1. januar 2018-imiit Kalaallit Nunaanni soraarnerussutisiaqarnissamut aaqqissuussinermut pinngitsoorani ilaanissaq pillugu inatsit atuutilissaaq. Aaqqissuussinermi tassani innuttaasut tamarmik 18-iniit soraarnerussutisiaqalernissamut ukioqalernissap tungaanut ukioqartut (oktober 2017-imi 66-inik ukioqalereersimasut) Kalaallit Nunaannut tamakkiisumik akileraartussaatitaasut soraarnerussutisiaqarnissamut aaqqissuussinermut akiliisussaatitaapput.

Akiliutit tassaapput ukiumut ileqqaagaqarnissamut tunngaviusunit procentip nalinga, ileqqaagaqarnissamut tunngaviusut 125.000 kr.-inik annertunerusutut naatsorsorneqarsimappata. Quppernermi uani soraarnerussutisiaqarnissamut pinngitsoorani ilaanissaq pillugu inatsit ilinnut qanoq isumaqarnersoq, aamma taanna eqqortinniarlugu illit qanoq iliornissannut paasissutissat takusinnaavatit. Inatsit uani takuuk.

Soraarnerussutisiaqarnissamut aaqqissuussinermut pinngitsoorani ilaanissaq pillugu inatsit naapertorlugu soraarnerussutisiaqarnissamut aaqqissuussinermut illit nammineerlutit akiliuteqarneq ajoruvit taava Akileraartarnermut Aqutsisoqarfik akileraartarnermut allagartamik nutaamik atulersitsissaaq akilinngitsuukkallu procentimut akileraarutissamut tapiliussatut qaavatigut akilersinneqassallutik. Soraarnerussutisiaqarnissamut aaqqissuussinermik atorneqarsinnaasumik illit peqarnerit Akileraartarnermut Aqutsisoqarfiup ilisimappagu aaqqissuussinermut tassunga aningaasat akiliutigineqartut nuussavai. Taamatut aaqqissuussinermik Akileraartarnermut Aqutsisoqarfik ilisimasaqanngippat Soraarnerussutisiaqalernissamut Pinngitsoorani ilaanngunnissaq siunertaralugu Akileraartarnermut Aqutsisoqarfik, illit atinnut nutaamik pilersitsissaaq.

Ileqqaarnissamut tunngavigisanit procenti aalajangersimasoq aallaavigalugu soraarnerussutisiaqarnissamut ileqqaarnernut illit akiliissaatit. Ileqqaarnissamut tunngaviusut tassaapput aningaasarsiat A-t aamma B-t tamarmiusut. Soraarnerussutisiaqarnissamut aaqqissuussinermut sulisitsisut akiliuteqartarpat aningaasat taakku ileqqaarnissamut tunngaviusunut ilanngunneqassapput.

Akissarsialiunerit imaluunniit namminersortutut inuussutissarsiortuunerit apeqqutaatillugu akiligassat nalingi assigiinngitsut arlaat akilissavatit. Akissarsialinnut aamma namminersortutut inuussutissarsiuteqartunut akiligassat nalingi ukiut tamaasa 1 %-imik qaffattassapput.

Taakku saniasigut akiligassat nalingi ileqqaarnissamut tunngaviusut qanoq annertutigineri apeqqutaassapput. Immikkoortut pingasut akornanni immikkoortitsisoqarpoq:
1. 175.000 kr.-inik amerlanerusunilluunniit ileqqaarnissamut tunngavigisat
2. 125.00 kr.-it aamma 175.000 kr.-it akornanni ileqqaarnissamut tunngavigisat
3. 125.000 kr.-inik ikinnerusunilluunniit ileqqaarnissamut tunngavigisat

Ileqqaarnissamut tunngavigisatit 125.000 kr.-iuppata appasinneruppataluunniit soraarnerussutisiaqarnissamut pinngitsoorani ilaanissamut piumasaqaammut akiliuteqassanngilatit.

Ileqqaarnissamut tunngavigisanut immikkoortunut allanut marlunnut akiligassat nalingi takussutissiami tulliuttumi takusinnaavat.

