Iluanaarutisianik pissarsiat nalunaarutigikkit



Iluanaarutisianik pissarsisut kikkuuneri pillugit paasissutissat ukioq aningaasarsiorfiusoq 2020 aallarnerfigalugu ilanngullugit nassiunneqartussaalerput.

Piumasaqaat taanna aningaasarsianit akileraarutit pillugit Inatsisartut inatsisaanni nr. 12, 2. november 2006-imeersumi, Inatsisartut inatsisaatigut nr. 41, 2. december 2019-imeersukkut allanngortinneqartumi § 88, imm. 1, oqaaseqatigiinni siullerni allaqqavoq.

Taamaattumik immersugassaq U1 nutaanik immersuiffissartaqalerpoq qarasaasiakkullu immersugassanngortinneqarluni.

 
Ulluni ukunani ingerlatseqatigiiffiit ukioq aningaasarsiorfiusumi 2020-mi iluanaarutisianik tunniussaqarsimasut allagarsitinneqarput, inassutigineqarluni paasissutissat qarasaasiakkut nalunaarsoqqullugit.

 
Ingerlatseqatigiiffiutit allakkanik tigusaqarsimanngippat qarasaasiakkut immersuiffissaq nutaaq U1 atorlugu iluanaarutisianik 1. januar 2020-miit pissarsisimasut nalunaarsorsinnaavatit.

 
U1 qarasaasiakkut immersugassaq uaniippoq.

Qarasaasiakkut immersugassami immersuiffissat nutaat ukununnga tunngasuupput:
1. Oqaatsit toqqagassat – Iluanaarutisianit akileraarutit pillugit ilitsersuut nuissaaq
2. U1-imik immersuereernikuuit? – ”Aap” tooruk
3. Paasissutissat iluanaarutisianik pissarsisumut tunngasut
4. Qarasaasiakkut immersugaq pdf-inngorlugu toqqorneqarsinnaavoq – “Andre muligheder” tooriarlugu – “Hent PDF” toorlugu

Iluanaarutisianik pissarsisut ataasiakkat pillugit paasissutissiissutigineqassapput:

  • CPR / CVR / TIN nr.
  • Ateq
  • Najugaq
  • Postnormu
  • Illoqarfik
  • Nuna (Iluanaarutisianik pissarsisup najugaa)
  • Iluanaarutisianik pissarsisut ataasiakkaat pillugit nalunaarneqassapput iluanaarutisiat tun¬-niunneqartut/pisassanngortinneqartut (iluanaarutisianit akileraarutit ilanngaatigin¬ngin¬ne¬ranni amerlassusiat).

Iluanaarutisianik pissarsisut arlaqarpata titarnerit immersuiffissat ”Ilaqqiguk” toorlugu ilaneqassapput.

Qinnuigaatsigit kingusinnerpaamik ulloq 23. juli 2021 nalunaaruteqaqqullutit.

Qarasaasiakkut nalunaaruteqarfissap atorneqarnissaa Akileraartarnermut Aqutsisoqarfiup paasissutissanik isumannaatsuutitsinissaq pissutigalugu kajumissaarutigaa, paasissutissammi paasiuminaallisagaallutik tassuuna nassiunneqassapput.

 
Apeqqutissaqaraanni taakku akitax@nanoq.gl-imut nassiunneqarsinnaapput imaluunniit Akileraartarnermut Aqutsisoqarfiup Kukkunersiuinermut immikkoortuanut oqarasuaatikkut saaffiginnissutigineqarsinnaallutik.