Suliffeqarfiit ukiumi qaangiuttumi sulisuminnut akissarsisitsisimasut tamarmik akissarsiat allagartaannik ukiumoortunik suliaqartussaapput.
Sulisutit ukiup qaangiuttup ingerlanerani akissarsisissimasatit tamaasa pillugit akissarsiat allagartaannik ukiumoortunik sulisitsisut nalunaarsorsimaffiannut ukiup qaangiunnerani tunniussissaatit. Akissarsiat allagartaat ukiumoortoq aamma taaneqartarpoq ”Sulisut aningaasarsiaat pillugit paasissutissaq” imaluunniit ”A11”-mik taaginnarneqartarluni.
Kiisalu akissarsianut aningaasartuutivit tamarmik katillugit naatsorsorneqarfiannik tunniussissaatit.
Taanna taaneqartarpoq ‘Akissarsiarititanut il.il. nalunaarut 20XX-imut’ imaluunniit “A10”-mik taaginnarneqartarluni. Qarasaasiakkut nalunaaruteqartaruit katinneqarnerat taanna automatiskimik pisarpoq. Imaappoq immersugassaq atorlugu nalunaaruteqartaruit aatsaat A10 atussavat.
Suliffeqarfiit namminersortut aamma pisortat suliffeqarfiutaasa qanoq nalunaaruteqartarnissaasa assigiinngissuteqarnerat sianigiuk.
Akissarsiat allagartaat ukiumoortoq tunniunniarukku suliffeqarfiutiliussaatit ukiup siuliani sulisunut akissarsisitsinikoq aamma sulisitsisutut pisussaaffeqarputit Sulisitsisut Allattorsimaffianut ilanngunnissarnut.
Pisussaaffigivat sulisunut paasissutissiissutigissallugu, qanoq akissarsiat akileraarutillu ukiumi pineqartumi annertutigisimanersut.
Sulisitsisutut pisussaaffigaat naatsorsuutit suliarineqarnissaa, aningaasarsiat A-t aammalu akissarsiat A-t qanoq annertutigisimanersut nalunaarutigissallugit. Akissarsiat naatsorsorneri bilag-itut ukiuni 5-ani toqqorsimasuutigineqassapput, ukiup naanera ilanngullugu.
Qarasaasiakkut nalunaaruteqarneq
Akissarsiat allagartaat ukiumoortut sulinal.nanoq.gl aqqutigalugu nalunaarutigisinnaavatit.
20-nik amerlanerusunilluunniit sulisoqaruit qarasaasiakkut nalunaaruteqartassaatit.
Akileraartarnermut Aqutsisoqarfik qarasaasiakkut nalunaarusiornissannut ilitsersuummik sananikuuvoq.
”Ukiumut akissarsiat allagartaannut ilitsersuut”.
Immersuiffissaq atorlugu nalunaaruteqarneq
Akissarsiat allagartaannik ukiumoortumik immersugassaq atorlugu nalunaaruteqaruit, taava uku immersorlugillu tunniutissavatit
• A11: ”Aningaasarsiat pillugit paasissutissat 20xx-imut”
• A10: ” Akissarsiarititanut il.il. nalunaarut 20xx-imut”
Immersukkatit imatut tunniussinnaavatit:
• sumiiffigisanni Akileraaruseriffimmut saaffiginnillutit
• uunga nassiullugit sulinal@nanoq.gl
Sulisunnut tamanut akissarsiat allagartaannik ukiumoortumik (A11) immersuissaatit, taannalu makkuninnga imaqassaaq:
• Sulisup kinaanera pillugu paasissutissat: CPR, ateq najugarlu.
• Kommune akileraarfik
• Suliffeqarfiutit pillugu paasissutissat, matumani ilanngullugit CVR aamma najugaq
• Piffissap suliffiusimasup nalunaarutigineqarnera
• Sulisup ukioq naallugu akissarsiamigut tunisamigullu aningaasarsiat A-t tamarmiusut
• Sulisup ukioq naallugu akileraarutai A-t unerartinneqartut tamarmiusut
• Sulisup soraarnerussutisiaqarnissamut aaqqissuussinermut nunami allamiittumut ukioq naallugu akiliutaasa akileraarutitaat A-t tamarmiusut
• Sulisup ukioq naallugu akeqanngitsumik ajunngitsorsiaasa nalingat. Taakku aningaasarsiatut A-tut nalunaarutigineqassapput
• Aningaasarsiat B-t nalunaarutigineqarneri
• Soraarnerussutisiassat pillugit paasissutissat. Sulisoq soraarnerussutisiaqarnissamut aaqqissuussinermik Kalaallit Nunaata avataaniittumik peqarpat tassunga akiliutit piffissami akiliiffiusumi akileraaruserneqassapput. Akiliutaasunit akileraarutit unerartinneqartoq amerlassusiat nalunaarutigissavat.
Ukioq tamakkerlugu kisitsisit naatsorsulerukkit, qaammatikkaartumik nassuiaatit sukumiisut siusinnerusukkut nassiussimasatit aallaavigigukkit pisariinnerussaaq.
Akileraartarnermut Aqutsisoqarfik ilitsersuusiornikuuvoq qanoq A11-imi immersuiffissat ataasiakkaat immersorneqarnissaanik.
A11-,ut immersornissaanut ilitsersuut.
