Akileraarutinut soraarnerussutisianullu tunngasut immikkut malittarisassat suleriaatsillu maani atuarsinnaavasi.

Kalaallit Nunaanni soraarnerussutisiaqarnissamut aaqqissuussinernut akiliiguit
Kalaallit Nunaannut akileraartartutut tunngaviatigut soraarnerussutisiaqarnissamut aaqqissuussinernut Kalaallit Nunaanni inissisimasunut amerlanernut akiliutitit tunngaviatigut akileraartarnikkut ilanngaatigisinnaavatit tiguneqarnerili akileraaruteqaataassallutik.

Akiliininnut atatillugu akiliutinnit akileraaruteqassanngilatit. Ulluinnarni akiliinerit taamatut ittut ilanngaatigineqarsinnaatitaasutut imaluunniit akileraartussaannginneq ulluinnarni taasarpagut.

Soraarnerussutisiaqarnissamut aaqqissuussinerni nammineq inuttut pilersissimasanni, akileraartussaannginneq tassaavoq akiliutigisimasannik ilanngaateqarsinnaatitaagavit. Tamanna isumaqarpoq aningaasarsiatit akileraaruteqaataasussat naatsorsulerukkit akiliutigisimasatit ilanngaatigisinnaagakkit. Maluginiassavat akiliutigisimasannut taakkununnga ilanngaat akileraaruteqaataasussanit ilanngaataammat taakkulu akileraaruteqaataasussanit ilanngaatitit allat ilanngullugit nalilissavat ilanngaat aalajangersimasoq imaluunniit akileraaruteqaataasussanit ilanngaatit tamarmiusut nalingat arlaat atorniarnerlugu.

Soraarnerussutisiaqarnissamut aaqqissuussinerni, atorfeqarnermut atatillugu pilersinneqarsimasuni akileraartussaannginneq tassaavoq sulisitsisup akiliutaa akileraaruteqaataassanngimmat. Tamanna isumaqarpoq aningaasarsiatit akileraaruteqaataasussat naatsorsorneqarneranni akiliutigisimasat ilanngutissanngikkitit. Tassani soraarnerussutisiaqarnissamut aaqqissuussinermut sulisitsisup akiliutai illillu nammineq akiliutitit pineqarput.

Kalaallit Nunaata avataani soraarnerussutisiaqarnissamut aaqqissuussinernut akiliuteqaruit
Kalaallit Nunaanni tamakkiisumik akileraartussaatitaasutut soraarnerussutisiaqarnissamut aaqqissuussinernut Kalaallit Nutaata avataani inissisimasunut akiliutinnit tunngaviatigut akileraartussaatitaavutit. Maluginiassavalli ATP-imut aamma tjenestemandit soraarnerussutisiaqarnissamut aaqqissuussinerannut nammineq akiliutitit sulisitsisullu akiliutai suli ilanngaatigisinnaagakkit.

Soraarnerussutisiaqarnissamut aaqqissuussineq nammineq pilersissimanerit imaluunniit atorfeqarnermut atatillugu pilersinneqarsimanersoq assigiinngissuseqarput.

Soraarnerussutisiaqarnissamut aaqqissuussinermut nammineq pilersissimasannut akiliuteqaruit tamanna aningaasanit akileraaruteqaataareersunik akiliineruvoq taamaattumillu akiliisoqaqqissanani.

Akissarsiannut atatillugu sulisitsisut soraarnerussutisiaqarnissamut aaqqissuussinernut akiliuteqartarpat, akissarsiavit tunniutinnginnerani sulisitsisuppit akileraaruteqarnissat isumagissavaa.

Soraarnerussutisiatit Kalaallit Nunaanni aaqqissuussinerniit tiguneqarpata
Soraarnerussutisiaqarnissamut aaqqissuussinernut nammineq akiliutinnut sulisitsisullu akiliutaanut ilanngaateqarsimaguit soraarnerussutisiat tiguneqarneranni aningaasarsianit akileraarummik akiliissaatit.

Soraarnerussutisiatit Kalaallit Nunaata avataani aaqqissuussinerniit tiguneqarpata
Akiliutigisimasanniit ilanngaateqarsimanallu aamma sulisitsisup akiliutai ilanngaatigisimanagit uppernarsarsinnaagukku, soraarnerussutisiaqarnissamut aaqqissuussinernit amerlanerniit tigusatit tunngaviusumik akileraaruteqaataassanngillat.