Akileraarutissat sinneri
Innuttaasut akileraarutissat sinnerinik akiliisussatut augustimi allagarsisinneqartut ilagippatsit, taava aningaasanik sipaarsinnaavutit.
Akileraarutissat sinneri 16.981 kr.-it tikillugit amerlassusillit ukiup tulliani akileraarutitigut ilanngaatissavit naatsorsornissaannut nuunneqassapput. Nuussinermi 6%-imik taperneqassapput. Tassa imaappoq akileraarutissat sinneri 16.981 kr.-it 18.000 kr.-inngorlutik ukiup tulliani akileraarutitigut ilanngaatissaraluannit peerneqassapput.
Kisianni kingusinnerpaamik 20. november akiliiguit tapiliussaq sipaassavat. Taannalu 6%-i 1.019 kr.-it tikillugit angissuseqarsinnaavoq.
- Akileraarutissat sinnerinut akiligassatit 16.981 kr.-init ikinneruppata aningaasat tamaasa akilersinnaavatit, 6%-ilu sipaarlugu.
- Akileraarutissat sinnerinut akiligassatit 16.981 kr.-init amerlaneruppata, taava aningaasat akilersinnaasatit amerlanerpaamik 16.981 kr.-iusinnaapput. Sinneruttut pingasunngorlugit naafferartumik akiligassanngortinneqassapput.
Paasissutissat uani takusinnaavatit
Aningaasat ukiup tulliani akileraarutitigut ilanngaatissat naatsorsornissaannut nuunneqartussat inaarummik naatsorsuutip quppernerani siullermi takuneqarsinnaapput. Aningaasat akilersinnaasatit tassaapput akileraarutissat sinneri 6%-imik taperneqanngitsut.
Aningaasat qanoq naatsorsorneqarsimanerat paaserusukkukku, tamanna inaarummik naatsorsuutip quppernerini tulliuttuni takuneqarsinnaavoq.
Imatut akiliissaatit
Aningaaserivikkut nuussillutit akiliissaatit. Kina akiliisuunersoq sunalu akilerneqarnersoq Akileraartarnermut Aqutsisoqarfiup takusinnaassavaa. Akileraarutissat sinnerinik akiligassanik nuunneqartunik akiliisinnaanermut periarfissaq § 5 malillugu akiliinermik taaneqartarmat, taanna akiliinermi nalunaarneqassaaq. Kina akiliisuunersoq takusinnaaniassagatsigu inuttut normut nalunaarneqassaaq. Kiisalu akiliut ukiumut aningaasarsiorfimmut sorlermut tunngassuteqarnersoq nalunaarutigissavat. Amerlanerpaat ukiup siulianut tunngasuusarput.
Akiliiffissaq tassaavoq Akileraartarnermut Aqutsisoqarfiup Grønlandsbanken A/S-imi kontua Reg.nr. 6471 Konto nr. 1002608. Akiliinermi makku oqaasertaliutissavatit:
- Inuttut normut
- Akiliineq ukiumut aningaasarsiorfimmut sorlermut tunnganersoq: soorlu 2023
- § 5
Assersuut: 010101-0101 2023 § 5.
Pingaarutilik - Malugiuk: Akiliineq kingusinnerpaamik pissaaq 20. november, nalornissuteqartoqassagaluarpallu akiliinermut uppernarsaat imaluunniit kontop assilinera atorlugu uppernarsarneqarsinnaassalluni.
Akiliinerit skattekortinnut sunniuteqassaaq
Kingusinnerpaamik 20. november akiliiguit Akileraartarnermut Aqutsisoqarfiup skattekortimik eqqortunik ilanngaatitalimmik tunisinnaavaatit. Skattekortissat decemberimi e-Boksikkut tigussavat.
Akileraarutissat sinnerinik Betalingsservice-ikkut akiliineq
Akileraarutissavit sinneri Betalingsservice aqqutigalugu akilerniarukkit iserfissaq una atorlugu isumaqatigiissusiorsinnaavutit.