A11-imut immersuiffissat
Ukiumut akissarsiat allagartaanut immersugassaq – sulisitsisut NAMMINERSORTUT: Isertitanut paasissutissat 20XX.:
Ukiumut akissarsiat allagartaanut immersugassaq – sulisitsisut PISORTAT: Isertitanut paasissutissat 20XX.
Ukiumi akissarsiarititat aamma soraarnerussutisianut tunngasut katinneqarneri kiisalu akileraarutit A-t katinneqarneri pillugit nalunaarut, akissarsiat allagartaat ukiumoortut (A11) tunngavigalugit suliarineqassaaq.
Akissarsiat allagartaat ukiumoortut qarasaasiakkut nalunaarutigineqanngippata A10-mi makku paasissutissiissutigissavatit:
• Suliffeqarfiutit pillugu paasissutissat, matumani ilanngullugit CVR, ateq najugarlu
• Ingerlatap suunera
• Kommune
• Piginnittoq
• Aningaasarsiat A-t akileraaruserneqartinnatik amerlassusii A11-lianniittut tamarmiusut
• Akileraarutit A-t unerartinneqarsimasut A11-lianniittut tamarmiusut
• Aningaasarsiat B-t A11-lianniittut tamarmiusut
• Sulisoqarnermut akileraarut, AMA
• Ukioq naatsorsuusiorfiusoq qaammatisiutit malillugit ukiumit allaaneruppat paasissutissat
• Akissarsiat allagartaat ukiumoortut (A11) ilanngullugit nassiunneqartut qassiuneri
• Atsiorneq aamma ulloq
Akileraartarnermut Aqutsisoqarfik ilitsersuummik sananikuuvoq qanoq A11-imi immersuiffissani ataasiakkaani immersuissanersutit.
A10 immersornissaanut ilitsersuut .
Immersuiffissaq A10.
Aningaasarsianut, soraarnerussutisiassanut il.il. nalunaarusiornissamut immersuiffissaq 20xx-A10.
Malugiuk
Paasissutissanik nassiutsitinnak qulakkeeqqaassavat ukiumi akissarsiarititat soraarnerussutisianullu tunngasut pillugit nalunaarummi (A10) kisitsisit tamarmiusut, sulisut tamarmik akissarsiaasa allagartaanni ukiumoortuni (A11) kisitsisit nalunaarutigineqartut katinneri amerlaqatigissammatigik.
Immersugassami allaqqavoq paasissutissat A10-miittut sorliit naatsorsuinissami katinneqassanersut.
Nalunaaruteqarnerit qarasaasiakkut pippat, taava paasissutissaativit nassiunneqarsimanerannut uppernarsaammik nassinneqassaatit.
sulinal@nanoq.gl-imut nassiussiguit mailikkut nassiussavit tiguneqarnera pillugu automatiskimik nalunaarfigineqassaatit.
Akileraartarnermut Aqutsisoqarfiup allaffiinut tunniussiguit pappialaatitit naqissuserneqassapput, assilineqarnerannillu tunineqarsinnaallutit.
Sulisitsisut nalunaarsorsimaffianni siullertut misissorneqartarpoq A11-ni paasissutissiissutitit tamakkerlutik A10-mi paasissutissiissutinnut imaluunniit qarasaasiakkut nalunaarutigisannut naapertuunnersut.
• Kisitsisit nikingassuteqanngippata nalunaarfigineqassanngilatit.
• Kisitsisit nikingassuteqarpata paasissutissanik iluarseeqqullutit qinnuigineqassaatit.
Paasissutissat nassiunneqartut kingusinnerusukkut misissuisoqassappat atugassatut toqqorneqartarput.
Akileraartarnermut Aqutsisoqarfik sulisitsisunik misissuiffiginnittarpoq, aammalu paasissutissiissutitit paasissutissanut allaneersunut sanilliussinnaallugit.
Kukkusumik nalunaaruteqarnerit
Akissarsiat allagaartaasa ukiumoortut, taakkualu akissarsiarititat pillugit nalunaarummi katinneqarnerisa eqqortuunissaat qulakkiissallugu pisussaavutit. Akissarsiat allagartaat ukiumoortut kukkusumik immersorneqarsimasut sulisitsisut nalunaarsorsimaffiata akueriumaneq ajorpai.
Akileraartarnermut Aqutsisoqarfik isumaqarpat nalunaarutigisatit kukkuneqartut, soorlu akeqanngitsumik ajunngitsorsiat eqqortumik nalunaarutigisimanngikkitit, taava paasissutissat iluarseqqullugit qinnuigineqassaatit pillaammillu akiliisinneqarlutit. Akileraartarnermut Aqutsisoqarfiup paasissutissiissutitit ukiut tallimat tikillugit uterluni misissuiffigisinnaavai.
Akissarsiat allagartaat ukiumoortoq Akileraartarnermut Aqutsisoqarfimmi sulisitsisut nalunaarsorsimaffiannut tunniunneqarsinnaavoq januarip 2-anniit januarip naanissaata tungaanut.
Suliffeqarfiutit ingerlakkunnaarukku nalunaaruteqarnissamut piffissaliussaq tassaavoq akissarsisitsinerup kingulliup kingorna kingusinnerpaamik ullut 10-t qaangiunnerat.
Akileraaruserinermik ingerlatsineq pillugu Inatsisartut inatsisaanni nr. 11, 2. november 2006-imeersumi §§-ini 30-mi, 31-mi 32-milu aalajangersakkat.