginnippoq.
Ukiumut 2023-mut nalunaarut uanit aasinnaavat 
Ukiumut 2022-mut nalunaarut uanit aasinnaavat
Ukiumut 2021-imut nalunaarut uani aasinnaavat
Ukiumut 2020-imut nalunaarut uani aasinnaavat
Ukiumut 2019-imut nalunaarut uani aasinnaavat
Ukiumut 2018-imut nalunaarut uani aasinnaavat
Ukiumut 2017-imut nalunaarut uani aasinnaavat
Ukiumut 2016-imut nalunaarut uani aasinnaavat
Akileraartarnermut Aqutsisoqarfiup innuttaasunut suliffeqarfiutilinnullu sullissilluarnissaq qitiutippaa.
Sullissineq ataqatigiissagaavoq ima; Saaffiginnissutit ingerlaannartumik naammassillugit suliarineqarsinnaasut, Akileraartarnermut Aqutsisoqarfiup saaffiginnittarfiini suliarineqartarput. Saaffiginnissutit ingerlaannartumik naammassineqarsinnaanngitsut aqutsisoqarfiup immikkoortortaanut allanut innersuunneqartarput.
Akileraartarnermut Aqutsisoqarfiup anguniagarivaa, innuttaasut Akileraartarnermut Aqutsisoqarfimmut, ajornanngitsumik isersinnaanissaat atuisinnaanissaallu taamatuttaaq anguniagaavoq sullissineq inunnut ataasiakkaanut naleqquttuullunilu paasiuminartuussasoq.
Paasissutissat qarasaasiatigut ajornanngitsumik, aqutsisoqarfiup nittartagaani www.aka.gl –imi aaneqarsinnaassapput.
Innuttaasup misigisimassavaa saaffiginnissutiminut naapertuuttumik saaffiginnissutigisarlu qitiutillugu sullinneqarluni. Pisariaqartitsinerit naapertorlugu sulisut ikiorlutillu ilitsersuutissavaatsit, ilinnut Akileraartarnermut Aqutsisoqarfimmullu sullissineq oqinnerpaajutinniarlugu.
Innuttaasutut suliffeqarfiutilittullu eqqortumik sullinneqarnissat naatsorsuutigisinnaavat, sulisunik tunniusimallutillu akisussaassusilinnit.
Innuttaasut ataasiakkaat suliffeqarfiutillillu inissisimanerat pisariaqartitaallu aallaavigalugit Akileraartarnermut Aqutsisoqarfik sullissisarpoq.
Ornigullutit qarasaasiatigulluunniit saaffiginnikkaangavit Akileraartarnermut Aqutsisoqarfiup pitsaasumik angusaqarfiusumillu sullinneqarnissat tamatigut anguniagarisarpaa.
Akileraartarnermut Aqutsisoqarfimmi immikkoortortat aggorneri aporfiginagit suleriaaseqarpugut suliffeqarfittullu ataatsitut misigineqarnissaq kissaatigaarput innuttaasunullu kiffartuussineq ataatsimoorussaq aallaavigalugu suliaqartartutut isigineqarusulluta, suliassaq immikkoortortami sorlermi inissisimagaluarpalluunniit. Eqqortumik sullinneqarnissat uagut akisussaaffigaarput.
Akileraartarnermut Aqutsisoqarfiup kiffartuussinermut nalerai:
Akileraartarnermut Aqutsisoqarfiup innuttaasunut, suliffeqarfinnut, piginneqataasunut allanullu Akileraartarnermut Aqutsisoqarfimmut attaveqartartunut sullissilluarnissamut naleqqatut makku toqqarsimavagut.
Attavigiuminartuuneq
Akileraartarnermut Aqutsisoqarfik innuttaasunit attavigiuminartuunissaa pingaaruteqarpoq tamannalu innuttaasut pisariaqartitaannik periarfissaannik kissaataannillu aallaaveqassaaq.
Sulisut innuttaasunut soqutiginnillutik sullissisarnissaat pingaaruteqarpoq.
