Akileraartarnermut Aqutsisoqarfiup eqqaasitsissutigissavaa Inatsisartut inatsisaat, unnuinermut akitsuut 2026-mi januaarip aallaqqaataaniit atuutilissammat. Tamanna soorlu AirBnB, Booking.com akiliisitsillutillu unnuisitsisarnernut allanut aamma atuuppoq.
Illumik inigisamilluunniit akiliisitsillutit attartortitsiguit, 2026-mi januaarip aallaqqaataaniit nunami allamiunik unnuisitsiguit, unnuinermut ataatsimut 30 kr.-nik akitsuummik akiligassiissaatit. Unnuinermut akitsuut atuutinngilaq makkununnga:
- Inunnut Kalaallit Nunaanni najugaqartunut
- Angalanerup taamaatiinnarneranik peqquteqartumik immikkut ittumik unnuisariaqalerneq
- Sumiiffimmi ataatsimi ullut 21-it sinnerlugit unnuineq
- Inuit namminneq illuanni / inigisaanni akiliinani unnuineq
Unnuinerit Unnuineq.gl-imut nalunaarutigisallugit pisussaatitaavutit. 2026-imi ukiup sisamararterutaanut siullermut nalunaaruteqartoqassaaq piffissami 1. – 10. april.
Akitsuut akilerneqartussaq ukiup sisamararterutaanut katillugit 600 kr.-inik ikinneruppata akileeqquneqassanngilatit. Unnuineq.gl-imulli nalunaarutigineqartussaatitaapput suli.
Attartortitsisartutut qarasaasiakkut pilersitsinerit unnuisarfiillu nalunaarsorneqarnissaannut Unnuineq.gl januaarip affaata aappaani ammassaaq. Akileraartarnermut Aqutsisoqarfiup facebookkiatigut ammarnissaata ullussavia nalunaarutigineqarumaarpoq.
Akileraartarnermut Aqutsisoqarfiup inussiarnersumik aamma makku maluginiaqqussavai:
- Unnuisarfiit attartortittakkat inuussutissarsiutigalugu suliffeqarfittut ingerlanneqassammata. Attartortitsisartoq CVR-imi normu-qassaaq.CVR-normumik qanoq pilersitsisoqartarnersoq Akileraartarnermut Aqutsisoqarfiup nittartagaani atuaruk.
- Attartortitsinermi isertitanit iluanaarutisiat akileraaruteqaataapput taakkulu nammineerluni nalunaarsukkani takuneqarsinnaasussaapput.
- Akileraartarnermut Aqutsisoqarfik, unnuinernut nalunaarsuiffinni nakkutilliinermi paasissutissanik pissarsisinnaavoq. Akileraarutinut akitsuutinullu akiliutinut paasissutissat eqqortumik nalunaarsorneqarsimaneri paasiniarlugit nakkutilliinermi atorneqarsinnaapput. Akileraarutinut akitsuutinullu eqqunngitsumik akiliuteqartoqarsimappat akiliisitsinermik kinguneqarsinnaavoq.
Apeqqutissaqaruit Akileraartarnermut Aqutsisoqarfik attavigisinnaavat ugguuna: