Akileraartarnermut Aqutsisoqarfik Suila-tapinut naatsorsuutinik nutaanik nassiussissaaq
Akileraartarnermut Aqutsisoqarfiup tamatuma kingorna paasivaa innuttaasut arlallit paasissutissanik kukkuneqartunik nassinneqarsimasut.
Nutaarsiassaq
2025-mi januaarip aallaqqaataa aallarnerfigalugu sulinermut ilanngaat Suila-tapitut tunniunneqartalerpoq. Akileraartarnermut Aqutsisoqarfiup aggustip 20-ani Suila-tapinut Ukiumoortumik naatsorsuutit siulliit nassiuppai. Akileraartarnermut Aqutsisoqarfiup tamatuma kingorna paasivaa innuttaasut arlallit paasissutissanik kukkuneqartunik nassinneqarsimasut. Taamaattumik innuttaasut 22.000-it tikillugit Suila-tapinut ukiumut naatsorsuutaat iluarsineqassapput. Tamatuma kingunerissavaa innuttaasut ilaasa Suila-tapinut utertitassaat annertunerulissammata allallu utertitassaat annikinnerulissallutik. Innuttaasut ilaat aggustip 20-ani Suila-tapinut ukiumut naatsorsuutini siullerni allassimasumit annertunerusumik allallu annikinnerusumik tigusaqassapput. Suila-tapinut ukiumut naatsorsuutit nutaat nassiunneqareernerisigut aatsaat Akileraartarnermut Aqutsisoqarfik akiligassiissutinik nassiussissaaq aammalu aningaasanik tunniussissalluni.
Innuttaasut amerlasuut Suila-tapinut ukiumut naatsorsuutaat iluarsiivigineqassapput
2025-mi januaarip aallaqqaataaniit sulinermut ilanngaat innuttaasunut ukiumut 70.000 kr-it 500.000 kr.-illu akornanni isertitaqartunut tunniunneqartalerpoq. 2025-mi aningaasat isertitassatut ilimagineqartut tunngavigalugit tunniunneqarput.
Suila-tapinut ukiumut naatsorsuutini amerlasuuni paasissutissat ajoraluartumik iluarsineqarnissaat pisariaqarpoq. Akileraartarnermut Aqutsisoqarfiup kukkunerit assigiinngitsut pingasuusut makku paasivai:
Innuttaasunut naatsorsuinermi kukkuneq, innuttaasut 2025-ip ilaannaani Kalaallit Nunaanni tamakkiisumik akileraartussaatitaasut.
Kalaallit Nunaanni soraarnerussutisianut paasissutissat ilaannik nalunaarsuinermi Kukkuneq
Suliffeqarfiup soraarnerussutisianut akiliutai isertitat tunngavigisaannik naatsorsuinermi ilanngunneqarsimanngillat.
Innuttaasut ilaat Suila-tapinut ukiumoortumik naatsorsuutinik nutaanik nassinneqassapput. Paasissutissat nutaat kingunerisinnaavaat, siusinnerusukkut Suila-tapinut ukiumoortumik naatsorsuutini allassimasumit aningaasanik amerlanerusunik ikinnerusulluunniit pissarsisinnaagavit. Innuttaasunut 160-it missaaniittunut tamakkiisumik akileraartussaatitaanerup ulluinik naatsorsuinerit kukkuneqarput. Soraarnerussutisianut paasissutissanut kukkunernut marluusunut innuttaasut 22.000-it tikillugit eqqorneqarput.
Tulliuttuni qanoq pisoqassava
Maannakkut Akileraartarnermut Aqutsisoqarfiup Suila-tapinut ukiumoortumik naatsorsuutit iluarsiniarlugit ulapputigai. Akileraartarnermut Aqutsisoqarfiup naatsorsuutigaa innuttaasunut paasissutissaat iluarsineqartussat naammassineqareerpata Suila-tapinut ukiumoortumik naatsorsuutinik nutaanik septembarip qulingani tigusaqarsinnaassasut.
Akileraartarnermut Aqutsisoqarfik Suila-tapinut utertinneqartussanut akiligassiissutit aammalu Suila-tapit pisassat sinnerinik tunniussissaaq, Suila-tapinut ukiumoortumik naatsorsuutit nutaat nassiunneqareerpata aatsaat. Paasissutissat nutaat innuttaasunut nassiunneqareerpata, akiliinissamut piffissarititaasoq ullunik 30-nik sivisussuseqassaaq. Piffissarititaasoq nutaaq innuttaasunut Suila-tapinik utertitsisussanut atuutissaaq. Innuttaasut pineqartut e-Boksikkut akiliinissamut nalunaarummik nassinneqassapput.
