Akileraarutit A-t aamma B-t

Akileraariaatsit assigiinngillat. Nalinginnaanerpaapput akileraarutit A-t aamma B-t, tassaappullu aningaasarsiannit A-nit B-nillu akileraarutit.

Akileraarutit A-t aamma B-t pillugit apeqqutissaqaruit, Akileraartarnermut Aqutsisoqarfiup Innuttaasunut Sullissivianut saaffiginnissinnaavutit.

Akileraarutit A-t
Akileraarutit A-t tassaapput aningaasarsiannit A-nit akileraarutit.

Aningaasarsiat A-t tassaasinnaapput:
• Sulisitsisunnit akissarsiatit
• Namminersorlutit akissarsiatit, assersuutigalugu oqaatsinik nutserisutut
• Siulersuisuni ilaasortatut aningaasarsiatit
• Soraarnerussutisiatit

Akileraarutit A-t tassaapput akileraarutaagallartussat. Taakku siumoortumik nalunaarsuinitit tunngavigalugit naatsorsorneqartarput, tassalu ukiumi akileraarfiusussami illit isertitassatut naatsorsuutitit tunngavigalugit.

Ukioq naappat aningaasarsiatillu A-t qulakkeerlugit annertussusivii ilisimaneqalerpata, iluarsiissuteqartoqassaaq. Akileraarnikippallaarsimaguit ilassummik akileraartinneqassaatit. Taakku taaneqartarput akileraarutissat sinneri. Akileraarpallaarsimaguilli utertuussaatit, taakku taaneqartarput akileraarutit sippuutaannik. Pisortanut akiitsoqarsimanngikkuit, Akileraartarnermut Aqutsisoqarfimmit utertoorutissatit tunniunneqassapput. Pisortanut akiitsoqaruit akiitsutit utertooruteqannginninni akiliutitut atorneqassapput, tamatumalu kingorna akiliuteqarsimaneq pillugu allagarsitinneqassaatit.

Akileraarutit B-t
Akileraarutit B-t tassaapput aningaasarsiannit B-nit akileraarutit.

Aningaasarsiat B-t tassaasinnaapput:
• Namminersorlutit suliffiutinnit isertitatit
• Ilinniagaqarnersiutit
• Erniat
• Aalisarlutit, nunami imaanilu piniarlutit pisavit tuninerini akissarsiatit

Akileraarutit B-t akileraarutaagallarputtaaq. Taamatuttaaq siumoortumik isertitassannut nalunaarsuinermi, akileraaqqinnissami utertoornissamilu kiisalu pisortanut akiitsut ilanngaaviginissaat malinneqassapput.

Akileraarutinik  B-nik, siumoortumik nalunaarsuinerit tunngavigalugu, agguataartumik ukiumut aqqaneq marloriarlutit akiligassinneqassaatit.