Augustip 31-ani Akileraartarnermut Aqutsisoqarfiup ukiumut akileraarfiusumut 2017-imut akileraarpallaarutinit utertoorutissat 166,6 mio. koruunit inunnut 22.700-nut utertissavai.
166,6 mio. koruuninit ilanngaassinikkut, pisinnaatitaaffimmik tigusisoqarneratigut akiliisitsinikkut kiisalu pigisanik qularnaveeqqutitut sillimmasiinikkut 45,7 mio. koruunit (utertoorutissat tamarmiusut 27 %-iisa missaat) pisortanut akiitsunut matusissutigalugit akilersinneqarput.
23,6 mio. koruunit Kalaallit Nunaanni kommuninut, INI A/S-imut, Iserit-imut aammalu Nukissiorfinnut il.il. akiitsunut matusissutitut akilersinneqarput, sinneruttut 22 mio. koruunit Namminersorlutik Oqartussanut akiitsunut matusissutigineqarput.
Akileraartartup akileraarpallaarutinit utertoorutissai pisortanut akiitsunut matussutissatut tamakkiisumik ilaannakuusumilluunniit atorneqarsimatillugit, immikkut ilisimatitsissummik nalunaarfigineqarput.
Akileraartartut aningaaserivinnut paasissutissanik inaarummi naqeriikkami 2017-mut tunniussisimasut akileraarutinut akiliivallaarsimasut ulloq 31. august 2018 aningaasanik nuussiffigineqassapput.
Akileraartartunut aningaaserivinnut paasissutissanik inaarummi naqeriikkami 2017-mut nalunaaruteqarsimanngitsunut, aningaasat tunniunneqartussat uninngatinneqassapput. Akileraartarnermut Aqutsisoqarfiup aningaasat aatsaat tunniussinnaavai, aningaaserivinnut paasissutissat, registreringsnormu, kontonormulu Akileraartarnermut Aqutsisoqarfiup pissarsiarereerpagit.
Upernaaq 2018 Akileraartarnermut Aqutsisoqarfiup akileraarpalaarutinit § 15 naapertorlugu ukiumut akileraarfiusumut 2017-imut utertoorutissat 16,5 mio. koruunit inunnut 916-inut utertippai.
16,5 mio. koruuninit ilanngaassinikkut, pisinnaatitaaffimmik tigusisoqarneratigut akiliisitsinikkut kiisalu pigisanik qularnaveeqqutitut sillimmasiinikkut 2,7 mio. koruunit (utertoorutissat tamarmiusut 17 %-iisa missaat) pisortanut akiitsunut matusissutigalugit akilersinneqarput.
1,2 mio. koruunit Kalaallit Nunaanni kommuninut, INI A/S-imut, Iserit-imut aammalu Nukissiorfinnut il. il. akiitsunut matusissutitut akilersinneqarput, sinneruttut 1,5 mio. koruunit Namminersorlutik Oqartussanut akiitsunut matusissutigineqarput.
Matumunnga peqatigitillugu 2017-imut akileraarutissat sinnerinut akiligassat 150,4 mio. koruunit akileraartartunit 10.292-init akileqquneqassapput, taakkunannga 52,9 mio. koruunit 2019-imut siumoortumik nalunaarsuinermut atatillugu ilanngunneqassapput, 97,4 mio. koruunilli pingasun-ngorlugit avillugit akiligassanngortinneqassapput ulluni 01/09, 01/10 aamma 01/11-2018-imi, kingusinnerpaamillu akilerneqareersimassallutik qaammatit akiliiffissap ulluisa 20-anni.
Akileraarutissat sinnerinut akiligassat 2019-imut siumoortumik nalunaarsuinermut ilanngussassat akilerneqarsinnaapput ulloq 20. november 2018 nallertinnagu, taamalu tapiliussassaq 6%-iusoq pinngitsoorneqarsinnaalluni. Taamaaliorsinnaaneq pillugu paasissutissat inaarummik naatsorsuummi takuneqarsinnaapput.
Akileraartartut akileraapallaarutinit utertoorutinut akileraarutissallu sinnerinut akiligassanut tunngatillugu apeqqutissaqartut uunga saaffiginnissinnaapput: Namminersorlutik Oqartussat, Akileraartarnermut Aqutsisoqarfik, Postboks 1605, 3900 Nuuk, oqarasuaat + 299 34 65 10, maili: tax@nanoq.gl
21/8-2018-imiit ukiumut akileraarfiusumut 2017-imut inaarummik naatsorsuutip assinga Sullissivik.gl-imi NemId atorlugu aaneqarsinnaalissaaq. Akileraartarnermut Aqutsisoqarfik akileraartartunut ulloq 21/8-2018 Nempost-eqareersunut Ukioq 2017-imut akileraarutit naatsorneqarnerannut inaarummik nassiussissaaq.