Akileraartarnermut Aqutsisoqarfik akileraarutigivallaakkanik 223,2 mio. kr.-it nalinginik utertitsissaaq

Akileraartarnermut Aqutsisoqarfiup inaarummik naatsorsuutit akileraartartunut 49.266-inut e-Boksikkut nassiussorpai.Inaarummik naatsorsuummi akileraarpallaarsimanerlutit imaluunniit akileraarnikippallaarsimanerlutit takusinnaavatit. Siullermeersumik Suila-tapinut naatsorsuutit aamma nassiunneqassapput – sulinermut ilanngaammik tunniussat. Tamatuma saniatigut akileraartartut soraarnerussutisiaqalernissamut peqataasussaatitaanermut Ileqqaarnermut ukiumoortumik naatsorsuutit aamma KAS-imut (pigisanit pissarsiat akileraarutaannik) naatsorsuutit tigussavaat.

Aggustip 20-aniit e-Boksinni Inaarummik naatsorsuutit takusinnaassavatit. Aggustip 21-aniit Sullissivik.gl-imi ’Akileraarutikka’-mi takusinnaalissavatit. Inaarummik naatsorsuutit tassaapput siorna akileraarutinut tunngatillugu takussutissiaq. Tassani takuneqarsinnaavoq isertitatit, ilanngaatitit kiisalu akileraarutit akilersimasatit. Aammattaaq takuneqarsinnaavoq akileraarpallaarsimaguit utertuussanerlutit imaluunniit akileraarnikippallaarsimallutit akileraarutissavit sinnerinik akiliissanerlutit.

Akileraarutaavallaarsimasunik utertitsineq

Kingusinnerpaamik aggustip 31-iani 2026-mi Akileraartarnermut Aqutsisoqarfiup ukiumut akileraarfiusumut 2025-mut tunngatillugu akileraarpallaarutit katillugit 283,2 mio. kr.-it akileraartartunut akileraarpallaarsimasunut 24.426-nut utertissavai.

283,2 mio. kr.-it ilaat 60,0 mio. kr.-it (tunniunneqartussat tamarmiusut 21 %-iisa missingi) ilanngaassinikkut, inangiinikkut arsaarinninnikkulluunniit pisortanut akiitsunut matussutissatut akilersinneqarput. Akileraartarnermut Aqutsisoqarfik katillugu 223,2 mio. kr.-nik innuttaasunut utertitsissaaq.

Utertuussaguit Akileraartarnermut Aqutsisoqarfiup aningaasat Nemkontonnut toqqaannartumik ikissavai.  Toqqaannartumilli ikisinissaq Nemkontoqaruit aatsaat pisinnaavoq.  Nemkontoqanngikkuit akileraarpallaarutivit tunniunneqarnissaat utaqqissikkallarneqassapput. Nemkontoqanngikkuit pilersitsisariaqarputit Nemkontotaareeruillu Akileraartarnermut Aqutsisoqarfimmut tamanna nalunaarutigalugu. Tamatuma kingorna Akileraartarnermut Aqutsisoqarfiup akileraarpallaarutitit Nemkontonnut ikissavai.

Akileraarutissat sinneri

2025-mut tunngatillugu akileraarutissat sinneri 132,5 mio. kr.-it akileraartartunut akileraarnikippallaarsimasunut 3.398-nut akiligassiissutigineqassapput.

2025-mut inaarummik naatsorsuutip takutippagu akileraarutinut akiliinikippallaarsimasutit, taava Akileraartarnermut Aqutsisoqarfiup akileraarutissat sinnerisa ilaat 18.000 kr.-it nalingi   nuussinnaavai, ernialiussaq 6% ilanngullugu.

Tamanna ima paasineqassaaq, 2025-mut akileraarutissavit sinneri 2027-mi akileraarutitigut ilanngaatissavit millisinneratigut akilersinneqassapput. Akileraarutit sinnerinut ernialiussaq 6% sipaarusukkukku periarfissaraat akileraarutit sinnerisa nuunneqartut nammineq kajumissutsinnik akilernissaat (§5 naapertorlugu akiliuteqarnikkut) tamannalu kingusinnerpaamik pissaaq novembarip 20-ani 2026-mi, aningaaserivimmi konto 6471-1002608 atorlugu akiliinikkut. Akiliutitit tassaapput akileraarutit sinnerinut akiliutit, ernialiussaq 8 % ilanngullugu.

