Akileraartarnermut Aqutsisoqarfiup akeqanngitsumik biileqarnerup akileraarutigineqartarnerannut tunngatillugu kaajallaasitami inatsisit saqqummiuppai.
Akeqanngitsumik biileqartitsisarnerup akileraarusigaanera Inatsisartut inatsisaanni nr. 12, 2. november 2006-imeersumi, kingusinnerusukkut allanngortinneqartumi, § 19-imik tunngaveqarluni pisarpoq.
Akeqanngitsumik biileqartitsinerup akileraarusigaanerani Akileraartarnermut Aqutsisoqarfimmi pingaarnertut tunngavigineqartut tassaapput:
- Sulisoq atorfimminnut atatillugu imaluunniit nammineq sulinerminut tunniussassat pillugit isumaqatigiissummut atatillugu biilimik nammineq atugassamik tunineqarsimappat akeqanngitsumik biileqartitsineq ullormut naatsorsuiffigineqassaaq.
- Akeqanngitsumik biileqartitsineq biilip pisiarinerani akigitinneqartoq, qanorpiarlu biili atorneqartigisimanersoq, apeqqutaatinnagit assigiimmik akileraaruserneqassaaq.Atuinerpiaq akileraarusernagu qamutimik motoorilimmik atugassiineq kisimi akileraaruserneqartussaavoq.
- Atugassiineq biilimik atuisarnissamik periarfissatut paasineqassaaq.Ingerlaarnerpiaq akileraarusernagu, akerlianilli biilip ulluni qassini sulisumit atussallugu periarfissaasimanersoq akileraaruserneqartussaq.
- Akeqanngitsumik biileqartitsineq aningaasarsiatut A-tut akileraaruserneqassaaq.Akeqanngitsumik biileqartitsinerup nalinganik qaammammut nassuiaasiornerit ukiumullu akissarsiat allagartaat ilaatillugit nalunaaruteqartarnissamik sulisitsisoq pisussaaffeqarpoq.Akileraarutinik A-nik akileraartitsinikkut akeqanngitsumik biileqartitsinerup nalinganut akileraartitsinissamik sulisitsisoq pisussaaffeqarpoq.
- Akeqanngitsumik biileqartitsineq akigititat assigiinngitsut pingasut malillugit akileraaruserneqarpoq.Akigititami illoqarfimmi biilip atugassiiffigisaani aqqusineq qanoq takitiginersoq apeqqutaassaaq.
- Qamutit motoorillit assigiinngitsut ilaannut akigititaq annikillisaavoq imaluunniit akeqanngitsumik biileqartitsinermi akileraartussaatitaasoqarnani.
- Akeqanngitsumik biileqartitsinerup akileraarutitigut nalinganut akigititaq akigititanut ukiumoortumik naleqqussaasarnermut procenti atorlugu iluarsiiffigineqartarpoq.Massakkut akigitinneqartut Akileraartarnermut Aqutsisoqarfiup nittartagaani AKA.gl - 'nalunaarutit' nassaassaapput.
Immikkoortoq siulianiittoq akeqanngitsumik biileqartitsinerup akileraarusertarnissaanut tunngatillugu tamakkiisuunngilaq. Inatsisit atuuttut ilanngussaq 2-mi ilanngunneqarput.
Nalunaarutigineqartut qanoq isillugit nalunaarutigineqartarnerannut paasisaqarusukkuit saqqummersitaq 'Kalaallit Nunaanni Akileraarusiisarneq' aamma ilitsersuut sulisitsisunut nalunaarsuiffimmiittoq nittartagaq sulinal@nanoq.gl innersuussutigissavarput.