Iluanaarutisianit akileraarutit naatsumik oqaatigalugit
Aktieselskabit anpartsselskabillu Kalaallit Nunaanniittutut nalunaarsorneqarsimasut tamarmik iluanaarutisianik tunniussaqarnerminni pisassanngortitsinerminniluunniit, matumani aamma iluanaarutisiatut siumoorutinik ukiup ingerlanerani tunniussaqarnerminni, iluanaarutisianit akileraarutinik unerartitsinissamut, Aningaasarsianit akileraarutit pillugit Inatsisartut inatsisaanni aalajangersakkat (kapitali 8) malillugit pisussaapput.
Iluanaarutisiatut isigineqarput suulluunniit aktiaatilinnut pisassaritinneqartut tamarmik, taamaallaat aktiat akilersinnagit aktiaatilinnut tunniunneqartut aamma akiliisinnaajunnaarnermi pigisat aningaasanngortitaaneranni iluanaarutit pinnagit. Tamanna aamma atuuppoq anpartinik piginnittut iluanaarutisiaqartinneqarneranni.
Aktiaatillit / anpartiutillit suuneri apeqqutaatinnagit unerartitsisoqassaaq, tassa imaappoq apeqqutaanngilaq aktiaatillit / anpartiutillit inuunersut, selskabiunersut, peqatigiiffiunersut allaanersulluunniit.
Iluanaarutisianit akileraarutip akilernissaa
Iluanaarutisianit akileraarut Akileraartarnermut Aqutsisoqarfimmut akilerneqassaaq, tamannalu kingusinnerpaamik pissaaq qaammatip iluanaarutisianik tunniussinissamik pisassanngortitsinissamilluunniit aalajangerfiusup kingorna qaammatip tulliuttup ulluisa aallaqqaataanni. Piffissaagallartillugu akiliiffissaq kingulleq sapaataappat nalliuttuuppalluunniit imaluunniit arfininngorneruppat, taava akiliiffissaq ulluinnarmut tullermut sivitsorneqassaaq.
Iluanaarutisianit akileraarut kontonr. 6471-1002608-mut akilerneqassaaq. Akiliinermi ima oqaasertaliisoqassaaq ”selskabip CVR nr.-a \ ukioq akileraarfik \ ILUANAARUTISIAT”. Ukioq akileraarfik tassaassaaq ukioq selskabip naatsorsuusiorfia iluanaarutisiaqartitsiffiusoq.
Assersuut
Selskabip naatsorsuusiorfigaa qaammatisiutit malillugit ukioq, ukiumilu naatsorsuusiorfiusumi 2021-imi iluanaarutisiaqartitsinissamik april 2022-mi aalajangiilluni. Iluanaarutisiaqartitsinermik nalunaarummi (imm. 2) aamma akiliinermi allanneqassaaq ”2021”.
Iluanaarutisianit akileraarutinik akiliineq kingusinnerpaamik pissaaq ulloq 1. maj 2022, iluanaarutisiaqartitsinermillu nalunaarut kingusinnerpaamik nassiunneqassalluni ulloq 9. maj 2022.
Kingusinaarluni akiliinermi erniat qaammatit aallartinneri tamaasa 1%-iusut, aningaasat akilerneqartussanngorfianniit naatsorsukkat akilerneqassapput. Oqaatigineqassaaq akileraarutinik kingusinaarluni akiliinermi erniat, aningaasarsiat akileraaruteqaataasussat naatsorsorneranni ilanngaatigineqarsinnaanngimmata.
Iluanaarutisiaqartitsinermik nalunaarutip nassiunnissaa
Digitalimik immersuisinnaavutit uani
Selskabi iluanaarutisiaqartitsinermik nalunaarummik Akileraartarnermut Aqutsisoqarfimmut nassiussissaq kingusinnerpaamik, qaammatip iluanaarutisianik tunniussinissamik pisassanngortitsinissamilluunniit aalajangerfiusup kingorna qaammatip tulliuttup ulluisa 10-anni. Taamatuttaaq selskabit iluanaarutisiaqartitsiniaratik aalajangertut iluanaarutisiaqartitsinermik nalunaarummik, qaammatip aalajangerfiusup kingorna qaammatip tulliuttup ulluisa 10-at nallertinnagu nassiussissapput. Paasissutissanik piffissaagallartillugu nalunaaruteqarfissaq kingulleq sapaataappat nalliuttuuppalluunniit imaluunniit arfininngorneruppat, taava nalunaaruteqarfissaq ulluinnarmut tullermut sivitsorneqassaaq.
Iluanaarutisiaqartitsinermik nalunaarummi nalunaarneqassapput selskabip aqqa, CVR-normua, kommune akileraarfia, ulloq iluanaarutisianik tunniussinissamik aalajangerfik, ukioq selskabip naatsorsuusiorfia iluanaarutisiaqartitsiffiusoq, ulloq akiliiffik paasissutissaajunnartullu allat.
Makku aningaasartaat nalunaarneqassapput: Iluanaarutisiat tunniunneqartut / pisassanngortinneqartut, kingusinaarluni akiliisimagaanni erniat aamma kisitsit tamarmiusoq (akilerneqartussat katinnerat).
Iluanaarutisiaqartitsinissamik ulloq 1. januar 2020 aallarnerfigalugu aalajangiinerni iluanaarutisiaqartinneqartut pillugit paasissutissat nassiunneqassapput. Tamannattaaq atuuppoq aalajangiinernut ulloq taanna sioqqullugu pisunut, iluanaarutisiaqartinneqartulli pillugit paasissutissat 1. januar 2020-p kingorna aatsaat nassiunneqarpata. Piumasaqaat taanna Aningaasarsianit akileraarutit pillugit Inatsisartut inatsisaanni nr. 12, 2. november 2006-imeersumi, kingusinnerusukkullu allanngortinneqartartumi § 88, imm. 1, oqaaseqatigiinni siullerni allaqqavoq.
Iluanaarutisiaqartinneqartut pillugit nalunaaruteqarnermi nalunaarneqassapput pissarsisup CPR- / CVR- / TIN-normua, Atia, Najugaa aamma Nuna. Tassa imaappoq nuna iluanaarutisiaqartinneqartup angerlarsimaffia. Iluanaarutisiaqartinneqartunut tamanut tunngatillugu nalunaarneqassapput iluanaarutisiat tunniunneqartut / pisassanngortinneqartut (aningaasat iluanaarutisianit akileraarutit ilanngaatigineqartinnagit amerlassusiat).
Iluanaarutisiaqartitsinermik uppernarsaat
Kialuunniit iluanaarutisianik tigusisup pisassaqartitaasulluunniit, kinaassutsini naammaginartumik uppernarsarlugu piumasarisinnaavaa, tunniussisoq pisassaqartitsisorluunniit tunniussineq pisassaqartitsinerluunniit pillugu pissarsisumut tassunga uppernarsaassasoq. Taamatut uppernarsaaneq ”iIuanaarutisiaqartitsinermik uppernarsaat” atorlugu pissaq.