Akileraartarnermut allagartat Akileraartarnermut Aqutsisoqarfimmit decemberip 11-ani e-boksikkut nassiussuunneqarput. Juullilerneranilu aqutsisoqarfik arlalinnik nuannersunik nutaarsiassaateqarpoq. Ukioq nutaaq aallarnerfigalugu Sullissivik.gl ataani ”Akileraarutikka” aqqutigalugu digitalimik siumoortumik nalunaarsuisoqarsinnaalerpoq. Tamanna isumaqarpoq innuttaasut ataasiakkat aamma inuussutissarsiummik ingerlataqartut Akileraartarnermut Aqutsisoqarfiup innuttaasunut sullissivianukanngikkaluarlutik ukioq naallugu siumoortumik nalunaarsukkaminnik allanngortitsisinnaalernerannik
Ulloq manna tikillugu siumoortumik digitalimik nalunaarsuinissamut taamaallaat oktoberimiit novemberip 15-anut periarfissaqartarsimavutit. Ullullu taakkua avataanni siumoortumik nalunaarsukkannik allannguissatillutit Akileraartarnermut Aqutsisoqarfimmut ornigunnissat immersukkamilluunniit nutaamik nassiussinissat pisariaqartarsimavoq.
Ukioq 2025 aallarnerfigalugu ornigunnissat immersukkamilluunniit nassiusseqqaarnissat pisariaarutissaaq. Taarsiullugu Sullissivik.gl-imi ”Akileraarutikka” iserfigalugu ukiup tullianut isertitariumaagassatut aningaasartuutigiumaagassatullu naatsorsuutigisatit allattorsinnaalissavatit.
Aaqqissut inuussutissarsiummik ingerlataqartorpassuarnut, Akileraartarnermut allagartassaminnik tigusaqarsimatillutik decemberimi januarimilu Akileraartarnermut Aqutsisoqarfimmut saaffiginnittartunut ingammik pisariinnerulersitsissaaq, taamak oqarpoq Aqutsisoqarfimmi Pisortaq Kim Neumann.
Aaqqiissut akileraartartunut inuussutissarsiummillu ingerlataqartunut ukununnga immikkut sunniuteqassaaq.
- Ilinniakkamik ingerlataqartunut. Ilinniartorpassuit ilinniagaqarnermusiat (Aningaasarsiat B-t) saniatigut sulinermikkut aningaasarsianik A-nik isertitaqartarput. Ilinniakkamik ingerlataqartut Aningaasarsiatik B-t eqqortumik nalunaarsortarunikkit akileraarutissanut tapissanik akiliinissartik pinngitsoortissavaat.
- Namminersorlutik inuussutissarsiummik ingerlataqartut nikerartumik isertitallit ukiulluunniit tullianut ilanngaatissamik amerlassusissaannik suli qulakkerinninngitsut. Inuussutissarsiummik ingerlataqartut ukiup ingerlanerani suliffeqarfimminnut aningaasaliisimagunik ilanngaammik pissarsissutigisinnaavaat. Uanilu pitsaaqutaavoq Siumoortumik nalunaarsuinikkut ilanngaatissap atuutsiaarnerulersissinnaanera.
- Innuttaasunut ass. qamutinik motoorilinnik, umiatsiamik imaluunniit inimik/illumik pisinermi aningaasanik taarsigassarsisimasunut, taarsigassanik aaqqis-suusseqqissimasunut imaluunniit taarsigassarsiaminnik naammassinnissimasunut siumoortumik nalunaarsuinikkut eqqortumik akileraartarnerissaq qulakkeerneqarsinnaavoq.
Siumoortumik nalunaarsuiffissanik immersorsimasanik allanngortissimasanilluunniit Akileraartarnermut Aqutsisoqarfimmut tunniussisinnaaneq suli periarfissaajumaarpoq. Utaqqisarfimmili utaqqerataqarsinnaanerit naatsorsuutigissavat, Akileraartarnermut Aqutsisoqarfiup innuttaasunut sullissiviata januar qaammat ulaapaarfiginerpaasarmagu. Taamaattumik kajumissaarutigissavarput digitaalimik aaqqiissuterput misilittaqqullugu.