Ileqqaarnissamut tunngavigisat 150.000 kr.-iuppata anneruppataluunniit ukiumut akiligassat nalingi
Ukioq	Akissarsialik	Namminersortutut inuussutissarsiuteqartut
2022	6 %	4 %
2023	7 %	5 %
2024	8 %	6 %

Ileqqaarnissamut tunngavigisatit 125.000 kr.-it sinnersimappagit kisiannili 175.000 kr.-it inorlugit, soraarnerussutisiaqarnissamut aaqqissuussinermut akiliutissat, ileqqaarnissamut tunngavigisat nalingi tamarmiusut akilissanngilatit. Taarsiulluguli akiliummik, inunnut 125.000 kr.-inik ileqqaarnissamut tunngavigisaqartuniit 0 procentimiik aallartillugu inunnut 175.000 kr.-inik ileqqaarnissamut tunngavigisaqartunut 100 procentip tungaanut assigiimmik annertusiartortinneqartumik akiliissaatit. Ileqqaarnissamut 150.000 kr.-inik tunngavigisaqartunut naatsorsuinermi assersuut ataani takutinneqarpoq. Maluginiaruk namminersortutut inuussutissarsiortuunersutit imaluunniit inuussutissarsiortuunnginnersutit tunngavigalugu assigiinngissuteqarmata..

Ileqqaarnissamut tunngavigisat 150.000 kr.-iuppata ukiumut akiligassat nalingi
Ukioq	Akissarsialik	Akiliutit
2021	6 % x (150.000 – 125.000) / (150000 – 100000))=	3 %
2022	6 % x (150.000 – 125.000) / (150000 – 100000))=	3 %
2023	7 % x (150.000 – 125.000) / (150000 – 100000))=	3,5 %
2024	8 % x ((150.000 – 125.000) / (150000 – 100000))=	4 %
2025	9 % x ((150.000 – 125.000) / (150000 – 100000))=	4,5 %
2026	10 % x (150.000 – 125.000) / (150000 – 100000))=	5 %

Ileqqaarnissamut tunngavigisat 150.000 kr.-iuppata ukiumut akiligassat nalingi
Ukioq	Namminersortutut inuussutissarsiuteqartut	Akiliutit
2021	4 % x (150.000 – 125.000) / (150.000 – 125.000))=	2 %
2022	3 % x ((150.000 – 125.000) / (150.000 – 125.000))=	2 %
2023	4 % x (150.000 – 125.000) / (150.000 – 125.000))=	2,5 %
2024	6 % x (150.000 – 125.000) / (150.000 – 125.000))=	3 %
2025	6 % x (150.000 – 125.000) / (150.000 – 125.000))=	3 %
2026	6 % x (150.000 – 125.000) / (150.000 – 125.000))=	3 %

Akissarsianit isertitanik aamma namminersortutut inuussutissarsiorluni ingerlataqarnermit sinneqartoorutinik ileqqaarnissamut tunngavigineqarpata akiligassat nalingi.
Iileqqaarnissamut tunngavigisatit 125.000 kr.-it sinnersimappagit taakkulu akissarsiatut isertitaallutillu nammineq suliffiutigisamit akileraaruteqaataasussatut sinneqartoorutaappata, akiliutigisassat tamaasa immikkoortillugit akiliutigissavatit. Tassa imaappoq:
• Akissarsialittut/nammineq isertitaqartunut ileqqaarnissamut tunngavigisat ilai akissarsialittut isertitanut akiligassat nalingi.
• Namminersortutut ingerlataqarnermiit ileqqaarnissamut tunngavigisat ilai nammineq ingerlataqarnermiit sinneqartoorutiniit akileraaruteqaataasussanit akiligassat nalingi.

