Naalakkersuisut tamakkiisumik akileraarut inuit aatsitassarsiornerup iluani aammalu illoqarfiit nunaqarfiillu avataanni sanaartugassanik annertuunik suliaqarnerup iluani sulisuusunit akilerneqartartoq ulloq 1. januar 2011 aallarnerfigalugu atuutilersippaat. Tamakkiisumik akileraartitsinermik aaqqissuussineq tassaavoq sulisut taakku aningaasarsiaat ilanngaateqartinnagit inaarutaasumik akileraarummik 35%-iusumik akileraartinneqartarnerat. Tamakkiisumik akileraarut atorfinitsitaanermi aningaasarsiarineqartut, taakkununnga ilanngullugit akeqanngitsumik ajunngitsorsiat tamaasa, soorlu akeqanngitsumik nerisaqarneq, ineqarneq, oqarasuaateqarneq il.il. tunngavigalugit naatsorsorneqartarpoq. Aningaasarsianulli ilaatinneqanngillat sulisitsisup isumagisaanik soraarnerussutisiaqarnissamut aaqqissuussinernut, kalaallit danskillu soraarnerussutisiaqarnissamut sillimmasiisarfiiniittunut akiliutaasartut.