Namminersorlutit inuussutissarsiummik ingerlataqarpit?

Imaassinnaasoq nittartakkakkut inuit naapittarfiini nerisassanik tuniniaasartutit, takornarianut unnuiffissamik attartortitsisartutit, atisanik nammineq mersukkannik tuniniaasartutit imaluunniit pisannik tunisisartutit. Imaluunniit suliffinnit akissarsiavit pisortanilluunniit ikiorsiissutit saniatigut isertitaqarpit?

Arlaatigut ilisarnartortaqarpa? Taava malinnaalluaannarit!

Namminersorlutit inuussutissarsiummik ingerlatannit isertitaqaruit, taava namminersorlutik inuussutissarsiummik ingerlataqartut allattorsimaffianni nalunaarsussaatit. Kalaallit nunaanni suliffeqarfiit CVR-iinik allattorsimaffik Virk.dk-miippoq.

Allattorsimaffimmiilereeruit ’Akileraarutikka’ iserfigalugu siumoortumik nalunaarsuisinnaavutit, taamalillutillu ukioq kaajallallugu eqqortumik akileraarnissat qulakkeerlugu.

Namminersorlutit inuussutissarsiummik ingerlataqartutut pisussaaffigivat ukiut tamaasa maajip aallaqqaataat nallertinnagu nammineerlutit nalunaarsukkannik naatsorsuutinillu  nassiussissallutit.

Piffissaq eqqorlugu nammineerlutit nalunaarsukkannik naatsorsuutinillu nassiussinikkut 5.000 kr. angullugu tapiliussamik akileqquneqarnissat pinngitsoortissavat.

Akileraartarnerup aaqqissuusaanerata eqqortumik atorneratigut makkuninnga ilinnut iluaqusersorsinnaavutit:

• Innuussutissarsiutinni aningaasartuutitit akileraarutissannit ilanngaatigisinnaavatit
• Akileraarutissavit qaavatigut tapiliussamik akileeqquneqarnissat pinngitsoortissinnaavat.
• Akileraartarnermut Aqutsisoqarfimmit iluanaarutivit missingersuinikkut nalilerneqarnissaat malitsigisaanillu qaffasippallaamik akileraartussanngortinneqarsinnaanerit pinngitsoortissinnaavat.
•  

Akileraartarnermut Aqutsisoqarfik attavigiuk:

• Isertitatit pissutigalugit namminersorlutit inuussutissarsiummik ingerlataqartuunerlutit nalornigukku.
• Nammineerluni nalunaarsuiffimmut tunngatillugu piumasaqaatinik killiliussanillu nalorniguit.
• Akileraartarnermut tunngatillugu allanik apeqqutissaqaruit.