Isertitat ileqqaarnissamut tunngavigisanut ilaanngitsut
Ileqqaarnissamut tunngavigisat naatsorsornerini pisartakkat arlallit ilaatinneqanngillat. Ileqqaarnissamut tunngavigisat naatsorsornerini pisartakkat ataani taaneqartut ilaatinneqanngillat:

1)  Kalaallit Nunaanni Namminersornerullutik Oqartussani kommuninilu tjenestemandit pillugit Inatsisartut inatsisaat,
2)  Tjenestemandit Inatsisartut suliffeqarfiini atorfillit pillugit Inatsisartut inatsisaat,
3)  Naalagaaffimmi tjenestemanditut atorfillit Kalaallit Nunaanniittut pillugit inatsit,
4)  Tjenestemandit pillugit inatsit
5)  Inuit innarluutillit taperserneqartarnissaannut Inatsisartut inatsisaat,
6)  Meeqqanut tapiissutit pillugit Inatsisartut inatsisaat,
7)  Meeqqat tapersersorneqarnissaannut Inatsisartut inatsisaat,
8)  Pisortanit ikiorsiissutit pillugit Inatsisartut peqqussutaat,
9)  Utoqqalinermi pensionisiat pillugit Inatsisartut inatsisaat,
10)  Siusinaartumik pensionisiat pillugit Inatsisartut inatsisaat,
11)  Inissiani attartukkani ineqarnermut tapiissutit pillugit Inatsisartut inatsisaat,
12)  Ilinniagaqarnersiutit pillugit Inatsisartut inatsisaat, aamma
13)  Borgmesterinik borgmesterillu tulliinik kiisalu kommunalbestyrelsinut nunaqarfinnilu aqutsisunut Ileqqaarnissamut tunngavissanik naatsorsuinermi makku aamma ilanngunneqassanngillat:
1)  meeqqanut akilersuutit, inuup angajoqqaavinit pisortanilluunniit akilerneqartussat, aamma
2)  pensionisiatut tunniunneqartut allat, Utoqqalinersiaqarneq pillugu Inatsisartut inatsisaanni pineqartunut ilaanngitsut.”

Tassa imaappoq, assersuutigalugu ileqqaarnissamut tunngavigisamut akilersuutit makku ilaatinneqassanngillat: Tjenestemandit, siusinaartumik aamma utoqqalinermi utoqqalinersiutit, ilinniagaqarnersiutit, meeqqanut tapiissutit, ineqarnermut tapiissutit, pisortat ikiorsiissutaat aamma meeqqanut inuusuttunullu ikiorsiissutit aamma annertuumik innarluutillit aningaasartuuteqarnerinut matussutissat tapiissutit.
Assersuutit tamakkiisuunngillat

Soraarnerussutisiat sulisitsisumit isumagineqarpata, innuttaasup nammineerluni soraarnerussutisiaqarneq pillugu inatsimmi piumasaqaatit naammassineqarsimanersut eqqumaffigisassarai, tassa isertitanit A aamma B-nit qaffasissuseq 4 % akilerneqarsimanersoq, tunngaviusumik akissarsianit kisimi pinnani.

Uani assersuutigineqarpoq sulisartoq isumaqatigiissutilik piumasaqaatit naammassineqarsimanngitsut:

Isumaqatigiissutitigut (isumaqatigiisutigineqarsimasoq) soraarnerussutisiassanut akileeqataassutit
tunngaviusumik akissarsiat 8,9 %-ia.
 
Tunngaviusumik akissarsiat (soraarnerussutisiaqaataasussaq)
nalunaaquttap akunneranut 101,- kr.

Akkord-imut / sinneqartoorutit (soraarnerussutisiaqaataasinnaanngitsut)
nalunaaquttap akunneranut 250,- kr.

Akunnermusiat katillugit
nalunaaquttap akunneranut 351,- Kr.

Isumaqatigiissutitigut soraarnerussutisiassanut akileeqataassutit
8,9 % x kr. 101,- = kr. 8,99

Inatsisitigut pisussaaffittut tapiissutit (2022) 4 % x kr. 351,- = kr. 14,04

Pinngitsoorani soraarnerussutisiaqarneq pillugu inatsimmut tunngatillugu =
nalunaaquttap akunneranut soraarnerussutisiaqarnersiutitigut amigaatit kr. 5,05

Innuttaasup tamatumunnga tunngatillugu nammineerluni eqqumaffigissavaa nammineerlunilu isumagissavaa, aningaasat amigaatigineqartut akilernissaat.