Taamaattumik aqutsisoqarfimmi attavigineqarnissamut periarfissat nalilersorlugillu periarfissanik piorsaanermik ataavartumik suliaqartarpugut. Kissaatigaarput ornigulluni qarasaasiatigullu saaffiginninnernut attavigiuminartuunissarput. Kissaatigaarputtaaq qarasaasiatigut kiffartuussinerup annertunerulersinneqarnissaa, tassuuna innuttaasoq nammineerluni isumagisinnaasunngortillugu taamatuttaaq paasissutissat sapinngisamik amerlanerpaat innuttaasunit ajornannginnerusumik takuneqarsinnaalersinnissaat kissaatigaarput.
Akileraartarnermut Aqutsisoqarfiup suliarisartagaasa suuneri innuttaasunut paasiuminartuunissaat pingaaruteqarpoq.
Akileraartarnermut Aqutsisoqarfiup anguniagaraa, Kalaallit Nunaanni tusagassiuutitigut qarasaasiatigullu paasissutissanik, innuttaasut suliffeqarfiillu sapinngisamik amerlanerpaat angussallugit.
Sulianut pimoorussineq
Sullissineq sapinngisamik pitsaanerpaaq anguniarlugu suleriaatsit pitsanngorsarneqartuartarput. Tamanna ataavartumik pikkorissaanertigut, piginnaasanik qaffassaajuarnikkut sulianillu ataqatigiissaarinikkut anguniarneqartarpoq, taama ingerlatsinikkut sulisut suliaminnut pikkorissuseqarlutik naammassinnissinnaanerat angujumallugu.
Akileraartarnermut Aqutsisoqarfimmi sulisut atugarissaarnissaat, suliap nuannersuunissaa piumassuseqarnissaallu ataavartumik sammineqartarput.
Sullerissuseq
Akileraartarnermut Aqutsisoqarfimmi suleriaatsit sullerissaanerillu ingerlanneqartuaannarput. Tamanna immikkoortortat akornanni ataqatigiissaarinernik suleqatigiinnertigullu ilaatigut pisarpoq. Suliat
ataqatigiissumik qaffasissumillu suliarilluakkat anguniakkatut tunaartarineqartuaannarpoq.
Akileraartarnermut Aqutsisoqarfimmi suliassat assigiinngitsorpassuupput. Taamaattumik kukkunerit pinngitsoortikkuminaattarput. Tamanna pissutigalugu kukkunerit pinngitsoortinnissaat annikinnerpaamiitinnissaallu eqeersimaffigiuaannarparput. Kukkusoqarsimatillugu iliuuseqarfiginissaat pingaarnerpaatut isigaarput. Kukkunerit iluarsiiviginiarneri ammasumik unneqqarissumillu ingerlanneqartarnissaat naatsorsuutigisinnaavat, akornatsinni tatigeqatigiinnerup attatiinnarnissaa imaluunniit iluarseqqinneqarnissaa siunertaralugu. Kukkunerit ilinniarfigisassavagut taamaasilluta assinginik kukkusoqaqqinnissaa pinngitsoortinniarlugu.
Ajukkunnanngissuseq
Akileraartarnermut Aqutsisoqarfimmut saaffiginnittut sulisut ajukkunnanngitsut peqqissaartullu naapissallugit naatsorsuutigisinnaavaat. Sulisut atorfitsik pikkoriffigalugu sullissisassapput, Akileraartarnermut Aqutsisoqarfiullu pisortani suliffeqarfiuneranut naleqquttumik saqqummertarnissartik piareersimaffigissavaat.
Pissusissamisoorsoraarput saaffiginnittarfik allaffiillu ataasiakkaat kinaassutsimik aamma arlaannaannulluunniit attuumassuteqarfiusutut nittarsaassiffiussanngitsut, saaffiginnittoq sullissisorlu tamakkuninnga akornuteqaratik naapissinnaaqqullugit.
Ataqqeqatigiinneq
Akileraartarnermut Aqutsisoqarfimmi assigiinngisitsinnginnissaq ataqqisaraarput, tassunga ilanngullugit qanoq inuiaassuseqarneq, piorsarsimassuseqarneq, oqaatsit upperisaqarnerlu. Saaffiginnittup naatsorsuutigisinnaavaa inuttut akuerisaaneq, tikilluaqqusaaneq namminerlu oqaatsit atorlugit sullinneqarneq. (kalaallisut, qallunaatut, tuluttut)