Sulisitsisut nalunaarsorsimaffiat www.sulinal.nanoq.gl-imiittoq nunami maani akissarsiat, akileraarutit, soraarnerussutisiassat il.il. qitiusumik nalunaarutigineqartarfigaat. Tassani nalunaarsortissinnaavutit, ilitsersorneqarsinnaallutit ikiorneqarsinnaallutillu. Paasissutissat tamarluinnarmik sulisitsisut nalunaarsorsimaffianni ingerlaavartumik nutartigaasarmata ilisarititsineq manna aallarniutaannaavoq.
Suliffeqarfiutit ataatsimik amerlanerusunilluunniit sulisoqalerpat suliffeqarfik Sulisitsisut nalunaarsorsimaffiannut nalunaarsortissavat aammalu akissarsiat, akileraarutit soraarnerussutisiassallu nalunaarutigisartussaallugit. Sulisoqarunnaaruit nalunaarsorsimaffimmit peerneqarnissat nalunaarutigissavat. Suliffeqarfiutinni inummik ataatsimik sulisoqalerniariarlutit sulisitsisutut inissisimalissaatit. Apeqqutaanngilaq sulineq sivikitsuinnaanersoq sivisunerunersorluunniit.
Tassa imaappoq sulisitsisut tamarmik Sulisitsisut Nalunaarsorsimaffiat atugassaraat. Sulisitsisut Nalunaarsorsimaffiata illit sulisitsisutut atugassatit tamaasa imarai, tassa akissarsianut, akileraarutinut, AMA-mut, soraarnerussutisiassanut, akeqanngitsumik ajunngitsorsianut il.il.
Sulisitsisutut imaaliortussaavutit
- Akissarsiortut skattekortii tigussallugit paasissutissallu skattekortimiittut Sulisitsisut Nalunaarsorsimaffianni nalunaarsussallugit
- Sulisut aningaasarsianik A-nik akissarsisitsinerit tamaasa akileraarutissaat naatsorsussallugit
- Maleruagassat immikkut ittut malillugit feriarnersiassat akileraarutitassaat naatsorsussallugit
- Akissarsiortup akissarsisinneri tamaasa taanna aningaasarsiat A-t akileraarutillu A-t naatsorsorneqarfiannik tunissallugu
- Qaammammi qaangiuttumi aningaasarsiat A-t, akileraarutit A-t aamma AMA-mut akiliutissaq pillugit nassuiaammik Sulisitsisut Nalunaarsorsimaffiat aqqutigalugu qaammatip tulliani nassiussisassaatit
- Qaammammi qaangiuttumi akileraarutit A-t unerartinneqartut kiisalu AMA-mut akiliutissaq qaammatip tulliani Akileraartarnermut Aqutsisoqarfimmut akilertassavatit
- Qaammatisiutit malillugit ukiut qaangiunneri tamaasa akissarsiat allagartaat (A11-t), sulisut ataasiakkaat aningaasarsiaat A-t akileraarutaallu A-t unerartinneqarsimasut pillugit paasissutissanik imallit tunniuttassavatit. Ilanngullugittaaq nalunaarutigissavatit sulisorisat soraarnerussutisiaqarnissamut aaqqissuussinerannut imaluunniit inuunermut sillimmasiissutaannut akiliutit, nunami allami soraarnerussutisianut akiliutit kiisalu tamakkiisumik ilaannakuusumilluunniit ajunngitsorsiat, soorlu akeqanngitsumik nerisaqarlunilu najugaqarnerup, ineqarnerup, ineqarallarnerup, angalanerit, biileqarnerup aamma oqarasuaateqarnerup, interneteqarnerup il.il. nalingisa aningaasartaat. Paasissutissat tamakku sulisitsisut nalunaarsorsimaffiannut sulisunullu tunniunneqartussaapput.
Uani annertunerusumik takusaqarsinnaavutit www.sulinal.nanoq.gl.