Soraarnerussutisiaqarnissamut aaqqissuussinermik pilersitsinermi soraarnerussutisiaqartitsisartuniit nalinginnaasumik siunnersorneqassaatit taamaalilluni soraarnerussutisiaqarnissamut aaqqissuussinerit illit ilaquttavillu pisariaqartitassinnut “naleqqussarneqartarlutik”. Tamanna isumaqarpoq soraarnerussutisiaqarnissamut aaqqissuussinermi sillimmasiinerit assigiinngitsut, pissutsini assigiinngitsuni illit ilaqutannullu isumannaarisut ilanngunneqarsinnaasarlutik.

Pinngitsoorani soraarnerussutisiaqartitsineq qulaani taaneqartutuut naleqqussagaanngilaq. Taarsiulluguli nalinginnaasumik aaqqissuussineruvoq makkuninngalu imaqarluni:

• Inuuneq tamaat sillimmasiisarfikkut ukiumut pisartakkat
• Qularnaveeqqusiinermi immikkoortitat
• Ukiuni qulini qularnaveeqqusiineq

Pinngitsoorani soraarnerussutisiaqarnermi piffissami sillimmasiinermiit sillimmasiisup utoqqalinersiuteqalernissaata tungaanut inuuneq tamaat sillimmasiisarfikkut ukiumut pisartagaqalernissamut ileqqaartoqassaaq. Inuuneq tamaat sillimmasiisarfikkut ukiumut pisartakkat inuugallartilluni pisartagaapput. Tamanna isumaqarpoq piffissaq soraarninngornissaq sioqqullugu sillimmasiisimasoq toqukkut qimaguppat taava pisartagassat atorunnaassapput ”ileqqaakkallu” peerullutik. Tamanna pinngitsoortinniarlugu Qularnaveeqqummik immikkut aamma sillimmasiisoqassaaq. Qularnaveeqqummik sillimmasiineq tassaavoq toqunissamut sillimmat, piffissami ileqqaarfiusumi pisiarineqartartoq, taamaalilluni sillimmasiinermi katersat (nalingattut) annertutigisunik toqunissamut tamatigut matussusiissutassallutik. Taamaalilluni piffissami ileqqaarfiusumi sillimmasiisoq toquppat tamatigut sillimmasiinermi matussutaasussat tiguneqartussaassallutik. Tiguneqartussat sillimmasiisup ileqqaagaasa nalingattut annertutigissapput. Tiguneqartut akileraaruteqaataassapput.

Sillimmasiisimasoq utoqqalinersiuteqalertussatut ukioqalerpat Inuuneq tamaat sillimmatinik qaammatikkaartumik pisartagaqalissaaq. Soraarnerussutisianik tigusisarnerup aallartinnerata kingorna ukiut qulit qaangiutsinnagit sillimmasiisimasoq toquppat qularnaveeqqusiisimanerup qulakkiissavaa soraarnerussutisianut piffissaliussamiit ukiuni qulini qularnaveeqqusiisimanerup ingerlanerata naanissaata tungaanut sillimmasiisimasup qimataanut tigusaqartarnerit ingerlaannassasut. Tamatuma kingorna tigusisarnerit unissapput. Piffissap qularnaveeqqusiiffiusup naanerata kingorna sillimmasiisimasoq toquppat tigusartakkat sillimmasiisimasup toqunerani unitsinneqassapput.

Soraarnerussutisiaqarnissamut aaqqissuussineq, illit nammineerlutit soraarnerussutisiaqarnissamut neqerooruteqartumi pilersitat, pisariaqartitannut naapertuuttumik naleqqussarsinnaavat. Taamaattumik Pinngitsoorani soraarnerussutisiaqarnermut taarsiullugu soraarnerussutisiatigut aaqqissuussinermik, illit nammineq pilersitsiguit allanik imaluunniit amerlanerusunik iluaqutissartalinnik pissarsisinnaavutit.

Akileraartarnermut ingerlatsivik soraarnerussutisianut aaqqissuussinermik ilinnut pilersitsisinnaavoq
Illit ingerlasumik soraarnerussutisianut aaqqissuussaqartoq akileraartarnermut ingerlatsiviup ilisimanngippagu, imaluunniit soraarnerussutisianut aningaasaateqarfiup imaluunniit soraarnerussutisianik neqerooruteqartup soraarnerussutisianut aaqqissuussinermik pilersitsiviusimasup akileraartarnermut ingerlatsivimmit akiliutinik tigusisarnissaq kissaatiginngippagu, akileraartarnermut ingerlatsivik ilinnut soraarnerussutisianut aaqqissuussinermik pilersitsisinnaavoq.

