Siusinnerusukkut aggustusip qaammataani innuttaasut akileraarutinik utertoorutissatik pillugit kontonormuminnik paasissutissiiniarlutik Akileraartarnermut aqutsisoqarfimmi siuleriiaattarput. Ullumikkut akileraarutinit utertoorutit NemKonto atorlugu tunniunneqartarput, innuttaasullu aningaasanik utertuussanerlutik e-Boksiminni Sullissivik.gl-imiluunniit takusinnaavaat. Akileraartarnermullu aqutsisoqarfiup innuttaasut eqimattakkuutaat allarluinnaat oqaloqatigerusuppai; tassalu inuit annertoorujussuarmik akileraarutinut akileeqqittussatut nalunaarfigineqartut
Akileraarutinut inaarutaasumik naatsorsugaq aggustimi e-Boksimut takkukkaangat, amerlaneritigut akileraarutiminnit utertoortut amerlasuut aallunneqartarput. Innuttaasulli ilaasa nuannaarnartumik tusagaqarnerannut peqatigitillugu, innuttaasut eqimattat akileraarutinut akileeqqittussaanerminnik nalunaarfigineqartarput. Tamanna ajornakusoortitsisinnaasarpoq.
Pisortanut akiitsoqaruit, kisivit taama inissisimalersimanak ilisimassavat. Akileraartarnermut aqutsisoqarfiup akiitsutit akilersinnaanngilai, akiliisitsiniartarnermulli immikkoortortatta taakku annertussusilernerannik ikiorsinnaavaatsit, periarfissannillu ilitsersuullutit.
Kikkut tamarmik aningaasaqarnerminnik aqutsilernissaq soqutigisaraat. Akileraarutinut annertuumik akiitsoqaruit, Akileraartarnermut aqutsisoqarfimmik oqaloqateqarneq aallartifissaalluarpoq. Aggustip naanerani amerlasuut akileraarutinut akileeqqinnissamik nalunaarfigineqartut uatsinnik oqaloqatiginninnissaat neriuutigaarput. Anne HansenHeilmann, Akileraartarnermut aqutsisoqarfimmi akiliisitsiniartarfimmi allaffiup pisortaa taama oqarpoq.
Ukioq manna innuttaasut 8.466-it akileraarutinut akileeqqinnissaminnik nalunaarfigineqassapput. Akiligassat katillugit 213,4 mio. kr-nik amerlassuseqarput. Innuttaasut arlallit, akileraarutinut akiliutissaminnik 2025-mi ilanngaamminnut naatsorsuiffigineqartut, ingerlaannartumik akileraarutinut akiligassaminnik akiliinissamut periarfissaqarput. Eqimattat taakku kingusinnerpaamik ulloq 20. november nammineq piumassutsiminnik akiliilluarsinnaapput. Taamaalillutik ernianut tapiliussaq 6 procenti akilertariaqassanngilaat.
Eqimattat allat ingerlaannarlutik akiliinissamut aningaasatigut periarfissaqanngillat. Innuttaasullu taakku Akileraartarnermut aqutsisoqarfiup oqaloqatigerusuppai.
Aningaasatigut inissisimanerit periarfissanni apeqqutaavoq
Pisortanut akiitsoqaruit aningaasatigut inissisimanerit periarfissanni apeqqutaassaaq. Nalilinnik pigisaqanngikkuit, annikitsuaqqamillu isertitaqarlutillu annertuumik akiitsoqaruit, pisut apeqqutaatillugit akileraarutinut akiitsunnik isumakkeerinniffigineqarsinnaavutit. Isertitaqaruit akiitsuillu ilai annikitsut akilersinnaallugit, oqaloqatigiinneq soorlu kittaartumik akilersuinissamut tunngasinnaavoq. Isertitagissaaruit nalilimmilluunniit pigisaqarlutit, taava pisortanut akiitsuitit kittaartumik akilersorsinnaagitit naatsorsuutigaarput. Taamaattoqartillugu qanoq qanorlu pilertortigisumik akiliinerup ingerlanneqarnissaanik oqaloqatigiinneq imaqarsinnaavoq.
Oqaloqatiginninnissaq pillugu attaveqarit
Akileraartarnermut aqutsisoqarfik – Akiliisitsiniartarfik
Oqarasuaat: (+299) 34 60 85
E-mail: inddrivelse@nanoq.gl
Nutaarsiassat nuannersut – 2023-mut akileraarutinut akiliivallaarutit
Ulloq 29. august 2024 Akileraartarnermut aqutsisoqarfiup ukiumut akileraarusiiffimmut 2023-mut akileraarutinut akiliutigineqarpallaartut 234,6 mio. kr-nik annertussuseqartut innuttaasunut 24.189-inut akilissavai. Taakkunannga sulinermut ilanngaat 77,2 mio. kr-nik annertussuseqarpoq.
Taakkunannga 234,6 mio. kr-init ilanngaassinikkut 88,1 mio kr-t (akilerneqartut tamarmiusut 37,6 procentii) pisortanut akiitsunut matussutissatut akilersinneqarput. 38,8 mio. kr-t nunatsinni kommuninut, INI A/S-mut, Nukissiorfinnut il.il. akiitsunut matussutissatut ilanngaatigineqarput, sinneruttullu 49,3 mio. kr-t Namminersorlutik Oqartussanut akiitsunut matussutissatut ilanngaatigineqarput.
2023-mut akileraarutinut tapiliutissat pillugit
Akileraartarnermut aqutsisoqarfiup 2023-mut akileraarutinut tapiliutissat 213,4 mio. kr-t missaanniittut akileraartartuni 8.466-ini akiligassanngortippai. Taakkunannga sulinermut ilanngaammut 15,7 mio. kr-t ilanngaatigineqarput.
2023-mut inaarutaasumik akileraarutissannik naatsorsugaq akiliinissannik inerneqarpat, Akileraartarnermut aqutsisoqarfiup akileraarutinut akiliinerussutissat ilaat 18.000 kr-nik annertunerunngitsut ernianut tapiliut 6 procenti ilanngullugu naatsorsorsinnaavaa.
2023-mut akileraarutinut akiligassatit 2025-mut akileraarutinut ilanngaatinnut ilanngaatigineqarnerat tamatuma nassatarissavaa. Akileraarutinut tapiliussassanut ernianut tapiliussaq 6 procenti pinngitsoortikkusukkukku, akileraarutinut tapiliussassannut nammineq piumassutsit malillugu kingusinnerpaamik ulloq 20. november 2024 akiliinissamut periarfissaqarputit (§5 naapertorlugu akiliineq).
Akileraarutinut tapiliussassat 18.000 kr-init annertunerusut pingasunut agguarlugit qaammatit pingasut ingerlaneranni akiligassiissutigineqartarput. Akiligassat taakku Akileraartarnermut aqutsisoqarfiup allakkatigut nassiuttarpai.