airplanebooksbriefcase business cogs cross election entertainment fish house law lockmedicalpeopleselfservices socialtax

Soraarnerussutisiaqalernissamut aaqqissuussinermut peqataasussaatitaaneq

Soraarnerussutisiaqarnissamut aaqqissuussinermut peqataasussaatitaaneq
Nalinginnaasumik

Kalaallit Nunaanni innuttaagavit nammineq soraarninngornissannut ileqqaartussaatitaavutit.

Soraarnerussutisiaqalernissamut aaqqissuussinermut peqataasussaatitaanerup qulakkiigassaraa Kalaallit Nunaanni najugallit tamarmik utoqqalinissaminnut ileqqaarnissaat, soraarninngorunik aningaasarissaarneroqqullugit.

Aaqqissuussineq tamanut atuuppoq, akissarsiortuunerit (ataatsimik arlalinnilluunniit sulisitsisoqarlutit) imaluunniit namminersorlutit inuussutissarsiummik ingerlataqartuunerit apeqqutaatinnagu.

Piumasaqaatit

Suliffeqartut tamarmik soraarnerussutisiaqalernissamut aaqqissuussinermut peqataasussaatitaanermi pineqartunut ilaapput.

Nammineq soraarnerussutisiaqalernissannut akiliisassaatit:
• Kalaallit Nunaannut tamakkiisumik akileraartussaaguit
• 18-it ukiullu utoqqalinersiuteqalerfissat akornannik ukioqaruit

Akiliisussaatitaanerit unitsinneqarsinnaavoq ukioq aningaasarsiorfiusoq ukiunik 4-nik sioqqullugu, januarip aallaqqaataani 2021-imiit soraarnerussutisiaqalertussatut 67-inik ukioqalerfissanni.

Suliffeqartut kikkut pineqartunut ilaanerat aamma aningaasarsiat suut, innuttaasut ataasiakkaat qanoq amerlatigisunik ileqqaagaqarnissaannik naatsorsuinermi ilanngunneqarnissaat paaserusukkukku Akileraartarnermut Aqutsisoqarfiup paasisitsiniaalluni takutitassiaa takusinnaavat:

Ukiumoortumik naatsorsuut

Akileraartarnermut Aqutsisoqarfiup ukiumoortumik naatsorsuummik ukiut tamaasat augustip naalernerani nassissavaatit:

  • Nalunaarfigineqaruit soraarnerussutisiaqalernissamut ileqqaarinissamut pisussaaffiit naammassisimanagu, akiliinerit Akileraartarnermut Aqutsisoqarfimmut uppernarsassavat imaluunniit akileeqqillutit soraarnerussutisiaqalernissamut aaqqissuussinermut akuerineqarsimasumut
  • Ileqqaarnerunissat ukiumoortumik naatsorsuummi allaqqanngippat arlaannik iliuuseqartariaqanngilatit, tassami soraarnerussutisiaqalernissamut ileqqaakkannut naammattunik akileereersimagavit

Soraarnerussutisiaqalernissamut ileqqaakkannut akiliinerunissat ukiumoortumik naatsorsuutip takutippagu, tamanna sumik pissuteqarnersoq paasiumallugu Akileraartarnermut Aqutsisoqarfiup paasisitsiniaalluni takutitassiaa takusinnaavat:

Ileqqaarnissamut tunngavissat

Aningaasarsiavit amerlassusii soraarnerussutisiaqalernissannut qanoq amerlatigisunik ileqqaagaqarnissannut aalajangiisuupput. Taakku tassaapput ileqqaarnissamut tunngavissatit.

  • Ileqqaarnissamut tunngavissatit 125.000 kr.-init amerlaneruppata soraarnerussutisiaqalernissannut ileqqaartussaavutit
  • Ileqqaarnissamut tunngavissatit 125.000 kr.-init ikinneruppata ukiumi tassani ileqqaartussaanngilatit
  • Ileqqaarnissamut tunngavissatit 125.000-p aammalu 175.000-p akornaniippat kisitsit atuuttoq 0%-miit assigiiaamik qaffakkiartuaassooq

