#BiilitUlluat – Qamutit motoorillit akileraarutaata kingusinnerpaamik 31. oktober akilernissaa eqqaamajuk

#BiilitUlluat – Qamutit motoorillit akileraarutaata kingusinnerpaamik 31. oktober akilernissaa eqqaamajuk

Qamutit motoorillit akileraarutaata akilernissaanut piffissaliussat innuttaasut ilarpassuisa ukiut tamaasa puigortarpaat. Taamaammat Akileraartarnermut Aqutsisoqarfik, biiliutillit nummerplademinnik arsaarneqartariaqartartut ikinnerulernissaat anguniarlugu nutaaliorpoq. Qamutit motoorillit akileraarutaat akileriarlugu illit biilivillu assersi #BiilitUlluat allallugu Facebookimut Instagramimulluunniit ikkukkukku ukiup biiliutilitsialaatut toqqarneqarsinnaavutit. Paasisitsiniaaneq uani takuuk:

Biiliutillit qamutit motoorillit akileraarutaannik akiliisimasut aammalu #BiilitUlluat-nik atuisimasut akornanni ukiup biiliutilitsialaatut toqqarneqartussaq Akileraartarnermut Aqutsisoqarfiup 31. oktoberip kingorna makissavaa. Biiliutilitsialanngornerup kusanartumillu pokalinnannerup saniatigut pinnatassamik biilinut naleqquttumik nassinneqassaatit.

Qamutit motoorillit akileraarutaat

Qamuteralaatillit, biiliutillit, ATV-utillit allallu qamutinik motoorilinnik pillit tamarmik qamutit motoorillit akileraarutaannut akiligassamik ukiut affakkaarlugit nassinneqartarput. Akiligassaq qarasaasiakkut allakkatigut e-Boks aqqutigalugu nassiunneqartarpoq. Akiligassamik nassitissimallutit qamutit motoorillit akileraarutaannut akiligassat piffissaagallartillugu akilinngikkukku, akileeqqusilluni nukingisaarummik 500 kr.-inik tapeqartumik nassinneqassaatit. Taannalu akilerneqanngippat suliaq Politiinut ingerlateqqinneqassaaq, taakkulu biilit nummerpladeat arsaarinnissutigissavaat.

Imatut akiliissaatit

Akiligassaq e-Boksikkut tigugukku taanna akiligassat allat tamaasa assigalugit aningaaseriviit aqqutigalugu akilerneqarsinnaavoq. Ukiup affakkaartumik akiliinissamut piffissaliussat 30. april aamma 31. oktober puigortarumanagit betalingsservice-imut (PBS) ilanngunnissat inassutigaarput. Taamaaliornissamut QR-kode una atuisutullu normut pillugu paasissutissat akiligassamiittut atorsinnaavatit.

MALUGIUK: Siullerpaamik biiliutillit qamutit motoorillit akileraarutaat aningaaserivimmi kontumut 6471 1000842-mut akilissavaat, biilimik nummerpladeat (Soorlu GLXXXXX imaluunniit GRXXXXX) nalunaarlugu.