Pisortanut akiitsoqarpit? Akiliinissamut eqqaasitsissut e-Boks-innut nassiunneqarpoq.

Ulluni makkunani Akileraartarnermut Aqutsisoqarfiup pisortanut akiitsut pillugit akiliinissamut eqqaasitsissummik e-Boksikkut nassiussuivoq. Akiliinissamut eqqaasitsissut akiitsut akiliisitsiniartarfimmut november 2020-imiit augustip 2021-ip tungaanut apuunneqarput. 

Akiitsut pillugit akiligassiissutimut isumaqataanngikkuit imaluunniit akiligassap annertussusaa isumaqatiginngikkukkit Akileraartarnermut Aqutsisoqarfimmut attaveqarsinnaavutit: tax@nanoq.gl imaluunniit 34 65 00.

Sullissivik.gl-imi aningaasanik pissaqarnerlutit imaluunniit pisortanut qanoq akiitsoqartiginerlutit nammineerlutit takusinnaavat

Inuinnartut imaluunniit inuussutissarsiummik ingerlataqartutut pisortanut akiligassaasinnaasut Sullissivik.gl-imi tamakkiisumik takusinnaavatit. Kontup assilinerani akileraarutit aamma pisortanut akiitsut akiliisitsiniartarfimmut nassiunneqarsimasut nammineerlutit takusinnaavatit. Pisortanut akiligassatit uani takusinnaavatit: https://www.sullissivik.gl/Emner/B_SKAT/Gaeld-til-det-offentlige/Se-din-restance-til-det-offentlige?sc_lang=kl-GL

Akiitsunnut tunngatillugu ikiorneqarsinnaavutit

Akileraartarnermut Aqutsisoqarfik pisortat innuttaasunit suliffeqarfinnillu pissaannik akiliisitsiniartarnermik suliaqartarpoq Qaqortumi, Nuummi, Maniitsumi, Sisimiuni Ilulissanilu sulisoqarluni. Taamaammat innuttaasut suliffeqarfiillu pisortanut akiitsut akilernissaannut toqqissillutik ikiorneqarlutillu ilitsersorneqarsinnaapput. Akileraartarnermut Aqutsisoqarfik innuttaasunut sullissivinni immikkoortuni, oqarasuaatikkut e-mailikkullu pissarsiarineqarsinnaavoq.