Akissarsiortunut tunngatillugu:
  • Akissarsiortut ileqqaarnissamut tunngavissaraat aningaasarsiat A-t aamma aningaasarsiat B-t katinnerat
  • Akissarsiortuuguit ukiumi aningaasarsiorfiusumi 2021-imi ileqqaarnissamut tunngavissavit 6%-ii ileqqaagassaraatit
  • Akissarsiortuuguit ukiumi aningaasarsiorfiusumi 2021-imi ileqqaarnissamut tunngavissavit 6%-ii ileqqaagassaraatit
  • Akissarsiortuuguit ukiumi aningaasarsiorfiusumi 2022-imi ileqqaarnissamut tunngavissavit 6%-ii ileqqaagassaraatit
  • Akissarsiortuuguit ukiumi aningaasarsiorfiusumi 2023-imi ileqqaarnissamut tunngavissavit 7%-ii ileqqaagassaraatit
  • Akissarsiortuuguit ukiumi aningaasarsiorfiusumi 2024-imi ileqqaarnissamut tunngavissavit 8%-ii ileqqaagassaraatit
  • Akissarsiortuuguit ukiumi aningaasarsiorfiusumi 2025-imi ileqqaarnissamut tunngavissavit 9%-ii ileqqaagassaraatit
  • Akissarsiortuuguit ukiumi aningaasarsiorfiusumi 2026-imi ileqqaarnissamut tunngavissavit 10%-ii ileqqaagassaraatit

Namminersorluni inuussutissarsiummik ingerlataqartunut tunngatillugu:
  • Namminersorluni inuussutissarsiummik ingerlataqartut ileqqaarnissamut tunngavissaraat sinneqartoorutit akileraaruteqaataasussat
  • Namminersorluni inuussutissarsiummik ingerlataqartuuguit 2021-imi ileqqaarnissamut tunngavissavit 4%-ii ileqqaagassaraatit
  • Namminersorluni inuussutissarsiummik ingerlataqartuuguit 2022-imi ileqqaarnissamut tunngavissavit 4%-ii ileqqaagassaraatit
  • Namminersorluni inuussutissarsiummik ingerlataqartuuguit 2023-imi ileqqaarnissamut tunngavissavit 5%-ii ileqqaagassaraatit
  • Namminersorluni inuussutissarsiummik ingerlataqartuuguit 2024-imi ileqqaarnissamut tunngavissavit 6%-ii ileqqaagassaraatit
  • Namminersorluni inuussutissarsiummik ingerlataqartuuguit 2025-imi ileqqaarnissamut tunngavissavit 6%-ii ileqqaagassaraatit
  • Namminersorluni inuussutissarsiummik ingerlataqartuuguit 2026-imi ileqqaarnissamut tunngavissavit 6%-ii ileqqaagassaraatit

Akissarsiortuullutillu namminersorlutit inuussutissarsiummik ingerlataqaruit, taava ileqqaarnissamut tunngavissatit tamaasa immikkut naatsorsussavatit. Tassa imaappoq, akissarsiortutut aningaasarsiannit ileqqaarnissamut tunngavissatit naatsorsussavatit aammalu namminersorlutit inuussutissarsiummik ingerlataqartutut sinneqartoorutinnit ileqqaarnissamut tunngavissatit immikkut naatsorsussallugit.

Ileqqaarnissamut tunngavissatut makku ilanngullugit naatsorsorneqassapput:
  • Aningaasarsiat A-t aamma aningaasarsiat B-t.
    Soorlu:
    • Akissarsiat
    • Ajunngitsorsiat (assersuutigalugu akeqanngitsumik biileqartitaaneq, akeqanngitsumik najugaqartitaaneq, akeqanngitsumik mobileqartitaaneq il.il.)
    • Erninermi ullormusiat
    • Ilinniarnermut atatillugu sulinermi (praktik) akissarsiat
    • Inuussutissarsiummik ingerlataqartutut sinneqartoorutit

Aningaasarsiat ilaat ileqqaarnissamut tunngavissat naatsorsorneqarneranni ilanngunneqartussaanngillat.

Tassaapput:
  • Isumaginninnermi ikiorsiissutit tapiissutillu ilaat (siusinaartumik pensionisiat, ineqarnermut tapiissutit, meeqqanut tapiissutit, ilinniagaqarnersiutit, utoqqalinersiat soraarnerussutisiatullu tunniunneqartartut allat, meeqqanut akilersuutit, pisortanit ikiorsiissutit)
  • Tjenestemanditut aningaasarsiat ilaat (Kalaallit Nunaanni Namminersornerullutik Oqartussani kommuninilu tjenestemandit, Tjenestemandit inatsisartut suliffeqarfiini atorfillit aamma Naalagaaffimmi tjenestemanditut atorfillit Kalaallit Nunaanniittut).

Tjenestemanditut aningaasarsiat taakkuupput inuup tjenestemanditut pensionisiassaanik tunngaviliisussat, kiseqataassallutillu.

