Inussutissarsiutinik ingerlataqartut tamarmik ukiumut ataasiarlutik nammineerlutik nalunaarsuisussaapput naatsorsuutinillu nassiussillutik. Kaaviiaartitatit, suliffeqarfiutivit sutut ingerlanneqarnera aamma ingerlatap suunera apeqqutaatillugit paasissutissanik assigiinngitsunik nalunaaruteqartussaavutit.

Nammineerlutit nalunaarsuinissannut aaku periarfissatit:

• MitID atorlugu Sullissivik-kut
• Immersugassaq immersorlugu naatsorsuutinillu ilallugu tax@nanoq.gl -imut nassiussinikkut imaluunniit Akileraartarnermut Aqutsisoqarfiup innuttaasunik sullissiviisa arlaannut nassiussinikkut.
• Akileraartarnermut Aqutsisoqarfiup nammineq toortaalluni sullissivia Akileraarutikka aqqutigalugu, tassungalu iserfissaavoq.

Akileraartarnermut Aqutsisoqarfiup nammineq toortaalluni sullissivia atorniarukku, kode nammineerluni nalunaarsuiffissami naqeriikkami Akileraartarnermut Aqutsisoqarfiup nassiussaani allaqqasoq atussavat.

Suliffeqarfiilli makku nassiussinissamut piffissaraat 1. maj

• Immersugassaq atorlugu nammineerlutik nalunaarsuisut tamarmik.
• Suliffeqarfiit aningaasarsiaminnik ukiumi aningaasarsiorfimmi siusinnerusumi missingersuinikkut angissusiliiffigineqarsimasut.

Qarasaasiakkut nalunaarsuiguit aningaasarsiatillu missingersorlugit angissusilerneqarsimanngippata, taava nammineerluni nalunaarsuinissamut piffisaraat 15. maj.

Nammineerluni nalunaarsuiffissaq piffissaagallartillugu nassiutinngikkukku akileraarutissatit kingusinaarneq pissutigalugu ullut aallartinneri tamaasa 200 kr.-inik ilaneqartassapput, 5.000 kr.-it tikillugit.

Selskabit nassiussinissamut piffissaraat 15. juni.