Akeqanngitsumik ajunngitsorsiat sulisitsisut nalunaarsorsimaffianniissapput
Indhold
Akeqanngitsumik ajunngitsorsiat tassaapput sulisitsisup sulisuminut atugassiissutai. Taakku tassaasinnaapput inissiami ineqartitaaneq, biileqartitaaneq imaluunniit qimusseqartitaaneq. Tassaasinnaapputtaaq akeqanngitsumik nerisaqarlunilu ineqarnerup imaluunniit oqarasuaatip sulinerup avataani atugaasup nalingat.
Akeqanngitsumik ajunngitsorsiat nalingi akileraaruteqaataasussaapput. Akeqanngitsumik ajunngitsorsiat tamarmik aningaasarsiatut A-tut akileraaruserneqartarput.
Sulisorisatit akeqanngitsumik ajunngitsorsianik sunik atugassaqartinneritit nalunaarutigissallugu illit sulisitsisutut pisussaaffigaat
Akeqanngitsumik ajunngitsorsiat nalingi illit sulisitsisutut eqqunngitsumik nalunaarutigisimagukkit pillaammik akiliisinneqarsinnaavutit.
Akeqanngitsumik ajunngitsorsiat – suut akileraaruserneqartarpat?
Akeqanngitsumik ajunngitsorsiat ukioq 2023 aallarnerfigalugu aningaasarsiatut A-tut akileraaruserneqartalerput. Akeqanngitsumik ajunngitsorsiat makku nalingi akileraaruserneqartarput:
Biilit
Oqarasuaat (Akiliunneqarluni oqarasuaateqarneq aamma akiliunneqarluni internetseqarneq - Ilitsersuut 2026)
Internet (Akiliunneqarluni oqarasuaateqarneq aamma akiliunneqarluni internetseqarneq - Ilitsersuut 2026)
Akiliunneqarluni angalanerit
Nerisaqarneq
Ineqarneq
Inissiaq
Akeqanngitsumik najugaqarallarneq aamma utaqqiisaasumik najugaqarallarneq
Akeqanngitsumik ajunngitsorsiat akileraaruserneqartussat nalingisa angissusilerneqarneri ukiumiit ukiumut allanngorartuupput. Taakku uani takusinnaavatit:
Nalingisa angissusilerneqarneri nutartikkat aamma sulisitsisut nalunaarsorsimaffianni, ajunngitsorsiat nalingisa akileraarusigassat suliffeqarfinnit nalunaarutigineqartarfianni sulinal.nanoq.gl-imiipput.
Atorfeqartut ilaat ukiumut ataasiarlutik akileraarusigassaanngitsumik akiliunneqarlutik angalasinnaapput. Tassaanerupput tjenestemandit ilaat.
Sulisorisavit atorfinikkiartorluni atorfimminnillu soraarluni angalaneri illit sulisitsisutut akilerukkit akileraaruteqaataassanngillat. Taamatuttaaq ippoq sulisorisat suliffeqarfimmi sumiiffimmut allamut nuutsikkukku.
Atorfeqartut ilaat ilaquttaminni qaniginerpaasaminni pinartumik napparsimasoqartillugu toqusoqartillugulu akiliunneqarlutik angalasinnaatitaapput. Taakkuttaaq akileraaruteqaataasussaanngillat.
Sulisitsisumit akiliunneqarluni angalanerit allat tamarmik sulinermut attuumassuteqanngitsut akileraaruteqaataasussaapput.
Akiliunneqarluni angalanerit akeqanngitsumik ajunngitsorsiat allat assigalugit aningaasarsiatut A-tut akileraaruserneqartarput.
Akiliunneqarluni angalanerit tamarmik naleqarput akileraaruserneqartussamik.
Sulisorisavit akiliunneqarluni angalanera naliliunneqartumit akikinnerusoq illit sulisitsisutut akilerukku, sulisorisat angalanerup akivia tunngavigalugu akileraarusiiffigineqassaaq.
Sulisorisavit akiliunneqarluni angalanera naliliunneqartup akeqatigisaa akisunerusorluunniit illit sulisitsisutut akilerukku, sulisorisat angalanermut naliliunneqartoq kisiat tunngavigalugu akileraarusiiffigineqassaaq.
Naliliunneqartut angissusii ukiut tamaasa aaqqinneqartarput.
Akiliunneqarluni angalaneq sulisitsisup sulisitsisut nalunaarsorsimaffiannut nalunaarutigissavaa. Naliliunneqartut angissusii nutartikkat sulisitsisut nalunaarsorsimaffianni uaniipput sulinal.nanoq.gl
Sulisitsisup akiligaanik angalanerit akileraaruserneqartarnerat pillugu ilitsersuut:
Ilitsersuummi ersarissumik nassuiarneqarpoq sulisitsisoq sunik akiliussisinnaanersoq akileraarutaasariaqanngitsunik. Assinganik aamma ersarissumik nassuiarneqarpoq inatsit suut atuunnersut sulisitsisup akiligaanik ilaquttat angalatinneqartarnerinut.
Ilitsersuut sulisitsumut sulisumullu paasiuminarsarlugu allagaavoq, assersuutinillu pisunut assigiinngitsunut tunngasunik aamma peqarluni. Aammattaaq suli pisariinnerulersikkumallugu ilitsersuummik naalisakkamik atorneqakkajuttunik imalimmik sananikuuvugut.
Sulisitsisup akiligaanik angalanerit akileraaruserneqartarnerannut ilitsersuut uani aasinnaavat
Sulisitsisup akiligaanik angalanerit pillugit akileraartarnermi maleruagassanut ilitsersuut-naalisagaq uani aasinnaavat
Akeqanngitsumik najugaqarallarnerup nalinga 2013 aallarnerfigalugu akileraaruserneqartalerpoq. Inissiat utaqqiisaasumik najugaqarallarfiit aamma akeqanngitsumik najugaqarallarfiit tassaapput inissiat, atorfeqartitaanermut atatillugu sulisunut inissiamik ataavartumik najugarisassamik tunineqannginnermi najugarineqartut, matumani ilanngullugit ineeqqat, inissiaaqqat igaffeerallit il.il.
Nalingata akissarsianik nalunaarutiginninnermut ilanngullugu sulisitsisut nalunaarsorsimaffiannut nalunaarutigineqarnissaa sulisitsisup pisussaaffigaa.
Akeqanngitsumik ajunngitsorsiat pillugit apeqqutissaqaruit sulisitsisut nalunaarsorsimaffiat attavigisinnaavat.
Sulinal (Sulisitsisut nalunaarsorsimaffiat)
Oqar.: (299) 34 60 81
E-mail:sulinal@nanoq.gl