Kalaallit Nunaanni Namminersorlutik Oqartussat

Akileraartarnermut Aqutsisoqarfik

Akiliisitsiniartartunik pingasunik/kontorfuldmægtiginik pissarsiorpoq

 

Akileraartarnermut Aqutsisoqarfimmi akiliisitsiniartartutut atorfiit pingasut ulloq 1. februar 2021 -imiit imaluunniit isumaqatigiissuteqarnikkut inuttassarsiuunneqarpoq.

Aaqqissuussaanikkut atorfiit akiliisitsiniartarnermut immikkoortortaqarfimmi inissisimavoq, Nuummi allaffeqarfimmi sullivittut inissisimalluni.

Suliassat:

Pingaarnertut suliassaallutik innuttaasunut namminersortunullu pinngitsaaliilluni akiliisitsiniaaneq, taamaattumillu nammineerluni suliassanik suliarinnissinnaanissamut piginnaasaqarnissaq naatsorsuutigineqarluni, aammalu ajornanngippat akiliisitsiniartarnermi inatsisinut attuumassutilinnut ilisimasaqarnissaq, naatsorsuusiornermullu paasinnissinnaaneq, kiisalu pitsaasumik oqaasiliorsinnaanermut – isumaqatigiissuteqarniarsinnaanermullu piginnaasaqarnissaq.

Taamatuttaaq akiliisitsiniartarnermi suliassanut tamanut peqataasassaasi, akileraartarnermut Aqutsisoqarfimmi immikkoortortaqarfiit allat suleqatigalugit.

Saaffiginnittunik sullisserusuttuussaasi. Nutaanik ilinniagaqassallusi soqutigisarissavat, suliassanillu nutaanik suliaqassallusi akunnattoorfigissanagu. Atorfinititsinernut atatillugu suliassanut qulaani taaneqartunut ilinniartinneqassaasi.

Akiliisitsiniartarnermi immikkoortortaqarfimmi pisortanut akiitsunik tamanik akiliisitsiniaanerit ingerlanneqartarput.

Akiliisitsiniartarnermi immikkoortortaqarfik katillugit 24-inik sulisoqarpoq. Illoqarfinnilu ukunani inissisimallutik: Nuuk, Qaqortoq, Maniitsoq, Sisimiut aammalu Ilulissat.

Akiliisitsiniarnermi allaffimmi pisortaq qaninnertut aqutsisorissavasi.

Piginnaasat:

Naatsorsuutigineqarpoq allaffimmiutut assigisaanilluunniit ilinniagaqarsimanissasi, assingusumillu misilittagaqareersimanissarsi, kiisalu qarasaasiamik atuisinnaanissarsi, namminersorlutillu sulisinnaa-nissasinnut, peqataalluartuunissarsi, aalajaallusilu akisussaaffeqarluartumik sulisinnaanissarsi.

Kalaallisut/qallunaatut/tuluttullu piginnaasaqartuunissarsi iluaqutaassaaq.

Kalaallit kulturiannik inuiaqatigiinnilu pissutsinik ilisimasaqarnissarsi piumasarineqarpoq.

Atorfimmut ilisimasaqareernissarsi, inatsisitigullu naatsorsuuserinermut paasinnilluarsinnaanissarsilu.

Aningaasarsiat atorfinitsinnermullu atugassarititaasut:

Akissarsianut atorfinititsinermilu atugassarititaasut, atorfinitsitsinerup nalaani atorfinitsitaasussat kattuffiata isumaqatigiinniarsinnaatitaasup Kalaallit Nunaannilu Namminersornerullutik Oqartussat akornanni isumaqatigiissutit atuuttut naapertorlugit ingerlanneqartassapput.

Ineqaarneq:

Atorfimmut atatillugu sulisunut inissamik innersuussisoqarsinnaanngilaq. Qinnuteqartullu Namminersorlutik Oqartussani atorfeqarnertik aqqutigalugu sulisutut ineqareersimagussi sulisunut inissiamik innersuusiffigineqarsinnaanersi attatiinnassavaa. Atorfimmut atatillugu ini atorfeqarnermut tunngavoq atorfeqarnerullu taamaatinneqarnerani qimanneqassalluni.

Atorfik pillugu saaffiginniffissaq:

Atorfik pillugu apeqquteqartoqarsinnaavusi uunga allaffimmi pisortamut Anna Lynge  oqarasuaat toqqaannartoq +299 34 55 54 / mail: anly@nanoq.gl

Qinnuteqaatisi ilinniarsimanermut paasissutissatisi, siusinnerusukkullu suliffigisimasasi soraarummeersimanermullu uppernarsaatisi nuutinneri ilanngullugit nassiutissavasi:

Namminersorlutik Oqartussat

Akileraartarnermut Aqutsisoqarfik

Postbox 1605, 3900 Nuuk

Imaluunniit nittartagaq www.naalakkersuisut.gl aqqutigalugu

Piffissaq qinnuteqarfissarititaasoq kingulleq:

Qinnuteqaatisi Akileraartarnermut Aqutsisoqarfiup kingusinnerpaamik tigoreersimassavarput 05. Januar 2021.