airplanebooksbriefcase business cogs cross election entertainment fish house law lockmedicalpeopleselfservices socialtax

Akileraartarnermut allagartaq aamma Soraarnerussutisiaqalernissamut aaqqissuussinermut peqataasussaatitaaneq

19. december 2022

Akileraartarnermut Aqutsisoqarfiup ulluni makkunani Akileraartarnermut allagartat katillugit 44.609-t nassiussorpai Akileraartarnermut allagartaq aamma tunisinermi akileraarutinut allagartaq ukiumut isertitaqarfiusumut 2023-mut akileraarutinik A-nik naatsorsuinermut atorneqartussat. Amerlanerpaartai, innuttaasut 40.626-t, akileraartarnermut allagartamik nalinginnaasuulluinnartumik imaluunniit tunisinermi akileraarutit allagartaannik tigusaqassapput.


Innuttaasut amerlanerpaartaasa qujanartumik soraarnerussutisiaqalernissamut aaqqissuussinermut peqataasussaatitaaneq pillugu Inatsisartut inatsisaat naapertorlugu ukiumut isertitaqarfiusumut 2021-mut soraarnerussutisiaqalernissamut ileqqaartussaatitaanertik naammassisimavaat.

Kisianni innuttaasut 3.983-it soraarnerussutisiaqalernissamut akiliinissap naammassisimannginnera pissutigalugu procentinngorlugu akileraarutissaq qaffasinnerutillugu akileraartarnermut allagartamik imaluunniit tunisinermi akileraarutinut allagartamik tigusaqassapput.

 

Innuttaasut soraarnerussutisiaqalernissamut ileqqaartussaatitaanerminnik naammassinnissimanngitsut akileraartarnermut allagartamik 7%-imik tapiliussamik qaffanneqarsimasumik aammalu tunisinermi akileraarutinut allagartamik 5%-imik tapiliussamik qaffanneqarsimasumik tigusaqassapput.

Procentimut tapiliussamut pissutaavoq 2021-mut soraarnerussutisiaqalernissamut ileqqaartussaatitaanerup naammassineqarsimannginnera. Ilaatigut sulisitsisut nalunaarutaat kiisalu innuttaasup nammineq akiliutai, Akileraartarnermut Aqutsisoqarfiup soraarnerussutisiaqalernissamut ileqqaartussaatitaanerup naatsorsorneqarnerani tunngavigai.


Matuma siuliani taaneqartoq soraarnerussutisiaqalernissamut aaqqissuussinermut peqataasussaatitaaneq pillugu Inatsisartut inatsisaanni § 7 naapertorlugu ingerlanneqarpoq.

Procentinngorlugu akileraarutissaq qaffanneqarsimasoq tigugukku qanoq iliussaanga ?

2022-mi aggustimi soraarnerussutisiaqalernissamut peqataasussaatitaanermut ukiumoortumik naatsorsukkat tiguatit, tassani allassimavoq ileqqaartussaatitaanerit naammassisimanerit imaluunniit ileqqaartussaatitaaneq naammassisimannginnerit.

• Soraarnerussutisiaqalernissamut peqataasussaatitaanernut ukiumoortumik naatsorsukkat misissukkit. Taanna uani www.sullissivik.gl/ “akileraarutikka” ataani imaluunniit eBoks-erni takusinnaavat.

 

Kisitsisit soraarnerussutisiaqalernissamut peqataasussaatitaanernut ukiumoortumik naatsorsukkani allassimasut isumaqatiginngikkukkit, imaaliorsinnaavutit:

• Sulisitsisut soraarnerussutisiaqalernissamut aaqqissuussinermut akiliisimappat, taanna 2021-mut ukiumoortumik aningaasarsiavit allagartaanni ilanngunneqarsimanersoq, taamaalillunilu Akileraartarnermut Aqutsisoqarfimmut nalunaarutigineqarsimanersoq, misissorsinnaavat. Kisitsit taanna ukiumoortumik aningaasarsiavit allagartaanniittoq ukiumoortumik naatsorsukkani allassimanersoq misissoruk.

•Nammineerluni soraarnerussutisiaqalernissamut aaqqissuussinerneersoq, ukiumoortumik naatsorsukkani allassimasoq, kisitsit eqqortuunersoq misissoruk.

 

• 2021-mi soraarnerussutisiaqalernissamut aaqqissuussinermut inatsimmi pineqartunut ilaasumut naammattumik akiliisimallutit uppernarsarsinnaagukku, soorunami akileraartarnermut allagartavit imaluunniit tunisinermi akileraarutinut allagartavit allanngortinnissaanut periarfissaqassaaq. Tassaasinnaavoq sulisitsisorniit akiliutinut, imaluunniit illit nammineq soraarnerussutisiaqalernissamut aaqqissuussinernut akiliuternut, uppernarsaat.


Tamatuma kingorna soraarnerussutisiaqalernissamut aaqqissuussinermut inatsimmi pineqartunut ilaasumut 2021-imut soraarnerussutisiaqalernissamut ileqqaartussaatitaanerup matussusernissaanut akiliisoqarsimasoq uppernarsarsinnaagukku, aamma 2023-mut akileraartarnermut allagartavit imaluunniit tunisinermi akileraarutinut allagartavit allanngortinnissaanut aamma periarfissaqassaaq.

Kalaallit Nunaanni aningaaserivinniit kiisalu kalaallit danskillu soraarnerussutisiassanut ingerlatsiviiniit soraarnerussutisiaqalernissamut aaqqissuussinernut akiliutit pillugit uppernarsaat Akileraartarnermut Aqutsisoqarfiup akuerisarpaa. Nuussineq soraarnerussutisiaqalernissamut aaqqissuussinermut, illit atit atorlugit pilersinneqarsimasumut, pisimasoq ersarissumik allassimappat, qarasaasiakkoortumik aningaaseriverniit pappialanngortitaq aamma akuerineqarsinnaavoq. Qarasaasiakkoortumik aningaaserivimmiit pappialanngortitami soraarnerussutisiaqalernissamut aaqqissuussineq illit atit atorlugu allassimanngippat, assersuutigalugu kontumut atia ersinngitsumut kontukkoortumik nuussiinnartoqarsimalluni, tamanna uppernarsaatitut akuersaarneqarsinnaanngilaq.

Akileraartarnermut Aqutsisoqarfik akileraartarnermut allagartamik/tunisinermi akileraarutinut allagartamik nutaamik tunniussisoqassappat, taamaalilluni sulisitsisuit 2023-mi januaarimut qaammammut aningaasarsiavit naatsorsornissaat angumerisinnaassallugu, uppernarsaat kingusinnerpaamik 9. januar 2023 tigoreersimassavarput.


Apeqqutissaqaruit Akileraartarnermut Aqutsisoqarfik uani pension@nanoq.gl imaluunniit oqarasuaammut 34 65 10 attaveqarfigisinnaavatsigit.