Akileraartarnermut Aqutsisoqarfik Namminersorlutik Oqartussanut ilaavoq. Suliat assigiinngitsorpassuit iluanni ilinniagallit atorfininnissamut periarfissaat pitsaasut neqeroorutigaavut.

Innuttaasunik sullissivik

Innuttaasut innuttaasunik sullissivimmi qanimut naapissavatit. Innuttaasut suliffeqarfiillu akileraartarnermut, soraarnerussutisiassanut il.il. tunngatillugu ikiorneqarnissamik pisariaqartitaat suulluunniit isumagisarpavut. Assigiinngitsorpassuit pillugit ilisimasaqarpugut, immikkoortoqarfinnilu suliaqarfinnik assigiinngitsunik ilisimasaqarluartut suleqatigilluarlutigik.

Piffissat ilaanni ulapittarpugut, immitsinnulli ilassilaarnissatsinnut piffissaqartuaannarluta. Suleqatigiinnitsinni suliassagut ammasumik oqaluuserissallugit ileqqoraarput. Inuit allat isoriniarnagit nammineq kukkussutivut ilinniutigalugit aaqqiiniarluta sulisarpugut. Tassa imaappoq iluaqutaalluaqaagut.

Siunissami suleqatigiinnissarput suleriaatsit taakku tunngavigalugit ineriartortissavarput, taamaaliornitsigullu innuttaasut suli amerlanerusut akileraartarnermut tunngasunik paasinnilersillugit.

Akileraarutit, nakkutilliineq aamma sulisitsisut nalunaarsorsimaffiat

Innuttaasut tamarluinnarmik suliffeqarfiillu tamarluinnarmik Akileraarutit Nakkutilliinerlu pillugit immikkoortortaqarfik aqqutigalugu akileraartarnikkut attaveqartarput. Akileraaruserinermi pisussat malinneqarnissaat isumagaarput, innuttaasut suliffeqarfiillu tamarmik inatsisit periarfissarititaat malillugit assigiimmik naligiimmillu pineqarnissaat siunertaralugu. Tamanna isumaqarpoq innuttaasunut ataasiakkaanut annertuumik pingaarutilinnik aalajangiisariaqartartugut. 

Suliffeqarfiit akileraarutit pillugit nalunaaruteqartarneranni sulisitsisut nalunaarsorsimaffiannit sullittarpavut. Illit allallu eqqortumik akissarsisinneqarlusilu akileraartinneqarnissarsi qulakkeereqataaffigaarput.

Ilisarnaatigaavut misissuilluartarneq, kisitsisilerillaqqissuuneq aammalu suut naleqquttuullutillu naapertuilluartuunerannik tappiffiginninneq. Piginnaasat naleqartitallu taakku akuuffigisinnaasorigukkit, taava immaqa suleqatigiligassaraatsigit.

Aningaasaqarneq naatsorsuutillu

Akileraartarnermut Aqutsisoqarfiup Aningaasaqarnermut Immikkoortortaa Nunatta aningaasaqarnerata motooreraa. Akileraarutinik akitsuutinillu nuna tamakkerlugu akiliisarneq aqutaraarput. Akiitsuutinik akiligassiineq aqutaraarput. Nunarput ukiut tamaasa Aningaasaqarnermut inatsisiliuunneqarsinnaaqqullugu Aningaasaqarnermut Naalakkersuisoqarfik suleqatigaarput.

Taava aamma Akileraartarnermut Aqutsisoqarfiup nammineq aningaasaqarnera naatsorsuutaalu isumagisaraavut. Immikkoortortaqarfimmi nuannersumi, ataqqeqatigiiffiulluartumi aningaasaqarnikkullu tatiginaateqarluartumi  peqataarusukkuit, taava Aningaasaqarnermut Immikkoortortaq ilinnut immaqa naleqquttuuvoq.

Ilanngaaserisoqarfik

Anngiortumik eqqusseriaraluartunik naammattoorsisoqarsimanera pillugu nutaarsiassiisoqaraangat tamatigut uagut – amerlasuutigullu aamma qimmivut – tassaasarput nassaartuusut. Suliavut ullormiit ullormut allanngorartorujusuupput, suliassanillu naammassinninniarnermi amerlasuutigut pissanganartorsiornartarpoq.

Ilanngaaserisoqarfik ineriartortinneqassasoq politikkikkut aalajangiussaavoq, taamaammallu nutaanik suleqateqalernissarput qilanaaraarput. Eqqissisimasuuguit, aammalu inuuguit ileqqorissaartoq inussiarnersorlu, taava illiusimassaaq suleqatigilerusutarput.

Akiliisitsiniartarneq

Innuttaasut suliffeqarfiillu ilaat piffissat ilaanni ajornartorsiulersimallutik pisortanut akiitsoqalersimasarput. Innuttaasut akiitsoqaraluarlutik pisinnaatitaaffeqarnerat akiliisitsiniartarfimmi mianeraarput. Inuit akiitsullit aningaasaqarnikkut malinnaaleqqinnissaat siunertaralugu oqaloqatigisarpavut. Kisianni aamma misigissutsitsinnit aqunneqanngilagut. Innuttaasut suliffeqarfiillu akiliisinnaagunik, taava aamma akiitsuminnik akiliisussaapput.

Akiliisitsiniartarfimmi sulissagaanni inuttut piginnaaneqarluartariaqarpoq. Inuit ajornartoorsimallutik ikiorneqarnissamik pisariaqartitsisut eqqissisimasumik sullissinnaagukkit, taava illiusinnaavoq siunissami suleqatigiligassarput.

Pisortanik sullissineq kiisalu Ingerlatanut ineriartortitsivik

Naalakkersuinikkut aalajangiiffigisassat, taakkualu piviusunngortinneqartarneri qanimut suleqataaffigerusuppigit? Taava Akileraartarnermut Aqutsisoqarfimmi periarfissarpassuaqarputit. Naalakkersuinermik suliallit inatsisinik sivisuumik attuuttussanik aalajangersaasinnaaqqullugit, inatsisinik Inatsisartuni akuersissutigineqartunik piviusunngortitsisinnaaqqullugit aammalu innuttasut inatsisinik paasinnissinnaaqqullugit sulisussaavugut. Immikkoortortaqarfinnuttaaq taakkununnga ilaavoq Akileraartarnermut Aqutsisoqarfiup nammineq suliassaataanik ineriartortitsineq, suliaqarfiimmi assigiinngitsut ineriartortitassat namminerminnut tunngasut suliarineqarneranni tamatigut akuutinneqartussaammata. Suleqatigiit pisariusunik suliaqartut naammassisaqarluarnissaannik pingaartitsisuuguit, taava illit siunissami atorfissaqartippatsigit.