Sooruna soraarnerussutisiaqarnissamut aaqqissuussinermik peqartariaqartunga?
Aaqqissuussineq Kalaallit Nunaanni innuttaasut soraarninngorpata inuunermi atugaat pitsaanerusut qulakkeerniarlugit eqqunneqarpoq.
Soraarnerussutisiaqarnissamut aaqqissuussineq inuunerup ingerlanerani sapinngisamik annertunerpaamik atuinikkut inuit ataasiakkaat assigiinnerusumik atugaqarsinnaanerannut peqataassaaq taamaalillunilu siunissami soraarninngortussap inuunermi atugai pitsaanerulersissallugit peqatigisaanillu siunissami pisortat aningaasaqarnikkut ingerlatsinerat patajaatsoq peqataaffigissallugu.
 
Soraarnerussutisiaqarnissamut aaqqissuussinermut akilersuiuaannassaanga?
Aap, soraarninngortutut ukioqalernissavit tungaanut akilersuissaatit (oktober 2017-imi soraarninngortut ukiui tassaapput 66-it).
Taamaattorli soraarnerussutisiaqarnissamut aaqqissuussinermut Akileraartarnermut Aqutsisoqarfiup pilersitaanut akiliisarnerit ingerlatiinnassagit piumasaqaataanngilaq. Soraarnerussutisianik neqerooruteqartartumi allani namminerisannik soraarnerussutisiaqarnissamut aaqqissuussannik tamatigut pilersitsinissannut periarfissaqarputit. Taamaattorli aaqqissuussinerup ingerlatseqatigiiffiullu inissiffigisaata inatsimmi piumasaqaataasut naammassissallugit.
Sumut akiliissanerlutit nammineq aalajangissavat. Taamaattorli soraarnerussutisiaqarnissamut aaqqissuussinerit pensionskarsimi, sillimmasiisarfimmi imaluunniit inuuneq tamaat imaluunniit pensionsforsikringsselskabimi, sillimmasiisarnermik ingerlatsinissamut Finanstilsynimiit akuerisaasumi inissisimassalluni. Taanna Kalaallit Nunaata avataani inissisimasinnaavoq. Soraarnerussutisiatigut aaqqissuussinerit aningaaserivimmi aamma inissisimasinnaavoq, aningaaserivik Kalaallit Nunaanni aalajangersimasumik inissisimappat imaluunniit aalajangersimasumik tassani ingerlatsiveqarpat.

Tjenestemandit soraarnerussutisiaat aamma soraarnerussutisiaqarnissamut aaqqissuussinermut pinngitsoorani ilaanissaq pillugu malittarisassanut ilaappat?
Tjenestemandit Soraarnerussutisiaqalernissamut aaqqissuussinermut peqataasussaatitaaneq pillugu inatsimmi pineqartunut ilaapput, kisianni aningaasarsiaasa ilaat, Soraarnerussutisiaqalernissamut aaq-qissuussinermut peqataasussaatitaanermut tunngatillugu ileqqaarnissamut tunngavissaasa Akile-raartarnermut Aqutsisoqarfimmit naatsorsorneqarnissaanni ilanngunneqartussaanngillat.

Tjenestemandit aningaasarsiaat akissarsianik assigiinngitsunik katitigaagajupput. Assersuutigalugu tassaasinnaapput tunngaviusumik akissarsiat tapillu assigiinngitsut. Akissarsiat taakku ilaat tjeneste-manditut soraarnerussutisiassat naatsorsorneqarneranni tunngavigineqartarput, ilaalli ilanngunne-qartaratik. 

Akissarsiat ilaat tjenestemanditut soraarnerussutisiassat naatsorsorneqarneranni tunngavigineqar-tussat Akileraartarnermut Aqutsisoqarfiup ileqqaarnissamut tunngavissanik naatsorsuinerani ilan-ngunneqartussaanngillat.

