Akileraartarnermut Aqutsisoqarfimmi mail-it tiguneqartartut nassiunneqartartullu



Namminersorlutik Oqartussat FuseMail-imik - SecureMail-imik mail-inik oqartussanut allanut soorlu eqqartuussissuserisunut, kattuffinnut, ilinniarfinnut, sillimmasiisarfinnut .il.il. nassiunneqartut inunnut paasissutissanik mianernarluinnartunik imallit paasiuminaatsunngortittarnissaat pillugu isumaqatigiissuteqarpoq. Innuttaasunut ataasiakkaanut mails-it aaqqissuussinermut ilaanngillat.

Namminersorlutik Oqartussat NemPost,-ip akeqaranilu isumannaarsup e-mail-itut atorneqarnissaa taarsiullugu innersuussutigaa. Tamatuma kingunerisaanik soorlu siumoorluni nalunaarsukkat, nammineerluni nalunaarsukkat, inaarutaasumik naatsorsuinerit aammalu allanut tunngatillugu Akileraartarnermut Aqutsisoqarfimmit ilisimatitsissutit inunnut paasissutissartai paasiuminaatsunngorlugit qarasaasiarlu atorlugu atsiukkatut nassiunneqartarput. Taamaattorli maluginiartariaqarpoq paasissutissat iserfigisinnaassagaanni NemID atorlugu taamaallaat iserfigineqarsinnaammata. Isumannaatsumik nassitsisarnissaq pingaartinneqartorujussuuvoq, allakkatigut nassiussisarnermit piumasaqaatit sukannernerullutik allakkullu sumiluunniit najugaqaraluaraanni kinguaattoorani tiguneqarsinnaasarlutik.

Nempost-imik atuisinnaalersimanngitsut sullissivik.gl aqqutigalugu atuisinnaalernissaq pillugu saaffiginnissinnaapput, tassanilu nemPost-imik atuisinnaalernissamut ilitsersuutit atuarneqarsinnaapput.