Tapiissuteqartarnermut aaqqissuussineq

Tapiissuteqartarnermik aaqqissuussineq piffissami 2017 – 2021-imi atuutissaaq. Tapiissutit aningaasarsiatut A-tut akileraaruserneqartassapput. Tapiissutit inunnut piumasaqaatinik ataani allassimasunik naammassinnittunut taamaallaat tunniunneqarsinnaapput:

• Kipitinneqanngitsumik tamakkiisumik 31. december 2016-imili Kalaallit Nunaannut akileraartussaatitaasut.
• Kalaallit Nunaata avataani soraarnerussutisiaqarnissamut aaqqissuussinermut 2016-imi ilanngaatigineqarsinnaasumik imalt. sulisitsisup akiliutaanik ilanngaatigineqarsinnaasumik akiliuteqarsimasut.
• Soraarnerussutisiaqarnissamut aaqqissuussinernut qulaani taaneqartunut suli akiliuteqartartoq.

Inuit piumasaqaatinik naammassinnittut ukiuni 2017-2021-imi nunani allani soraarnerussutisiaqarnissamut aaqqissuussinernut uppernarsarneqarsinnaasumik akiliuteqarsimaneq tunngavigalugu tapiissutinik pissarsisinnaatitaapput. Tapiissutit tassaapput:

• 2017-2019-imi akileraaruteqannginnermi soraarnerussutisiaqarnissamut aaqqissuussinernut akiliutit 5 procentii. Taamaattorli qaammammut ataatsimut annerpaamik 420 kr.-it.
• 2020-2021-imi akileraaruteqannginnermi soraarnerussutisiaqarnissamut aaqqissuussinernut akiliutit 3 procentii. Taamaattorli qaammammut ataatsimut annerpaamik 250 kr.-it.

Namminersortuni atorfillit aamma inuit namminerisaminnik soraarnerussutisiaqarnissamut aaqqissuussaqartut 2017-imut tunngatillugu soraarnerussutisiassanut akiliutinut tapiissutinik siusinnerpaamik 2018-imi qaammatit pingasukkaat pingajuanni qinnuteqarsinnaapput. Qinnuteqarsinnaaneq pillugu Akileraartarnermut Aqutsisoqarfik erseqqinnerusumik paasissutissiissaaq.

Namminersorlutik Oqartussani, taassuma ataani suliffeqarfinni (tassunga ilanngullugit suliffeqarfiit namminersortitat, Nukissiorfiit, Mittarfeqarfiit aamma Asiaq) kiisalu kommunini atorfeqartunut tapiissutit 2017-imi kingornalu nalinginnaasumik akissarsisitsinermut atatillugu soraarnerussutisiaqarnissamut aaqqissuussinernut ingerlaannartumik akilerneqartassapput.

Inatsit uani takujuk