Akiliinermi allallugit ilanngutissavatit cpr-it aamma ”/2025/§5”.

Akileraarutissat sinnerisa ilaat 18.000 kr.-inik ilanngakkat naafferaartumik akilersorneqassapput, 2026-mi septembarimi, oktobarimi novembarimilu. Akileraarutissat sinneri akilerneqanngippata qaammammut 1 %-imik ernialersorneqassapput taannalu akileraarutissat sinnerisa tamaasa akilerneqarnissaasa tungaanut ingerlanneqassalluni.

Suila-tapit

2025-mi januaarip aallaqqaataaniit sulinermut ilanngaat innuttaasunut ukiumut 70.000 kr-it 500.000 kr.-illu akornanni isertitaqartunut tunniunneqartalerpoq. 2025-mi aningaasat isertitassatut ilimagineqartut tunngavigalugit tunniunneqarput. Maanna 2025-mut isertitaviit ilisimaneqalermata, Akileraartarnermut Aqutsisoqarfik aamma Suila-tapinut ukiumoortumik naatsorsuutinik nassiussisinnaalerpoq. Suila-tapinut ukiumoortumik naatsorsuutit tunngavigalugit Suila-tapit tunniunneqartut amerlavallaarsimanersut imaluunniit amigartunik tunineqarsimanersutit paasineqarsinnaanngorpoq. 2.000 kr.-nik amerlanerusunik tunineqarsimaguit, taakku utertillugit akilissavatit. 0 kr.-it 2.000 kr.-llu akornanni amerlavallaartunik tunineqarsimaguit, aningaasat taakku 2026-ip ingerlanerani tunniunneqartartuni naatsorsuinermut ilanngunneqassapput. Amigartunik tunineqarsimaguit, aningaasat NemKontonnut ikineqassapput.

2025-mut soraarnerussutisiaqalernissamut aaqqissuussinermut peqataasussaatitaaneq pillugu takussutissiaq

Inaarummik naatsorsuutit Suila-tapinullu ukiumoortumik naatsorsuutit peqatigalugit 2025-mut soraarnerussutisiaqalernissamut aaqqissuussinermut peqataasussaatitaanermut naatsorsuutit aamma tigussavatit.

Soraarnerussutisiaqalernissamut aaqqissuussinermut peqataasussaatitaanermut naatsorsuutini takusinnaavat ileqqaartussaatitaanerit naammassisimanerlugu. 2025-imut soraarnerussutisiaqalernissamut ileqqaarnermut akiliinissamik nalunaarummik tigusaqaruit, akiliisimanerit pillugu uppernarsaatit Akileraartarnermut Aqutsisoqarfimmut nassiutissavatit.

Malugiuk, 2025-imut nammineq soraarnerussutisiaqalernissamut ileqqaarnissamut akiliinngitsoorneq 2027-imi akileraarutit allagartaani akileraarutit procentiata qaffanneqarneratigut akilersinneqassanngimmat. Taamaattumik inatsimmik malinninnissaq innuttaasup nammineq akisussaaffigaa.

Ukiumoortumik naatsorsuutinni allassimappat 2025-mut ileqqaarnissannut pisussaaffiit naammassisimagit, annertunerusumik iliuuseqaqqittariaqanngilatit.

KAS

Pigisanit pissarsiat akileraaruserneqartarnerannut naatsorsuutit
Naatsorsuutit sisamat nassiunneqartut akornanni kingullertut Akileraartarnermut Aqutsisoqarfiup 2025-mut pigisanit pissarsiat akileraarutaannut (KAS-imut) naatsorsuutit nassiutissavaa.

Pigisanit pissarsiat akileraarutaat tassaavoq soraarnerussutisiaqalernissamut ileqqaakkanit inuunermullu sillimmasiissutit ilaannut Kalaallit Nunaata avataani inissinneqarsimasunut – amerlanertigut Danmarkimi imaluunniit Savalimmiuni – iluanaarutinit akileraarut.

Kalaallit Nunaanni tamakkiisumik akileraartussaatitaaguit, aammalu Kalaallit Nunaata avataani soraarnerussutisiaqalernissamut ileqqaagaqaruit imaluunniit inuunermut sillimmasiissuteqaruit, taakkunannga iluanaarutit 15,3 %-mik akileraaruserneqarsinnaapput.