Soraarnerussutisiaqalernissamut aaqqissuussinermut peqataasussaatitaaneq pillugu inatsit

1. januar 2018-imiit Kalaallit Nunaanni soraarnerussutisiaqalernissamut aaqqissuussinermut peqataasussaatitaaneq pillugu inatsit atuutilerpoq. Aaqqissuussinermi tassani innuttaasut tamarmik 18-iniit soraarnerussutisiaqalernissamut ukioqalernissap tungaanut ukioqartut (oktober 2017-imi 66-inik ukioqalereersimasut) Kalaallit Nunaannut tamakkiisumik akileraartussaatitaasut soraarnerussutisiaqarnissamut aaqqissuussinermut akiliisussaatitaapput.


Akiliutit tassaapput ukiumut ileqqaagaqarnissamut tunngaviusunit procenti akiligassaq, ileqqaagaqarnissamut tunngaviusut 100.000 kr.-inik annertunerusutut naatsorsorneqarsimappata. Quppernermi uani soraarnerussutisiaqarnissamut pinngitsoorani ilaanissaq pillugu inatsit sulisussinnut qanoq isumaqarnersoq, aamma taanna eqqortinniarlugu sulisussi qanoq iliornissaannut paasissutissat takusinnaavatit.

Soraarnerussutisiaqarnissamut aaqqissuussinermut pinngitsoorani ilaanissaq pillugu inatsit naapertorlugu soraarnerussutisiaqarnissamut aaqqissuussinermut sulisoq nammineerluni akiliuteqarneq ajorpat taava Akileraartarnermut Aqutsisoqarfik akileraartarnermut allagartamik nutaamik atulersitsissaaq akilinngitsuukkallu procentimut akileraarutissamut tapiliussatut qaavatigut akilersinneqassallutik. Soraarnerussutisiaqarnissamut aaqqissuussinermik atorneqarsinnaasumik sulisoq peqareersoq, Akileraartarnermut Aqutsisoqarfiup ilisimappagu aaqqissuussinermut tassunga aningaasat akiliutigineqartut nuussavai. Taamatut aaqqissuussinermik Akileraartarnermut Aqutsisoqarfik ilisimasaqanngippat Soraarnerussutisiaqalernissamut Pinngitsoorani ilaanissaq siunertaralugu Akileraartarnermut Aqutsisoqarfik, sulisup atianut nutaamik pilersitsissaaq.