Soraarnerussutisiaqarnissamut aaqqissuussinermut akilersuisareeruma soraarnerussutisiaqarnissamut aaqqissuussinermut nutaatut pilersitsinissaq pillugu piumasaqaammut ilaavunga?
Soraarnerussutisiaqarnissamut aaqqissuussineq pillugu inatsit neqerooruteqartumi aalajangersimasumi soraarnerussutisiaqarnissamut aaqqissuussinermik nutaamik pilersitsinissamut pisussaaffiliinngilaq. Maannakkut soraarnerussutisiaqarnissamut aaqqissuussinernut akiliuteqartarnerit allanngortinnagu taamaattumik ingerlaannarsinnaavutit. Taamaattorli maluginiassavat maannakkut soraarnerussutisiaqarnissamut aaqqissuussinernut akiliisarnitit inatsimmi akiliutigineqartussat nalinginut naammassinnissammata.

Kalaallit Nunaata avataani soraarnerussutisiaqarnissamut aaqqissuussinermut akiliuteqartaruma soraarnerussutisiaqarnissamut aaqqissuussinermut pinngitsoorani ilaanissaq pillugu piumasaqaatit naammassisinnaavakka?
Aap, soraarnerussutisiaqarnissamut aaqqissuussinerit, sillimmasiisarnermik ingerlatsivimmik ingerlatsinissamut Finanstilsynimit akuerisaasumi pensionskarsimi imaluunniit inuuneq tamaat aamma/imaluunniit pensionsforsikringsselskabimi inissisimappat, taamatut aaqqissuussinermut akiliuteqarnermi inatsimmi piumasaqaatit naammassissavatit.
Akerlianilli aaqqissuussineq aningaaserivimmi Kalaallit Nunaata avataani inissisimappat soraarnerussutisiaqarnissamut aaqqissuussinermut akiliisinnaanngilatit.

• Soraarnerussutisiaqarfiit Finanstilsynemut akuerisaasut soorlu makkuupput.:
o Qimatut / SISA
o PFA / AP 
o Akademiker Pension
o Lærerens Pension
o Danica Pension
o Lægernes Pension
o Sampension livsforsikring A/S
o Topdanmark
o Industriens Pension

Ilanngaatit qanoq paasineqassappat, aamma taamatut ilanngaateqarsinnaavunga?
Soraarnerussutisiaqarnissamut aaqqissuussinermut Kalaallit Nunaanni inissisimasumut akiliisaruit amerlanertigut soraarnerussutisiaqarnissamut akiliutinnit ilanngaateqarsinnaatitaallutillu sulisitsisup akiliutai ilanngaatigisinnaavatit.
Soraarnerussutisiaqarnissamut aaqqissuussinerni nammineq inuttut pilersissimasanni, akileraartussaannginneq tassaavoq akiliutigisimasannik ilanngaateqarsinnaatitaagavit. Tamanna isumaqarpoq, aningaasarsiatit akileraaruteqaataasussat naatsorsulerukkit akiliutigisimasatit ilanngaatigisinnaagakkit. Maluginiassavat akiliutigisimasannut taakkununnga ilanngaat akileraaruteqaataasussanit ilanngaataammat taakkulu akileraaruteqaataasussanit ilanngaatitit allat ilanngullugit nalilissavat ilanngaat aalajangersimasoq imaluunniit akileraaruteqaataasussanit ilanngaatit tamarmiusut nalingat arlaat atorniarnerlugu.
Soraarnerussutisiaqarnissamut aaqqissuussinerni, atorfeqarnermut atatillugu pilersinneqarsimasuni akileraartussaannginneq tassaavoq sulisitsisup akiliutaa akileraaruteqaataassanngimmat. Tamanna isumaqarpoq aningaasarsiatit akileraaruteqaataasussat naatsorsorneqarneranni akiliutigisimasat ilanngutissanngikkitit. Tassani soraarnerussutisiaqarnissamut aaqqissuussinermut sulisitsisup akiliutai illillu nammineq akiliutitit pineqarput.