Malugiuk, akiliinissamut piffissarititaasoq tamanna akileraarnikippallaarsimalluni akileraarutissanut sinneruttunut, novembarip 20-ani 2026-mi ukiup tulliani ilanngaatinut ilanngunneqartunut, imaluunniit Pigisanit pissarsiat ilaasa akileraarutaannut (KAS-imut) septembarip 20-ani 2026-mi akiligassanut piffissarititaasumik allanngortitsinngimmat.
Suila-tapinut ukiumoortumik naatsorsuutit nutaat tigoreerukkit apeqqutissaqaruit Akileraartarnermut Aqutsisoqarfik attavigisinnaavat.
Inatsisartut inatsisaannut innersuussutit – Aningaasarsianit akileraarutit pillugit inatsit
Sulinermut ilanngaatip naatsorsorneqartarnera tunniunneqartarneralu
§ 38 f. Akileraaruseriffiup aningaasarsianut tunngaviusunut, ukiumi sulinermut ilanngaatip katillugu nalinganut aammalu sulinermut ilanngaataagallartumut qaammatikkaartumik tunniunneqartumut naatsorsukkat, kingusinnerpaamik ukiup isertitaqarfiusup kingorna ulloq 1. september nassiutissavai. Sulinermut ilanngaammi annikinaarlugit tunniussisimanermi, naatsorsukkat nassiunneqareernerisa kingorna kingusinnerpaamik qaammatip ataatsip qaangiunnerani, taakkua tunniunneqassapput. Annertunaarlugit sunniussisimanermi § 38 g malillugu akiliisitsisoqassaaq.
Imm. 2. Aallartitseqqinnermi sulinermut ilanngaammut 2.000 koruuninik annertunerusumilluunniit tunniussisoqartussanngussappat, imm. 1 malillugu naatsorsuineq aallarteqqinneqarsinnaavoq.
Utertillugit akiliisarneq
§ 38 g. Sulinermut ilanngaammut annertunaarlugit tunniussisimanermi, annertunaarlugit tunniunneqarsimasut, inuup kingusinnerusukkut ukiup isertitaqarfiusup pineqartup ingerlanerani imaluunniit ukiumi isertitaqarfiusumi kingusinnerusumiittumi sulinermut ilanngaammik tunniussinissamik piumasaqaataani, ilanngaatigineqassapput.
Imm. 2. Sulinermut ilanngaammi annertunaarlugit tunniunneqarsimasut, imm. 1 malillugu akilersinneqarsinnaanngitsut, piumasaqaat katillugu 2.000 koruuninit annertuneruppat, peqqusissuteqarnermi utertillugit akilerneqassasut piumasarineqarsinnaavoq. Tamakkiisumik akileraartussaatitaajunnaarnermi, sulinermut ilanngaat annertunaarlugu tunniunneqarsimasoq oqaaseqatigiit siulliit malillugit akilersinneqassaaq. Utertillugit akiliinissamut piumasaqaatit ulloq akiligassanngorfiat tassaavoq, peqqusissuteqarluni akileeqqusinissamut aalajangiinerup qaammat kingorna qaammammi ulluinnaq siulleq. Ulloq akiliiffissaq kingulleq tassaavoq qaammat akiliiffissami ulluinnaq kingulleq. Ulloq piffissaq eqqorlugu akiliiffissaq kingulleq sapaataappat imaluunniit nalliuttuuppat imaluunniit arfininngorneruppat, killigititaq ulluinnarmut tullermut sivitsorneqassaaq.
Imm. 3. Sulinermut ilanngaammut annertunaarlugit tunniussisimanermi akileqqusat akileraartarnermut akiliutissatut isigineqassapput, akileqqusallu Kalaallit Nunaanni eqqartuussisarnermik inatsimmi § 598, imm. 2, nr. 3 aamma Aningaasarsianit akileraarutit pillugit Inatsisartut inatsisaanni §§ 100 aamma 101 naapertorlugit pinngitsaaliilluni akileqquneqarsinnaapput.
Imm. 4. Sulinermut ilanngaatip annertunaarlugu tunniunneqarsimasup akilersinneqartarnera pillugu aammalu sulinermut ilanngaammi kingusinnerusukkut piumasaqaateqarnerup tamakkiisunngortinneqarnissaa pillugu maleruagassanik erseqqinnerusunik Naalakkersuisut aalajangersaasinnaapput.
Qulaani paasissutissanut apeqqutissaqaruit (innuttaasunit)
Akileraartarnermut Aqutsisoqarfik oqarasuaat +299 34 65 10-mut sianerlutit imaluunniit uunga allallutit: tax@nanoq.gl