Arfininngorneq aggustip 12-iat aallarnerfigalugu akissarsiassat NemKonto-systemi atorlugu tunniunneqartalissapput

Pisortaqarfinnit aningaasanik akiliineq aggustip 12-iat 2023 aallarnerfigalugu NemKonto-systemi atorlugu ingerlanneqartalissaaq. Tamanna ilaatigut isumaqarpoq akissarsiat NemKonto-systemi atorlugu tunniunneqartalissasut. Innuttaasut 19 %-ipajaavi suli NemKontumik nalunaarsuisimanngillat. Nalunaarsuisimanngitsut akornanniikkuit, taava aggustip 12-iata kingorna akissarsiassatit tigusinnaajunnaassavatit.

Kontuvit ilaat NemKontussatut nalunaarsorsimanerlugu paasiniarlugu internetbrowserikkut netbankinnut iserlutit misissuisinnaavutit, imaluunniit nemkonto.dk aqqutigalugu paasiniaasinnaallutit.

Kontorisavit ilaat NemKontussattut nalunaarsorsimanngikkukku, nalunaarsuinissaq pisariitsuaraavoq. Netbank aqqutigalugu nalunaarsuineq pisariinnerpaavoq, tassanimi kontorisat sorleq NemKontutut nalunaarsussanerlugu toqqaannartussaagakku.

NemKonto.dk aqqutigalugu kontomik aamma nalunaarsuisinnaavutit. Uanili maluginiaruk atuutilersitsissummik kodimik nassinneqassagavit, koderlu atugassat allakkat nalinginnaasut atorlugit nassiunneqassaaq.

NemKontu pillugu sullissivik.gl -imi paasisaqarnerusinnaavutit: https://www.sullissivik.gl/Emner/B_NemKonto/NemKonto?sc_lang=kl-GL