Nammineerluni nalunaarsuiffiit 2021-imut tunngasut innuttaasunut e-Boksikkut nassiussuunneqarput.
Qitiusumik allaffissuaqarfiup qarasaasiatigut serveriisa ilaat unioqqutitsilluni iserfigineqarsimanerata kingunerisaanik nammineerluni nalunaarsuiffiit naqiteriikkat nassiussuunneqarneri ullunik marlussunnik kinguaattoorfiupput. Maannakkulli nammineerluni nalunaarsuiffiit e-Boksi aqqutigalugu nassiussuunneqarsimalerput. Taamaattumik nammineerluni nalunaarsuiffinni paasissutissat 2021-imut tunngasut eqqortuunersut misissussallugit piffissanngorpoq.
Akileraartarnermut Aqutsisoqarfiup qarasaasiatigut serveriisa sillimaniarneq eqqarsaatigalugu nutarterneqarnera pissutigalugu Akileraarutikka Sullissivik.gl-imiittoq ulluni tulliuttuni atorunnaarallartarsinnaanera naatsorsuutigissavat.
Nammineerluni nalunaarsuiffik qaqugu nassiunneqassava?
Nammineerluni nalunaarsuiffik naqqiissutitalik Akileraartarnermut Aqutsisoqarfimmut kingusinnerpaamik 1. maj 2022 nassiutissavat.
Nammineerluni nalunaarsuiffik namminersorluni inuussutissarsiuteqartunut sullissivik.gl- ikkoorlugu kingusinnerpaamik maajip 15-iani nassiunneqassaaq.
Pigisanit pissarsiatit nammineerlutit naatsorsornissai eqqumaffigikkit
Innuttaasut amerlasuut soraarnerussutisiaqarnissamut aaqqissuussinerit nunani allaniittut ilaat pillugit nammineerluni nalunaarsuiffissamik 2021-mut tunngasumik aammattaaq nassinneqarput. Innuttaasut soraarnerussutisiaqarnissamut aaqqissuussinernut inuunermullu sillimmasiissutinut Danmarkimiit imaluunniit nunani
allaniittunut aningaasaliissutinnit iluanaarutitit nalunaarsuinermi nalunaarsugassaraatit. Soraarnerussutisiaqarnissamut aaqqissuisut nunani allaniittut toqqaannartumik Akileraartarnermut Aqutsisoqarfimmut nalunaaruteqarneq ajormata.
Innuttaasut nunatsinni soraarnerussutisiaqarnissamut aaqqissuussanik SISA-mi, Grønlandsbankenimi imaluunniit BankNordik Nuummiittumi peqartut iliuuseqassanngillat. Taakkunannga Akileraartarnermut Aqutsisoqarfik toqqaannartumik nalunaarutisisarmat.
Akileraartarnermut Aqutsisoqarfimmiit allakkat e-Boksi atorlugu nassiunneqartalernerat eqqaamallugu
Innuttaasut 15-ileereersimasut tamarmik Pisortanit e-Boksikkut allagarsisalernissaminnut pisussaaffeqarput. Sullissivik.gl-ikkut Digitalimik allagarsisarnerit eqqumaffigisassaavoq. e-Boksimi allagarsigaangavit e-boksit sms-ikkut imaluunniit e-mailitigut kalerrisussanngorlugu iluarsisinnaavat.
Innuttaasut 1950-i sioqqullugu inuusimasut allallu allakkanik digitaliusunik pisartagartussaanngitsut Akileraartarnermut Aqutsisoqarfimmiit allakkerivikkut suli allagarsisassapput.
|
Nammineerluni nalunaarsuiffik pillugu naatsumik nassuiaat Aningaasarsiannut paasissutissat sulisitsisunniit, aningaaserivinniit pisortaniilluunniit Akileraartarnermut Aqutsisoqarfimmut nassiunneqartarput. Paasissutissat tamakku toqqammavigalugit Akileraartarnermut Aqutsisoqarfik nammineerluni nalunaarsuiffiit suliarisarpai. Taamaattumik ukiup siuliani aningaasaqarnikkut inissisimanerit nammineerluni nalunaarsuiffimmi missingersorneqartarpoq. Nammineerluni nalunaarsuiffimmi kisitsisit kukkuneqarpata imaluunniit amigaateqarpata pisussaavutit kisitsisinut eqqortunut aaqqiissuteqarfigissallugit. Nammineerluni nalunaarsuiffinnut allannguutissaqaruit ilassutissaqaruilluunniit tamanna aaqqiissuteqarfigissavat nalunaarutigaluguluunniit. Sullissivik.gl aqqutigalugu nalunaarsinnaavutit, aamma allakkatigut imaluunniit e-mailitigut Akileraartarnermut Aqutsisoqarfimmut allannguutitit nassiussinnaavatit. Nammineerluni nalunaarsuiffik naqiteriigaq akuerisinnaagukku iliuuseqaqqittariaqanngilatit. |