Amigartoorutitit ukiuni tulliuttuni tallimani ilanngaatigisinnaavatit. Taamaaliorsinnaanerli pisuni allani aammalu ingerlatani aalajangersimasuni sivisunerusinnaavoq.
Suliffeqarfiutit 1. januar 2018-ip kingorna pinngortunik amigartooruteqarsimappat, taakku ukiuni tulliuttuni katillugit 10-ni ilanngaatigineqarsinnaapput. Amigartoorutinik ukiuni tulliuttuni, ukiunit tallimanit amerlanerusuni ilanngaateqarsinnaassagaanni makku piumasaqaataapput:
Tamanna ukiumoortumik nammineerluni nalunaarsuinermut atatillugu Akileraartarnermut Aqutsisoqarfimmut nalunaarutigisassavat. Nalunaaruteqarneq nammineerluni nalunaarsuinermut atatillugu elektroniskiusumik, periaatsillu uku arlaat atorlugu pissaaq: a) Suliffeqarfiup nammineerluni nalunaarsuinermut atatillugu akileraarutissat pillugit naatsorsuutaasa nassiunneqarnerannut ilanngullugu imaluunniit b) Immersugassap immersorneratigut, takuuk aka.gl.
Periaatsini tamani nalunaarut amigartoorutit ilanngaatiginiarneqartut sinnerisa naatsorsorneqarfiannik imaqassaaq.
Suliffeqarfiup nalunaaruteqarnermut (naatsorsuutinik immersukkamilluunniit nassiussinermut) atatillugu nalunaarutigissavaa, suliffeqarfiup naatsorsuutinut tunngasut amigartoorutinut ilanngaatigineqartunut tunngaviusut, amigartoorutit tamakkiisumik ilanngaatigineqarnerisa kingorna ukiuni marlunni toqqortarissagai.
Piumasaqaatit qulaani taaneqartut ukiut tamaasa eqquutsinngikkukkit amigartoorutinik ukiut 5-t sinnerlugit ilanngaateqarsinnaatitaanerit annaassavat.
Amigartoorutinik ilanngaateqarsinnaanermik sivitsuinissaq pillugu siullermeerluni nalunaaruteqarnissamut piffissaliussaq tassaavoq ukiup amigartoorutit pinngorfiisa kingorna ukiut aningaasarsiorfiit tallimassaannut tunngatillugu nammineerluni nalunaarsuinissamut piffissaliussaq. Tassa imaappoq, amigartoorutit 2018-imi pinngortut Akileraartarnermut Aqutsisoqarfimmut kingusinnerpaamik nalunaarutigineqassapput ulloq 15. maj 2024 (namminersorlutik inuussutissarsiummik ingerlataqartut) imaluunniit ulloq 15. juni 2024 (selskabit).
Amigartoorutinik ilanngaateqarnissamik nalunaarut taassuma kingorna ukiumoortumik tunniunneqartassaaq, suliffeqarfiup nammineerluni nalunaarsuiffiata 15. maj 2024 (namminersorlutik inuussutissarsiummik ingerlataqartut) imaluunniit 15. juni 2024 (selskabit) elektroniskiusumik tunniunneqarneranut atatillugu.
Amigartoorutit ukiuni 5-iinnaanngitsuni ilanngaatigineqartussat pillugit nalunaarnissamut immersugassaq.
Immersugassaq.