Pisortanut akiitsoqaruit akiitsuit akilernissaannut imaluunniit akiitsuit naafferarlugit akilersornissaannut isumaqatigiissusiornissamut Akiliisitsiniartarnermi immikkoortortaqarfimmut nalunaarutigisussaatitaavatit.
Pisortanut akiligassaqarlutit Akiliisitsiniartarnermi immikkoortortaqarfik attaveqarfiginngikkukku, akissarsiavit akileraarutitaat peereerlugit pingajorarterutaat akiitsunnut naafferarlugilluunniit akiitsunnut ilanngaanneqassaatit. Taaneqartarpoq pinngitsaaliilluni akiliisitsineq.
Pinngitsaaliilluni akiliisitsisoqartarpoq Akiliisitsiniartarnermi immikkoortortaqarfiup illit akiligassalittut sulisitsisut Akiliisitsiniartarnermi immikkoortortaqarfimmik pinngitsoorani suleqateqartussaq attaveqarfigineratigut.
Akilersuitillutit aningaasaqarniarnerit allannguuteqarpat, soorlu napparsimalernermi, suliffeerukkuilluunniit Akiliisitsiniartarnermi immikkoortortaqarfik akiliisinnaassutsit nutaamik nalilersussavaa.
Aningaasarsiornivit allanngornerata kingunerisaanik ulluinnarni aningaasartuutit nammassinnaajunnaaritit Akiliisitsiniartarnermi immikkoortortaqarfimmit nalilerneqarpat piffissami aalajangersimasumi akilersuinitit unitsikkallarneqarsinnaapput.
Malugiuk
Pinngitsaaliilluni akilersuinerit nalliuttorsiornissani assersuutigalugu juullernerani, ukiortaarnerani, inuuissiortoqarnerani, apersortittoqarnerani imaluunniit katittoqarnerani unitsinneqarsinnaanngillat.