airplanebooksbriefcase business cogs cross election entertainment fish house law lockmedicalpeopleselfservices socialtax

FAQ Sulisitsisunik nakkutilliineq 

Sooq Sulisitsisunik nakkutilliineq

Aningaasarsianit akileraarutit pillugit Inatsisartut inatsisaat malillugu sulisitsisut isumagisassaminnik naammassinninnissaat qularnaarumallugu Akileraartarnermut Aqutsisoqarfiup nakkutilliinermik allaffianni sulisut “sulisitsisunik nakkutilliinermik” suliaqarsinnaapput. Takuuk akileraaruserinermik ingerlatsineq pillugu inatsimmi kap. 14.

Tamanna pisinnaavoq sulisitsisup suliffeqarfiutaanut ornigunnikkut. Aammattaaq naatsorsuutit bilagitaat ilanngullugit Akileraartarnermut Aqutsisoqarfimmut nassiuteqquneqarsinnaapput.

Sulisitsisunik nakkutilliinermi naatsorsuutit tamaasa misissorneqarsinnaapput. Skattekort uppernarsaatillu allat nakkutilliinermut pingaaruteqartut saqqummiunneqarnissaat piumasarineqarsinnaavoq.

Naatsorsuutinik misissuinermi aningaasarsiat naatsorsuutaasa bilagitaasalu misissorneqarnerisa saniatigut aammattaaq sulisitsisup naatsorsuutaasa sinneri misissorneqarsinnaapput.

Misissuiartorsinnaaneq, uppernarsaatinik saqqummiusseqqusineq aammalu naatsorsuutinik bilagitaannillu nassiusseqqusineq ullormut akiliisitsisarnikkut pinngitsaaliissutigineqarsinnaapput. Paasissutissat nakkutilliilluni misissuinermi atugassat aamma aningaasarsiortunit pissarsiariniarneqarsinnaapput.

Pingaartumik sulisitsisunut nutaanut kaammattuigineqassaaq nalornissutit sapinngisamik piaartumik Sulisitsisut Nalunaarsorsimaffiannut paasiniarneqartarnissaat – saaffiginninnikkut imaluunniit sulisitsisunik nakkutilliisunit pulaarneqarnissamik qinnuteqarnikkut.

Sulisitsisup akisussaaffia, akiliinissamut akisussaatitaanera aamma pillarneqarsinnaanera


Unerartitsisussaatitaq taassumaluunniit piginnaatitaa akileraarutit A-t akilerneqarnissaannut akisussaatitaapput. Takuuk akileraartarnermut inatsimmi § 93.

Suliffeqarfiit arlaqartut sulisitsisutut ataatsitut nalunaarsorneqarsimasut (interessentskabit assigisaalluunniit) akiliinissamut assigiimmik akisussaaqatigiipput.

Akiliinissamut akisussaatitap aammattaaq nassuiaatit eqqortumik immersorneqarnissat piffissaritinneqartorlu eqqorlugu nassiunneqarnissat akisussaaffigai.

Aningaasarsianit akileraarutit pillugit Inatsisartut inatsisaat naapertorlugu akileraarutinik A-nik unerartitsisussaanerminik naammassinninngitsoq, imaluunniit minnaaraluni akileraarutinik ilanngaasoq, minnaarutigineqartut akilerneqarnissaannut akisussaatinneqassaaq, suliassaminik sumiginnaasimannginnini qularnaallisarsinnaanngikkuniuk.

Nassuiaatinik sukumiisunik amigaateqarnerup imaluunniit amigartunik naatsorsuuteqarnerup kigunerisaanik sulisitsisumut akiliutigeqqusat eqquissumik naatsorsorneqarsinnaanngippata, sulisitsisunik nakkutilliisut akileraarutit A-t akilerneqartussat missingersorlugit amerlassusilerallarsinnaavaat. Takuuk akileraartarnermut inatsimmi § 93, imm. 3.

Sulisitsisup pillarneqarsinnaanera

Aningaasarsianit akileraarutit pillugit Inatsisartut inatsisaat naapertorlugu sulisitsisoq akiliisitaanermik allatulluunniit pineqaatissinneqarnermik pillarneqarsinnaavoq, taanna piaaraluni mianersuaalliorujussuarluniluunniit

• Akileraarutinik A-nik unerartitsinngippat imaluunniit minnaarlugit unerartitsippat,

• Akileraarutit A-t unerartitat piffissaliunneqartoq eqqorlugu akilerneq ajorpagit,

• Nassuiaat sukumiisoq piffissaliunneqartoq eqqorlugu nassiunneq ajorpagu,

• Nassuiaammi sukumiisumi eqqunngitsunik paasissutissiippat

Takukkit akileraartarnermut inatsimmi § 102 aamma § 105. Pillaat piffissaagallartillugu akileraarutit A-nut aammalu sulisoqarnermut akitsuutip akilerneqarsimanngippata qaammammut 1,5%-nik pillaatisisarput, taassumalu kingorna nakkutilliisut suliffeqarfimmut pulaaqqinnermi paasinarsippat suli piffissaagallartillugu akiliisoqartarsimanngippat sulisitsisoq pillaammik nutaamik qaammammut 2%-nik qaffanneqassaaq.

Akeqanngitsumik ajunngitsorsiat


Ukiut aningaasarsiorfiit tamaasa Naalakkersuisut najoqqutassiamik nalunaaruteqartarput akeqanngitsumik ajunngitsorsianut maleruagassamik, ukuuppullu:

• Akeqanngitsumik ineqarneq

• Akeqanngitsumik nerisaqarneq

• Akeqanngitsumik nerisaqarneq (isumaginninnermi angerlarsimaffinniittut il.il)

• Akeqanngitsumik ineqarneq, nerisaqarneq kiisalu akiliunneqarluni angalaneq (atortussiassalerisut aamma kommunit aggornerisa avataaniittut il.il.)

• Akeqanngitsumik najugaqarneq

• Nammineq nioqqutissaatinik atuineq

• Akiliunneqarluni angalasarnerit

• Qamutit motoorillit akeqanngitsumik Kalaallit Nunaata avataani atorneqartartut nalingat

• Akeqanngitsumik telefoneqartitaaneq

• Savaatillit tuttuutillillu uumasuutaannik naliliinerit

• Akeqanngitsumik internettersinnaatitaaneq

• Akeqanngitsumik biileqartitaaneq