Akileraartarnermut Aqutsisoqarfiup Pinngitsoorani Soraarnerussutisiassanik uannut pilersitsinissaa sioqqullugu aningaasat amigaataasut nammineq akilernissaannut periarfissaqarpunga?
Aap, periarfissaqarputit. 2019-imiit ukiumi aningaasarsiorfiusumi qaangiuttumi soraarnerussutisiaqarnissamut akiliutinik ukiut tamaasa ulloq 31. august nallertinnagu Akileraartarnermut Aqutsisoqarfik naatsorsuisassaaq. Tamatuma kingorna aningaasat amigaatigineqartut ilinnit akileqquneqassapput. Nikingassutaasoq sapaatit akunneri sisamat iluanni akilereersimassavatit.

Akiliuteqartarnissamut piumasaqaatit eqqortinngikkukkit procenti akileraarutissaq qanoq annertutigisumik qaffanneqassava?
Procenti akileraarutissaq ukiumi qaffaaffiusumi akiligassat nalinginut atuuttunut naapertuuttunngorlugu procenti qaffanneqassaaq. Tassa imaappoq procenti akileraarutissaq, assersuutigalugu 2021-imi akissarsialimmut 6 %-imik aamma 2022-imi 6 %-imik qaffanneqarsinnaavoq, 2020-imi akissarsiaqartoq soraarnerussutisiaqarnissamut aaqqissuussinermik pilersitsisimanngippat, imaluunniit 2020-imut atuuttumik akiliutissap nalingatut qaffasitsigisumik akiliisarsimanngippat.

Namminersortutut inuussutissarsiortunut atuuttoq tassaavoq procenti akileraarutissaq 2022-imi 4 %-imik aamma 2023-mi 5 %-imik qaffanneqarsinnaammat. Namminersortutut inuussutissarsiuteqartunut 2024-ip tungaanut aamma akissarsiaqartunut/inuinnarnut 2024-ip tungaanut ukiuni tamani akiliutissat nalingi 1 %-imik qaffanneqartartussaammata, soraarnerussutisiaqarnissamut aaqqissuussinermik illit suli pilersitsisimanngikkuit aamma naammattunik akiliisarsimanngikkuit procenti akileraarutissaq ukiuni tulliuttuni suli qaffaqqinneqartassaaq. Soraarnerussutisiaqarnissamut aaqqissuussinermut akiliisimanngikkuit illit akileraarutissappit procentiata annertuumik qaffanneqarneranik taamaattumik kinguneqarsinnaavoq.

Taavami Kalaallit Nunaat qimallugu nuukkuma?
Kalaallit Nunaat qimallugu nuukkuit, aamma Kalaallit Nunaannut tamakkiisumik akileraartussaajunnaaruit, taava soraarnerussutisiaqarnissamut aaqissuusinermut pinngitsoorani ilaanissaq pillugu inatsimmut ilaajunnaassaatit. Soraarnerussutisiaqarnissamut aaqqissuussinermut akiliisarnissat pillugu piumasaqaat taamaalilluni atuukkunnaassaaq.
Nuunnissat tikillugu akiliutigisimasatit, soraarninngornissavit tungaanut uninngatiinnarsinnaavatit. Aamma soraarnerussutisiaqarnissamut neqerooruteqartunut allanut nuussinnaavatit.
Aaqqissuussinerit Kalaallit Nunaanniit nuunneqarnissaa toqqassagukku maluginiassavat Kalaallit Nunaanni akitsuummik akiliissagavit. Akitsuut tassaavoq 55 %. Aaqqissuussinerpit nuutsinnissaa sioqqullugu nunami nuuffigisanni akileraartarnermi malittarisassat aamma misissortariaqarpatit.
Kalaallit Nunaat qimallugu nuunnermi nunami nuuffigisanni akileraartarnermi malittarisassat ilisimasariaqarpatit. Kalaallit Nunaat nunanik allanik arlalinnik marloriaammik akileraartitsinissaq pinngitsoorniarlugu isumaqatigiissuteqarpoq.

Danmarkimut nuunnermi, marloriaammik akileraartitsinissaq pinngitsoorniarlugu Kalaallit Nunaata Danmarkimik isumaqatigiissuteqarnera pillugu immikkoortoq takujuk.