Nioqqutissanik eqqussuinermi akitsuutit pillugit Inatsisartut inatsisaata allanngortinneqarneranik Inatsisartut inatsisaat nr. 23, 18. november 2019-imeersoq aqqutigalugu puusianik eqqussinermi akitsuutit nutaat atuutsilertinneqarnissaat Inatsisartut akuersissutigaat.

Akitsuutit pillugit Inatsit uani takujuk. 

Puussiat tigummiviata tungaanut assigisaanulluunniit 5 liiterit taannaluunniit qaangerlugu inorlugulu imaqarsinnaasut immikkoortinneqarput. Akitsuutit pillugit nalunaarsukkat uani takukkit. 

Puussiat aqqi akitsuusiinermi apeqqutaatinneqanngillat. Puussiat sananeqaataat atorfissaallu akitsuusiinissamut pisussaaffiliinissamut nalilersuinermi pingaaruteqartuupput.

Atortussat
Akitsuummi ilaapput puussiat plastikimik assigisaannilluunniit sanaat sananeqaataat iginneqarnissaallu eqqarsaatigalugit avatangiisinut ajornartorsiortitsilersussaanngitsut, tassungalu ilaatigut ilanngullugit puussiat polymimik, ethylenimik kiisalu naasunit qerattarsaammik akullit nioqqutissanik angallassinermi nioqquteqarnermilu nalinginnaasumik atorneqartartut aammalu puussianit annoraaminermit sanaanik, pooqattanit, taskinit pooqattanillu assigisaannik avatangiisinut mingutsitsinngitsunik atalluarsinnaasunillu taarserluarneqarsinnaasut. ”Assigisaalluunniit”-imik oqarnermi ilaatinneqarput siunissami atortussat ineriartortinneqarsinnaasut avatangiisinullu ajoqutaasinnaasut.

Atuuffik
Tigummiviit assigisaalluunniit assersuutigalugu tassaapput nivinngaavillit imaluunniit qilerutitallit, kiisalu puussiaq assammik ataatsimik tigumiarneqarsinnaaqqullugu tigummivissanik putullit assigisaalluunniit.

Puussiat anartarfilerinermi atorneqarnerusartut akitsuusiinermi ilaatinneqanngillat naak tigummiveqarlutillu qileruteqaraluartut assammik ataatsimik tigummiveqarsinnaanngorlutik.

Puussiat plastikimik sanaat matussutissatut allunaasartallit assersuutigalugu eqqagassanut atugassiat akitsuusiinermi ilaatinneqanngillat puussiat pineqartut puussianik annoraaminernik il.il. sanaanik taarserneqarsinnaanngimmata.

Akitsuuteqartitsinissamik piumasaqaammi ilaatinneqanngillat puussiat matoqqasut (ammarnaveersaatitallit) assersuutigalugu iggavimmi allarutissanut køkkenrullenut equutissianullu atorneqartut, qerisunik nillataartitassanillu uninngasuuteqarnissamut puussiat matusartullit, puussiaaqqat puussiatut atorneqartussatut naleqqutinngitsut, kiisalu puussiat tigummivillit ammarnaveersaatitallit sillimaniarnermi piumasaqaatit nassatarisaannik mittarfinni niuertarfinni akileraarutitaqanngitsunik pisinermi atorneqartartut.