Soraarnerussutisiaqalernissannut qanoq ileqqaarsinnaanerlutit takujumagukku Akileraartarnermut Aqutsisoqarfiup paasisitsiniaalluni takutitassiaa takusinnaavat:

Soraarnerussutisiassannut akiliutivit uppernarsaataat

Soraarnerussutisiassannut akileeqquneqarlutit allaffigineqarsimaguit akiliinerit Akileraartarnermut Aqutsisoqarfimmut uppernarsassavat.
Nassiussassatit uppernarsagassatillu:

  1. Soraarnerussutisiaqalernissamut aaqqissuussinermut akiliisimaneq, illit nammineq akilersimanerlugu allalluunniit, soorlu sulisitsisuit illit atit atorlugu akilersimaneraa uppernarsassavat.
  2. Akiliineq soraarnerussutisiaqalernissamut aaqqissuussinermut inatsimmi pineqartumut akiliinerussaaq:
    1. Kalaallit Nunaanni; SISA, Grønlandsbanken aamma Bank Nordik Nuuk
    2. Danmarkimi; soraarnerussutisiaqalernissamut sillimmasiisarfiit soraarnerussutisiaqalernissamullu aningaasaateqarfiit (kisianni soraarnerussutisiaqalernissamut aaqqissuussinerit aningaaserivinni pilersinneqartut pinnagit), CS-Pensionsfond emaluunnut HKKF-fonde)
  3. Ulloq soraarnerussutisiaqalernissamut aaqqissuussinermut akiliiffik
  4. Ukioq ileqqaarfigisat, aamma soraarnerussutisiassannut akilikkavit aningaasartai eqqortut

Uppernarsaatitut piumasarineqartut 4-t tamaasa eqquutsinngikkukkit, akiliineq ukiumi akiliiffimmi akiliutitut isigineqassaaq.

§53A malillugu aaqqissuussanut (qallunaat nunaanni aaqqissuussat ilanngaateqanngitsut) akiliiguit, akiliutitit naatsorneqassapput akileraarusertinnagit aningaasat tamakkiisumik akiliutitut.

Uppernarsaatip nassiunnera:
Uppernarsaat pappialanngorlugu Akileraartarnermut Aqutsisoqarfiup allaffiinut tunniussinnaavat, allakkatigulluunniit Akileraartarnermut Aqutsisoqarfimmut nassiullugu. Uppernarsaat aamma e-mailikkut nassiussinnaavat.

Bankimi (soorlu Netbankimi) kontonnit uppernarsaat imaluunniit soraarnerussutisiaqalernissamut akiliutit Akileraartarnermut Aqutsisoqarfiup uppernarsaatitut akuerissavai, uku allaqqappata:

  • akiliineq
  • aningaasat amerlassusiat
  • nassiussisoq
  • tigusisoq
  • aamma ulloq

Inussiarnersumik qinnuigaatsigit, uppernarsaat nassiukkukku qulequtsiiffissami una allaqqullugu ’soraarnerussutisiaqalernissamut aaqqissuussinermut peqataasussaatitaaneq’.

Suliamik ingerlatseriaaseq

Soraarnerussutisiaqalernissamut aaqqissuussinermut akiliisimaninnut uppernarsaat nassiukkukku, tamanna Akileraartarnermut Aqutsisoqarfimmi nalunaarsorneqassaaq.

Uppernarsaat nassiussat Akileraartarnermut Aqutsisoqarfimmi misissorneqassaaq.

Siusinnerpaamik sapaatip akunnerisa 4-t qaangiunneranni akissutisinissat naatsorsuutigissavat.

Aappaagu skattekortissat akileraarusiissummik eqqortumik procentitalik decemberimi ilinnut nassiunneqassaaq.

Piffissaliussaq

Aaqqissuussamut ukiumi ataavartumik akiliusariaqarputit. Kingorna akiliiguit 1. novemberi tikitsinnagu akiliisariaqarputit, skattekortip akileraarusiissutissap procentia qaffanneqqanngitsoq pissagukku.

Soraarnerussutisiassannut akiliutivit uppernarsaataa tax@nanoq.gl-ikkut Akileraartarnermut Aqutsisoqarfimmut nassiutissavat.

Piffissaliussamik malinninnginnerup kingunissai

Akilerneqanngitsut, soorlu 2021-mi, 2023-mi skattekortissanni akileraarusiissutissap procentiata qaffanneratigut akilersinneqassapput:

  • akiliisimanngikkuit
  • akiliisimanerit Akileraartarnermut Aqutsisoqarfimmut uppernarsarsimanngikkukku

Naammagittaalliorneq

Soraarnerussutisiaqalernissamut aaqqissuussinermut peqataasussaatitaaneq pillugu ukiumoortumik naatsorsuut naammagittaalliuutiginiarukku, taanna allakkatigut uunga nassiutissavat:

Aningaasaqarnermut Naalakkersuisoqarfik
Imaneq 4
Postboks 1037
3900 Nuuk