Selskabit aatsitassarsiornermik ingerlataqartut Kalaallit Nunaanni sulisitsisut nalunaarsorsimaffianni nalunaarsortissapput. Tassuunakkut qulakkeerneqassaaq selskabip sulisuminut akissarsiarititami akileraarutaannik eqqortumik nalunaaruteqarlunilu akiliinissaa. Akissarsianik nalunaaruteqarsinnaassagaanni akissarsiallu akileraarutaannik aammalu akileeqataaffissanut akiliisinnaassagaanni nalunaarsorneqarsimanissaq pisariaqarpoq. Sulisitsisut sulisoqarnermut akitsuummik akissarsiat tamarmiusut 1,1%-iannik akiliissapput (Ukioq 2024). Selskabinut tamakkiisumik akileraartitsinermik aaqqissuussinermi pineqartunut ilaanngitsunut tunngatillugu imaappoq, sulinikkut akissarsiat kommunimut akileraarummik nunamullu tamarmut akileraarummik akileraaruserneqartarlutik.

Akileraartussaaneq sivikitsuinnarmik nunami maaniinnermi aamma atuutilersarpoq. Sulisut piffissami ullunit 14-init sivisunerusumi Kalaallit Nunaanni sulinermikkut akissarsiaqartut Kalaallit Nunaannut akileraartussaapput. Sulisitsisup pisussaaffigai:

• Sulisitsisut nalunaarsorsimaffiannut nalunaarsortinnissani.
• Akissarsianik akileraarutinillu nalunaarutiginninnissani.