Suliffeqarfimmik aallartitsigaanni akileraartarnermut tunngasunik assigiinngitsunik ilisimasaqarnissaq pisariaqarpoq.
Matumani pisariaqarnerpaat suuneri ilisaritinneqassapput.

Kikkut suliffeqarfittut nalunaarsortissappat?
Inuussutissarsiummik ingerlataqartutut isertitaqaruit – isertitaqassangaguilluunniit suliffeqarfimmik pilersitsisinnaavutit. Namminersorluni inuussutissarsiummik kisimiillutit, imaluunniit allanik peqateqarlutit I/S-imik aktieselskabimilluunniit aallartitsisinnaavutit.
Suliffeqarfimmi kisimiissinnaavutit, aammali sulisoqarsinnaallutit.
Suliffeqarfimmik pilersitsineq CVR-registerimi pisarpoq.

Suliffeqarfiutinni isertitaqarumallutit aningaasartuutigisatit akileraarutitigut ilanngaatigisinnaavatit. Inuussutissarsiummik ingerlataqartutut akileraaruteqaatissaraatit suliffeqarfiutivit sinneqartoorutai.
Suliffeqarfittut akileraartarnermut tunngatillugu assigiinngitsunik periarfissaqarlutillu pisussaaffeqarputit.

- Ukiut akileraarfiit aallartinnginneranni siumoortumik nalunaarsuinissaq. Siumoortumik nalunaarsuinikkut paasissutissanik Akileraartarnermut Aqutsisoqarfimmut tunniussaqassaatit, taakkulu uagut ukiumi tulliuttumi akileraarutinut B-nut akiligassavit procentiata sapinngisamik eqqortumik naatsorsornissaanut atussavagut. Suliffeqarfiutinni pissutsit ukiup ingerlanerani allannguuteqarpata siumoortumik nalunaarsukkatit allanngortissinnaavatit.

- Nammineerluni nalunaarsuinissaq majimi. Suliffeqarfimmi isertitatit aningaasartuutitillu ukiut qaangiunneri tamaasa nammineerlutit nalunaarsortussaavatit. Naatsorsuutit nammineerluni nalunaarsuiffimmut ilanngullugit nassiutissavatit. Nammineerluni nalunaarsuiffik naatsorsuutillu nassiutinngikkukkit inatsit unioqqutissavat. Taamaammat akileraarutissatit ullormut 200 kr.-inik, annerpaamillu katillugit 5.000 kr.-inik ilaneqassapput. Nammineerluni nalunaarsuiffimmik nassiussaqanngikkuit aningaasarsiatit Akileraartarnermut Aqutsisoqarfimmit missingersorlugit angissusilerneqassapput.
Eqqaamajuk isertitatit tamaasa eqqortumik nalunaarutigisussaagakkit. Paasissutissat kukkusut nalunaarutigigukkit pillaammik akiliisinneqarsinnaavutit.

- Suliffeqarfittut nammineerluni nalunaarsuiffimmik nassiussinissavit saniatigut aamma sulisorisatit pillugit paasissutissanik Sulisitsisut Nalunaarsorsimaffiannut qaammammoortumik nassiussisartussaavutit. Akissarsianut, soraarnerussutisiassanut, AMA-mut il.il. tunngatillugu paasissutissat tamakkiisut ukiup qaangiunnerani nassiuttussaavatit.

- Eqqortumik nalunaaruteqartoqartarnissaa pillugu Akileraartarnermut Aqutsisoqarfiup saqqummersinnikuuaa ’Kalaallit Nunaanni akileraarutissat ilanngaatigineqarnerat’. Tassani aamma ’Kalaallit Nunaanni akileraarutissat naatsorsorneqarnerannut tapiliussami’ nassiuarneqarput aningaasartuutit suut illit sulisitsisutut akileraarutinik A-nik unerartitsiffigissagitit, suut akileraarutinik B-nik akileraarusigassaanersut aammalu suut akileraaruteqaataasussaannginnersut.