Qamutit motoorillit akileraarutaat e-Boksikkut nassiunneqarput

Innuttaasut suliffeqarfiillu pisortatut oqartussaniit 2020-mi atuutilersumik digitalimik allagarsisalernissaannut periarfissiisumik Pisortani Digitalimik Allakkerineq pillugu inatsisartunit akuersissutigineqarpoq.

Akileraartarnermut Aqutsisoqarfiup qamutit motoorillit akileraarutaannut akileeqqusissut siullermeersumik e-Boksikkut nassiuppaa.

Akileraartarnermut Aqutsisoqarfiup, qamutit motoorillit akileraarutaannut akileeqqusissut, piffissami 1. april-imiit 1.oktober ilanngullugu atuuttoq nassiuppaa. Taanna kingusinnerpaamik 1. maj 2023 akilerneqareersimassaaq.

Nets-ikkut akilersuinermut isumaqatigiissuteqareeruit, akiligassannut tunngasut allannguuteqassanngillat.

Nets-ikkut isumaqatigiissuteqanngikkuit, akiligassaq e-Boks-ikkut tigussavat. e-Boks-eqartussaanngitsutut nalunaarsorneqarsimaguit allakkanik Allakkerivikkut nassinneqassaatit.

Malugiuk

Qamutit motoorillit akileraarutaannik piffissaq eqqorlugu akiliisimanngikkuit Akileraartarnermut Aqutsisoqarfiup akiliinissamut tuavisaarummik nassissavaatit, taamaliortoqartillugu akiligassavit qaavatigut akitsuummik 500 kr.-mik akiligassatit ilaneqassapput. Akiliinissamut tuavisaarut ullut arfineq pingasut iluanni akilerneqassaaq. Taanna akilerukku, akiliisimanermut uppernarsaat afgift@nanoq.gl-imut nassiutissavat.

Akileraartarnermut Aqutsisoqarfiup tuavisaaraluni akileeqqusinerata kingorna sapaatip akunneri sisamat ingerlaneranni akiliummik tigusaqarsimanngikkunik politiit qinnuigineqassapput biilivit nummerpladii peeqqullugu.

 e-Boks sunaava?

e-Boksi tassaavoq internetsikkut digitalimik allakkerineq, tassanilu digitalimik allakkat pisortatut oqartussaasuneersut pingaarutillit ataatsimut isumannaatsumik katersorneqartarlutik. e-Boksi sumiikkaluaraanniluunniit atorneqarsinnaavoq taamaalilluni qarasaasiaqaraanni, tabletseqaraanni imaluunniit oqarasuaateqaraanni angallattakkamik atorneqarsinnaalluni.

e-Boksip atornera akeqanngilaq aamma e-Boksimik qanoq annertutigisumik atuisoqarsinnaanera killeqartinneqanngilaq.

NemID/MitID
e-Boksimut iserniaraanni NemID aamma MitID suli tamarmik atorneqarsinnaapput.

NemID tassaavoq imminut sullinniarluni pisortanut namminerlu inuttut atorfissanut isertaat isumannaatsoq. NemID atorlugu atuisutut ilisarnaatit (bruger-id) isertaatillu assigiit atorneqartarput, tassa soorlu netbankimut, pisortat nittartagaannut aamma nammineq inuttut atuiffiusunut internetsimiittunut.

NemID atorlugu iserniaraanni atuisutut ilisarnaat (bruger-id) toortaqqaassaaq taavalu isertaat toortarneqassalluni. Tamatuma kingorna nøglekortimiit kode-q imaluunniit NemID-mut app-eq atorlugu akuersissut toortarneqassaaq.

Atuisussaatitaajunnaarnissamut periarfissaq
Kalaallit Nunaanni innuttaasut 15-ileereersimasut tamarmik suliffeqarfiillu Kalaallit Nunaanni CVR-imut nalunaarsorsimasut tamarmik digitalimik allakkerivimmik atuinissaminnut pisussaaffeqarput, taannami atorlugu pisortatut oqartussaasunit allagarsiassanik digitaliusunik pissarsisarnissamut periarfissaammat. Taamaattorli immikkut ittumik inissisimagaanni atuisussaajunnaarnissamut periarfissaqarpoq.

Innuttaasut taamatut inissisimasut kommunerisaminni Innuttaasunik Kiffartuussivimmut ornigullutik saaffiginninnermikkut Digitalimik Allakkerisarnermit atuisuujunnaarsitaanissaminnut qinnuteqarsinnaapput. Innuttaasut suliffeqarfiillu atuisussaajunnaarniarunik tamanna arlalinnik piumasaqaatitaqarpoq, tamakku pillugit kommunerisannut saaffiginninnikkut paasiniaaffigisinnaavatit.