Aktieselskabit, interessentskabit aamma anpartsselskabit iluanaarutisianik tunniussinerminni pisassanngortitsinerminniluunniit akileraarutinik unerartitsisussaapput. Iluanaarutisiatut isigineqarput suulluunniit selskabip aktiaatilinnut pisassanngortitai, aktiaatit akilersinnagit aktiaatilinnut tunniunneqartut akiliisinnaajunnaarnermilu pigisat aningaasanngorlugit naatsorsorneranni iluanaarutit pinnagit.
Akileraarut taanna selskabimut namminermut akileraarutaanngilaq, tassaallunili akileraarut selskabip aktiaatillit / anpartiutillit sinnerlugit unerartillugulu akiligassaa. Eqqortumik akileraarusiinissaq suliffeqarfiup iluanaarutisisitsisup iluanaarutisiaqartullu akissussaaffigaat.
Iluanaarutisianit akileraarut iluanaarutisianik tunniussinissaq pisassanngortitsinissarluunniit akuersissutigineqarniariartoq akiligassanngussaaq. Akileraartarnermut Aqutsisoqarfimmut akilerneqassaaq, tamannalu kingusinnerpaamik pissalluni ullup akiligassanngorfiup kingorna qaammatip ataatsip qaangiunnerani. Kingusinaarluni akilerneqarpat erniat akilerneqassapput, ullormit akiligassanngorfimmiit qaammatit aallartinneri tamaasa 1%-imik angissuseqartut, taamaattorli minnerpaamik 500 kr.-it. Oqaatigineqassaaq akileraarutit kingusinaarluni akilerneqarneranni ernialiunneqartut aningaasarsiat akileraaruteqaataasussat naatsorsorneqarneranni ilanngaatigineqarsinnaanngimmata.
Selskabit iluanaarutisiaqartitsinissamik aalajangertut iluanaarutisianit akileraarutip akilerneqarneranut ilutigitillugu iluanaarutisiaqartitsinermut nalunaarut immikkut ittoq Akileraartarnermut Aqutsisoqarfimmut nassiutissavaat. Selskabit iluanaarutisiaqartitsiniaratik aalajangertut aamma iluanaarutisiaqartitsinermik nalunaarummik, aalajangernermik kingorna kingusinnerpaamik qaammatip ataatsip qaangiunnerani nassiussissapput.
Qarasaasiakkut ugguuna immersuisinnaavutit.
Iluanaarutisiaqartitsinermut nalunaarut (immersugassaq U1) kiisalu ilitsersuut uaniipput.
Kialuunniit iluanaarutisianik tunineqartup pisassaqalersinneqartulluunniit kinaanini naammattumik uppernarsarsinnaaguniuk piumasarisinnaavaa, tunniussisup pisassanngortitsisulluunniit tunniussineq pisassanngortitsinerluunniit atsiorlugu uppernarsassagaa. Atsiorneq taanna immersugassaq »iluanaarutisiaqartitsinermut uppernarsaat« atorlugu pissaaq.
Iluanaarutisiaqartitsinermut uppernarsaat (immersugassaq U2) uaniippoq.
Inatsit tunngavigineqartoq
Piumasaqaat Aningaasarsianit akileraarutit pillugit Inatsisartut inatsisaanni nr. 12, 2. november 2006-imeersumi, ilaatigut Inatsisartut inatsisaatigut nr. 41, 2. december 2019-imeersukkut allanngortinneqartumi, § 88, imm. 1-imi oqaaseqatigiinni siullerni allaqqavoq.