airplanebooksbriefcase business cogs cross election entertainment fish house law lockmedicalpeopleselfservices socialtax

Akileraartarnermut allagartaq

Nalinginnaasumik paasissutissiineq

Akileraartarnermut allagartaq skiimaavoq akissarsiavit tunniunnissaannut atatillugu sulisitsisunnit atorneqartartoq. Akileraartarnermut allagartaq naapertorlugu qanoq akileraartigisassanerlutit sulisitsisut naatsorsuisarpoq.

Akileraartarnermut allagartaliunneqassaatit uku allaqqasut tunngavigalugit:

  • Siumoortumik nalunaarsuiffinnit
  • Ilanngaatissatit
  • Procentillu akileraarusiissutissatit

Akileraartarnermut allagartaq inuit allattorsimaffiat naapertorlugu najugarisannut december-imi nassiunneqartarpoq. Akileraartarnermut allagartaq annaasimagukku, nutaamik pissarsinissamut Akileraartarnermut Aqutsisoqarfimmut attaveqassaatit.

Akileraartarnermut allagartaq elektronikkikkut
Kortivit pingaarnerup nalaani krydsiliisoqarsimappat, akileraartarnermut allagartap elektronikkikkut sulisitsisunnit Akileraartarnermut Aqutsisoqarfimmut noqqaassutigineqarsimavoq.

Arlalinnik suliffeqaruit imaluunniit allami sulileqqammersimaguit, maannakkut suliffigisavit Korti pingaarneq imaluunniit Bikorti elektronikkiugaluarpat pappialaagaluarpalluunniit pigissagaa qulakkiissavat. Nalorniguit sulisitsisut attavigissavat sulisitsisuillu Korti pingaarneq Bikortiluunniit piginngippagu, Akileraartarnermut Aqutsisoqarfimmut noqqaassutigissavat.

Akileraartarnermut allagartaq pigitinnagu akissarsiannit akileraarutitigut eqqortunik ilanngaatsinnissaq sulisitsisuit isumagisinnaanngilaa. Tamannalu ima paasineqassaaq, ilanngaateqaruit ilanngaatit atornagit akissarsiannit 45 procentimik sulisitsisoq ilanngaasassaaq.

Nalunaarutit 2021-miit atuutilersut (aka.gl)
Korti pingaarneq, bikort aamma frikort

Akileraartarnermut allagartaq pingasunngorlugu agguagaavoq:

  • Korti pingaarneq, taanna atorlugu nalinginnaasumik ilanngaasoqartarpoq. Korti taanna sulisitsisunnut tunniutissaaq
  • Bikort, akileraarutitaqanngitsunik ilanngaatinik imaqanngisaannartoq. Sulisitsisutit arlaqarpata, sulisitsisutit tamarmik bikortimik tunissavatit
  • Frikort, akileraarutitaqanngitsumik amerlanerpaanik killilerlugu isertitaqarsinnaanermik paasissutissartalik. Inuttut nalinginnaasumillu ilanngaatigisartakkannit amerlanerunngitsunik isertitaqassaguit frikorti atorsinnaavat

 

Aalisartunut piniartunullu

Aalisartuuguit piniartuuguilluunniit tunisinermi akileraartarnissamut allagartaq atussavat. Taanna Akileraartarnermut Aqutsisoqarfimmut saaffiginninnikkut pissarsiarisinnaavat. Akileraartarnermut tunisinermullu allagartat tunisassiortunut tunisiffigisartakkannut tunniutissavat. Allagartaq tunissassiorfimmut tunisinermi taamaallaat atorneqarsinnaavoq.

 

Ilinniartunut

Ilinniagaqarnermik aallartitsiguit saniatigullu suliffeqarlutit, akileraartarnermut allagartamik nutaamik pissarsiniassaatit. Siumoortumik immersuiffissamik pinissamut Akileraartarnermut Aqutsisoqarfimmut saaffiginnissaatit kingornalu akileraartarnermut allagartaq pissarsiarissavat.

 

Aappaasup ilanngaataasa akileraartarnermut allagartannut nuussineq

Aappavit ilanngaataasa akileraartarnermut allagartannut nuunneqarnissaanut periarfissaqarputit, aappavit ilanngaatit tamakkiisumik atussanngikkai ilimagippagu.

Katikkuit averuseruilluunniit akileraartarnermut allagartat allanngortittariaqanngilat – taamaallaat akileraartarnermut allagartannut imaluunniit allagartannit aappavit illilluunniit ilanngaatit nuussimappata.

 

Allannguineq

Kalaallit Nunaanni ukiup akileraarfiusup ingerlanerani kommunimit kommunimut allamut nuukkuit, akileraartarnermut allagartaq ukiup siuliani december-imi nassiussarsiat atuinnassavat.

Kalaallit Nunaannut nuukkuit, akileraartarnermut allagartamik sanatitsinissamut pissarsinissamulllu kommunimut imaluunniit Akileraartarnermut Aqutsisoqarfimmut saaffiginnissaatit.

 

Akileraarutit sinneruttut akilerneri

Akileraarutitit sinneruttut 18.000 koruunit inorlugit amerlassuseqarpata (akitsuut 6 procenti ilanngullugu), aningaasat taarsigassatit ukiumut tulliuttumut akileraartarnermut allagartamut nuunneqassapput. Tamanna ima paasineqassaaq, akileraartarnermut allagartat atorlugu ilanngaatitigut akileraarutit sinneruttut Akileraartarnermut Aqutsisoqarfimmut akiliissaatit.

Akileraarutit sinneruttut 18.000 koruuninit amerlaneruppata, 20. november qaangertinnagu akiitsutit akilissavatit.

Piffissaagallartillugu akiliiffissaq kingulleq sapaataappat nalliuttuuppalluunniit imaluunniit arfininngorneruppat piffissarititaasoq ulluinnarmut tullermut sivitsorneqassaaq.

 

Akileraartarnermut Aqutsisoqarfik
Postboks 1605
3900 Nuuk

CVR-normu 19785386
Oqarasuaat: 34 65 10
E-mail: tax@nanoq.gl
Nittartagaq: www.aka.gl